အက်ရှင်ကားများ

ပြီးခဲ့တဲ့ရာစုနှစ်အစပိုင်းမှာ Loulan ရှေးဟောင်းမြို့တော်ရဲ့ အပျက်အစီးတွေကို ရှာတွေ့ခဲ့ရာက ကမ္ဘာတစ်ဝှမ်းက စူးစမ်းရှာဖွေသူတွေ ရတနာရှာဖို့ ရောက်လာကြပါတယ်။ အဖိုးတန် ယဉ်ကျေးမှုအမွေအနှစ် အများအပြားကိုလည်း နိုင်ငံခြားက ရတနာခိုးသူတွေ တူးဖော်ယူဆောင်သွားကြတယ်။ Chen Xiao ကတော့ ဒီလိုဘဏ္ဍာတွေ ခိုးယူခံရတာကို တားဆီးဖို့ ဓားပြတွေကို ရင်ဆိုင်နေသူပါ။ ဒါကြောင့် ဓားပြတွေကလည်း သူ့ကို နံပါတ်တစ်ရန်သူအဖြစ် သတ်မှတ်ထားကြပါတယ်။ တစ်ခါမှာ သူတို့ဝိုင်းဝန်းရန်မူတာကနေ လွတ်အောင်ပြေးရင်း Chen Xiao ဟာ ထူးဆန်းတဲ့ မြို့တော်တစ်ခုထဲ လမ်းမှားရောက်သွားတယ်။ အဲဒီမြို့တော်ထဲမှာ တွေ့ရတဲ့အဖွဲ့တစ်ဖွဲ့နဲ့ ပူးပေါင်းပြီး အသက်ရှင်လွတ်မြောက်ဖို့ ဘယ်လိုကြိုးစားကြမလဲ။ ရှေးဟောင်းယဉ်ကျေးမှုအမွေအနှစ်တွေကိုလည်း ခိုးယူချင်သူတွေရဲ့လက်ထဲ မရောက်အောင် ဘယ်လိုကာကွယ်ကြမလဲဆိုတာကို စိတ်ကူးယဉ်အက်ရှင်ဇာတ်လမ်းနဲ့ ဆက်ပြထားပါတယ်။

ခမ့်ဆိုတဲ့ လူငယ်လေးဟာ ငယ်ငယ်ကတည်းက အဖေဆုံးပါးသွားပြီး ဘုန်းကြီးကျောင်းမှာ နေထိုင်ကြီးပြင်းလာခဲ့သူပါ။ ခက်ခဲတဲ့ပတ်ဝန်းကျင်မှာ သူနဲ့ သူငယ်ချင်းတွေဟာ နေ့ဘက်အလုပ်လုပ်၊ ညဘက်ဆို ဘားမှာ လက်ဝှေ့ထိုးရင်း ကိုယ့်ဘဝကို ပြောင်းလဲနိုင်ဖို့ ကြိုးစားနေကြပါတယ်။ ဒါပေမယ့် သူတို့ထိုးနေရတဲ့ လက်ဝှေ့ပွဲတွေမှာ မျှတမှုမရှိပါဘူး။ လောင်းကစားနဲ့ ငွေကြေးလိမ်လည်မှုတွေကြားမှာပဲ ပွဲတွေက လည်ပတ်နေတယ်။ တစ်နေ့မှာတော့ သူတို့ ရှာဖွေစားသောက်နေတဲ့ ဘားကို ဩဇာကြီးသူတွေက အနိုင်ကျင့်ပြီး သိမ်းယူသွားကြပါတယ်။ ခမ့်နဲ့ သူငယ်ချင်းတွေ စည်းစည်းလုံးလုံးနဲ့ ဘားဆိုင်ကို ဘယ်လိုပြန်ယူကြမလဲ။

တိုရိုတိုမိနဲ့ တိုခုဂဝတို့ခေတ်မှာ စစ်ကို ဘယ်သူနိုင်နိုင် သတ်ဖြတ်မှုတွေ ဆက်ရှိနေဦးမယ်လို့ ယူဆတဲ့ လုပ်ကြံရေးအဖွဲ့တစ်ဖွဲ့ ပေါ်လာပါတယ်။ သူတို့ရဲ့ရည်ရွယ်ချက်က စစ်ပွဲတွေ မရှည်ကြာစေဖို့ တိုရိုတိုမိရဲ့ မဟာမိတ်စစ်နယ်ရှင် သုံးယောက်ကို လုပ်ကြံဖို့ပါ။ အုပ်ချုပ်ရေးအဖွဲ့ကို ဆန့်ကျင်တဲ့ ခေါင်းဆောင်တစ်ယောက်က ကလေးတချို့ကို နှစ်ပေါင်းများစွာ ဓားသိုင်းသင်ပေးပြီး ဒီတာဝန်အတွက် ပျိုးထောင်ထားခဲ့တယ်။ ကလေးတွေ အရွယ်ရောက်ပြီး ပညာစုံလာတဲ့အခါ ကိုယ်ရောစိတ်ပါ မာကျောဖို့၊ ပေးအပ်တဲ့တာဝန်ကို မပျက်မကွက် လိုက်နာဖို့ ရက်စက်တဲ့ နောက်ဆုံးသင်ခန်းစာတစ်ခုကို ရင်ဆိုင်ကြရပါတယ်။ အချင်းချင်း ပြန်သတ်ခိုင်းပြီး အသက်ရှင်ကျန်သူတွေကိုပဲ ရွေးချယ်တဲ့ လေ့ကျင့်မှုပါ။ အဲဒီထဲက လွတ်မြောက်လာသူတစ်ယောက်ကတော့ အာဇုမိဆိုတဲ့ နင်ဂျာမလေး ဖြစ်ပါတယ်။ အာဇုမိဟာ အပြင်ပန်းမှာ နူးညံ့ပျော့ပျောင်းပုံပေါက်ပေမယ့် စိတ်ဓာတ်ခိုင်မာပြီး လူသတ်ရတဲ့အခါ လက်မတွန့်သူပါ။ လေ့ကျင့်ရေးပြီးဆုံးတဲ့နောက် သူတို့ဟာ စစ်ကိုတားဖို့ စစ်နယ်ရှင်တွေကို လိုက်လံလုပ်ကြံကြရပါတယ်။ မန်ဂါကို အခြေခံထားတဲ့ ဒီဂျပန်သမိုင်းနောက်ခံ ဆာမူရိုင်းကားမှာ ဓားခုတ်ခန်းနဲ့ တိုက်ခိုက်ခန်းတွေ အများအပြား ပါဝင်ပြီး ဒုတိယကားကလည်း ပထမကားရဲ့အဖြစ်အပျက်တွေကို တစ်ဆက်တည်း ဆက်ထားပါတယ်။

ဒုတိယကမ္ဘာစစ်အတွင်း မစ်ရှင်တစ်ခုမှာ ပျောက်ဆုံးသွားခဲ့တဲ့ ကပ္ပတိန်အမေရိကကို ပြန်ရှာတွေ့တဲ့နေရာက ဇာတ်လမ်းစထားပါတယ်။ စစ်အတွင်းက သူ့ရဲ့မပြီးပြတ်သေးတဲ့ မစ်ရှင်ဟာ ဒီနေ့ခေတ်အထိ ဆက်ပါလာပြီး တစ်ကမ္ဘာလုံး ပျက်စီးသွားနိုင်တဲ့ အခြေအနေကို ရောက်လာတယ်။ ဒီအန္တရာယ်ကို တားဆီးဖို့ ကပ္ပတိန်အမေရိကနဲ့ နစ်ဖြူရီတို့ဟာ တစ်ယောက်ချင်း သီးသန့်လှုပ်ရှားနေကြတဲ့ စူပါဟီးရိုးတွေကို စုစည်းကြပါတယ်။ အဲဒီကနေ Avengers အဖွဲ့ စတင်ဖြစ်ပေါ်လာပြီး ကမ္ဘာကို ဖျက်ဆီးမယ့် ရန်စွယ်ကို ကာကွယ်ဖို့ ကြိုးစားကြတာပါ။ ၂၀၀၆ ခုနှစ်က ထွက်ရှိခဲ့တဲ့ ဒီအက်ရှင်စွန့်စားခန်း ကာတွန်းရုပ်ရှင်ဟာ Ultimate Avengers နှစ်ကားထဲက ပထမကားဖြစ်ပါတယ်။ Avengers အဖွဲ့ စတင်ဖွဲ့စည်းပုံကို အဓိကထားပြီး လူသရုပ်ဆောင်တွေနဲ့ ရိုက်ကူးထားတဲ့ ဇာတ်လမ်းနဲ့တော့ အနည်းငယ်ကွာခြားပါတယ်။

စထရေးဟာ လမ်းဘေးတိုက်ခိုက်ရေးပြိုင်ပွဲတွေမှာ နာမည်ရနေတဲ့ ဖိုက်တာတစ်ယောက်ပါ။ မိုင်ယာမီကို အုပ်စိုးထားတဲ့ မြေအောက်အဖွဲ့ရဲ့ခေါင်းဆောင် အက်စတယ်က သူ့လိုလူမျိုးကို ရှာနေရာက ပြိုင်ပွဲတစ်ခုမှာ တွေ့သွားပြီး အလုပ်ခန့်လိုက်ပါတယ်။ စထရေးကို သင်ကြားပေးရမယ့်သူက အက်စတယ်ရဲ့လူယုံ ကူဒါဖြစ်တယ်။ ကူဒါက ထောင်ကနေ ပြန်လွတ်လာသူဖြစ်ပြီး မကြာခင် ဆယ့်ခြောက်နှစ်ပြည့်တော့မယ့် လိုလာဆိုတဲ့ သမီးတစ်ယောက် ရှိပါတယ်။ လိုလာကတော့ အဖေထောင်ကျနေခဲ့လို့ သူ့အပေါ် တာဝန်မကျေခဲ့တာတွေကို စိတ်ခုနေတယ်။ တစ်နေ့ မြို့ထဲသွားရင်း ကူဒါဟာ အလစ်သုတ်တာကို ဆိုင်ရှင်မိသွားလို့ ပြဿနာတက်နေတဲ့ ကောင်မလေးတစ်ယောက်ကို ဝင်ကူပေးခဲ့ပါတယ်။ အဲဒီကနေ ခင်မင်သွားပြီး ခိုကိုးရာမဲ့နေတဲ့ ကောင်မလေးအတွက် စားစရာနဲ့ နေစရာပါ စီစဉ်ပေးရင်း သမီးတစ်ယောက်လို သံယောဇဉ်တွယ်လာတယ်။ ဒါပေမယ့် တစ်နေ့မှာ ကောင်မလေး ပျောက်သွားပါတော့တယ်။ ကူဒါနဲ့ စထရေးတို့ လိုက်ရှာကြရင်း မထင်မှတ်ဘဲ တွေ့လာတဲ့ သဲလွန်စတစ်ခုကနေ ကောင်မလေးရှိတဲ့နေရာကို သိသွားကြတယ်။ သူ့ကို ဘယ်သူတွေ ဖမ်းထားတာလဲ၊ ကူဒါနဲ့ စထရေးတို့ ဘယ်လိုကယ်တင်ကြမလဲဆိုတာအပြင် ကူဒါအနေနဲ့ သမီးအရင်း လိုလာအတွက် ဘာတွေလုပ်ပေးနိုင်ဦးမလဲဆိုတာကိုလည်း ဆက်ပြထားတဲ့ အက်ရှင်မှုခင်းဒရာမာပါ။

မာတင်ဟာ စားနပ်ရိက္ခာအစီအစဉ်တစ်ခု စတင်ဖို့အတွက် ဂါဗင်ဆိုတဲ့ ဧည့်လမ်းညွှန်ရဲ့အကူအညီနဲ့ ရစ်တောင်တန်းဆီ သွားမလို့ပါ။ ဒါပေမယ့် ကားပေါ်တက်ရုံပဲ ရှိသေးချိန်မှာ နှစ်ယောက်လုံး ဖမ်းခေါ်သွားခံလိုက်ရပါတယ်။ ဘယ်သူတွေက ဘာကြောင့် ဖမ်းသွားတာလဲဆိုတာ မသိရသေးဘဲ ဇာတ်လမ်းက အဲဒီနေရာက စထားတာပါ။ ဖမ်းဆီးခံထားရစဉ်မှာ မာတင်ဟာ သူ့ရည်းစားအကြောင်း ထပ်ခါထပ်ခါ မေးမြန်းခံရပြီး လက်ချောင်းတွေကိုလည်း တစ်ချောင်းပြီးတစ်ချောင်း ဖြတ်တောက်ခံရပါတယ်။ ဖမ်းထားသူတွေက ဖြတ်ထားတဲ့ လက်ချောင်းတွေကို ရေခဲနဲ့ သိမ်းထားပြီး သူတို့လိုချင်တဲ့အဖြေရရင် ပြန်ဆက်ပေးမယ်လို့ ဆိုကြတယ်။ အဲဒီဖမ်းဆီးခံရတဲ့ ကာလအတွင်း အရှေ့နဲ့အနောက်ကြားက အယူဝါဒတွေ၊ နိုင်ထက်စီးနင်းပြုမှုတွေနဲ့ မတူညီတဲ့ နိုင်ငံရေးအမြင်တွေကို ဆွေးနွေးပြောဆိုထားတဲ့ ဒရာမာ၊ သည်းထိတ်ရင်ဖိုဇာတ်ကားပါ။

၂၀၅၄ ခုနှစ်မှာ အမေရိကန်ဖယ်ဒရယ်အစိုးရဟာ Precrime လို့ခေါ်တဲ့ မှုခင်းကြိုတင်တားဆီးရေးအဖွဲ့ကို နိုင်ငံတော်အဆင့် ဖွဲ့စည်းဖို့ ကြိုးစားနေပါတယ်။ ဒီအဖွဲ့က လူသတ်မှုတွေ မဖြစ်ခင် ကြိုတင်တားဆီးပေးတဲ့ အထူးရဲတပ်ဖွဲ့ပါ။ မျိုးဗီဇမွမ်းမံထားတဲ့ လူသားတွေဖြစ်တဲ့ precogs တွေက မှုခင်းဖြစ်မယ့် နေရာ၊ အချိန်နဲ့ ပါဝင်မယ့်လူတွေကို အတိအကျ ဟောကိန်းထုတ်ပေးတယ်။ အဲဒီအချက်အလက်တွေအတိုင်း precops လို့ခေါ်တဲ့ အထူးရဲတွေက အချိန်မီ သွားရောက်ဝန်းရံပြီး တားဆီးကြတာပါ။ အထူးရဲအဖွဲ့မှူး ဂျွန်အန်ဒါတန်ဟာ အိမ်ထောင်ကွဲထားပြီး မကြာသေးခင်က သားဖြစ်သူ ပျောက်ဆုံးသွားခဲ့သူပါ။ တာဝန်နဲ့ စစ်ဆင်ရေးတွေမှာ ကျေပွန်ပေမယ့် သားပျောက်သွားတဲ့ စိတ်ဒဏ်ရာကို ကုစားရင်း ဆေးစွဲနေပါတယ်။ သူ့နေရာမှာ တွမ်ခရုစ်က သရုပ်ဆောင်ထားတယ်။ Precrime ဟာ ကိုလံဘီယာခရိုင်မှာ စမ်းသပ်လည်ပတ်နေဆဲဖြစ်လို့ နိုင်ငံတော်အဆင့် တရားဝင်ဖွဲ့စည်းနိုင်ရေးအတွက် ဖယ်ဒရယ်အရာရှိတွေရဲ့ စစ်ဆေးမှုကို ခံနေရပါတယ်။ အထူးတာဝန်နဲ့ ရောက်လာတဲ့ ဖယ်ဒရယ်အေးဂျင့် ဒန်နီဝစ်တ်ဝါကလည်း မာန်တကြွကြွရှိသူမို့ အန်ဒါတန်တို့နဲ့ ထိပ်တိုက်တွေ့လာတယ်။ တစ်နေ့မှာ လူသတ်မှုတစ်ခုကို တားဆီးဖို့ precogs တွေ ခန့်မှန်းပေးလိုက်တဲ့ လူသတ်သမားအမည်ပါ ဘောလုံးအနီကို အန်ဒါတန် ကြည့်လိုက်မိပါတယ်။ အဲဒီအပေါ်မှာ ရေးထားတာက သူ့နာမည်ဖြစ်နေတာပါ။ Precrime ရဲ့ဟာကွက်ကို စောင့်ကြည့်နေပြီး သူ့ကိုလည်း မကြည်တဲ့ ဝစ်တ်ဝါက ထောင်ချောက်ဆင်တာလို့ အန်ဒါတန်

နက္ခတ္တဗေဒကို ဝါသနာပါတဲ့ ဆယ်ကျော်သက်တစ်ယောက်ဟာ ညဘက်မှာ မှန်ပြောင်းနဲ့ ကောင်းကင်ကို ကြည့်နေရာက အမျိုးအမည်မသိတဲ့ ကြယ်တံခွန်ကြီးတစ်လုံးကို တွေ့သွားပါတယ်။ အဲဒီကြယ်တံခွန်က နယူးယောက်မြို့လောက် ကြီးမားပြီး ကမ္ဘာဆီကို ဦးတည်လာနေတာပါ။ ကမ္ဘာကို ဝင်တိုက်တော့မယ့် ဒီအန္တရာယ်ကြီးကို အစိုးရဘက်က ဘယ်လိုကိုင်တွယ်ဖြေရှင်းမလဲဆိုတာကို သိပ္ပံစိတ်ကူးယဉ်၊ အက်ရှင်နဲ့ ဒရာမာပေါင်းစပ်ပြီး ရိုက်ကူးထားပါတယ်။ အမေရိကန်သမ္မတအဖြစ် Morgan Freeman က ပါဝင်သရုပ်ဆောင်ထားပါတယ်။

အဗာစ်ဟာ အမွေဆိုင်အိမ်ကြီးအတွက် အမှုရင်ဆိုင်ရင်း ရှုံးနိမ့်သွားတဲ့နောက် ဘဝရပ်တည်ဖို့တောင် အခက်တွေ့လာပါတယ်။ ကြံရာမရတော့တဲ့အဆုံး ညီမဖြစ်သူ ဆာနီယားနဲ့အတူ ရနခ်ပူးရွာလေးမှာ အခြေချဖို့ ထွက်လာခဲ့တယ်။ အဲဒီရွာမှာ ဩဇာအာဏာအကြီးဆုံးသူက ပရစ်ထဗီရာဂျ်ပါ။ နည်းနည်းရိုးအပြီး လိမ်ပြောတာကိုတော့ လုံးဝမကြိုက်သူဖြစ်တယ်။ သူ့ကို လိမ်ခဲ့ဖူးတဲ့ အလုပ်သမားတစ်ယောက်ကို ရိုက်နှက်ခဲ့လို့ အဲဒီလူမှာ ဆေးရုံအကြာကြီး တက်ခဲ့ရဖူးပါတယ်။ အဗာစ်ကတော့ မလွဲသာမရှောင်သာနဲ့ ပရစ်ထဗီရာဂျ်ဆီမှာ အလုပ်ဝင်လုပ်ဖြစ်သွားတယ်။ လိမ်တာကို မုန်းတဲ့လူဆီမှာ အလုပ်လုပ်နေရပေမယ့် အဗာစ်ရဲ့အလိမ်တွေက တစ်ခုပေါ်တစ်ခု ထပ်လာပါတော့တယ်။ အဂျေးနဲ့ အဘီရှိခ်ဘဂျမ်းတို့ အဓိကပါဝင်ထားတဲ့ ဟာသအက်ရှင်ဇာတ်ကားပါ။

ဟိဒဲရောရှိအရှင်ဟာ မိုမိုချိမျိုးနွယ် အုပ်ချုပ်နေတဲ့ အီဂါကို သိမ်းချင်ပေမဲ့ မိုမိုချိအရှင်ရဲ့ ထက်မြက်မှုကြောင့် အကြံမအောင်ဘဲ ဖြစ်နေပါတယ်။ ဒါနဲ့ သူ့လက်ဝေခံ ရှိုးဂန်း ရှိရနုအိက အီဂါရဲ့မဟာမိတ်လို ဟန်ဆောင်ပြီး အကူအညီပေးသလိုနဲ့ သူလျှိုလုပ်ခဲ့တယ်။ အဲဒီသစ္စာဖောက်မှုကြောင့် မိုမိုချိမျိုးနွယ်ဟာ အလစ်ဝင်တိုက်ခံရပြီး စစ်ရှုံးသွားပါတယ်။ မိုမိုချိတို့ အာဏာလက်လွတ်ရပြီးနောက် အီဂါပြည်သူတွေပါ လူမျိုးတုံးသတ်ဖြတ်မှုနဲ့ ကြုံရလို့ လွတ်ရာကို ထွက်ပြေးကြရတယ်။ မိုမိုချိအရှင်ရဲ့သား တကမာရုကိုတော့ သူတို့ကို စောင့်ရှောက်ပေးနေတဲ့ အဘကြီးက ခေါ်ပြီး ဘေးလွတ်ရာဆီ ထွက်ပြေးခဲ့ပါတယ်။ ဆယ်စုနှစ်တစ်ခုကြာတဲ့အခါ တကမာရုဟာ ဟိဒဲရောရှိတို့ကို ကလဲ့စားချေဖို့ ဂျပန်ပြည်ကို ပြန်ရောက်လာတယ်။ အသက်ရှင်ကျန်ခဲ့တဲ့ မိုမိုချိမျိုးနွယ်ဝင်တွေနဲ့ ရှိုးဂန်း ရှိရနုအိတို့ အုပ်ချုပ်သူတွေကြားက ရင်ဆိုင်မှုတွေ ပြန်စလာပါတော့တယ်။

L.O.R.D အပိုင်း ၂ မှာတော့ ရင်းချန်ရဲ့ဆရာ ကျီအယ်ကျားမေရှီကို ကယ်တင်ဖို့ ကြိုးစားကြတဲ့အကြောင်း ဆက်ပြထားပါတယ်။ ပထမပိုင်းက ဇာတ်လမ်းအဆက်ဖြစ်ပြီး မေတ္တာနဲ့ အချစ်အကြောင်းကိုလည်း ထည့်သွင်းဖော်ပြထားတယ်။ ကယ်တင်ရေးအတွက် တိုက်ခိုက်နေကြချိန်မှာ သူတို့ရင်ဆိုင်နေရသူတွေက တကယ့်ရန်သူတွေပဲလားဆိုတဲ့ မေးခွန်းရှိနေပါတယ်။ ဒီလိုလောကမျိုးမှာ မိတ်ဆွေလို့ ခေါ်နိုင်တဲ့သူတွေ ရှိသေးရဲ့လားဆိုတာလည်း စဉ်းစားစရာဖြစ်လာတယ်။

Iran-Contra အရေးအခင်းကာလကို အခြေခံထားတဲ့ ဒီဇာတ်လမ်းမှာ Mel Gibson က အမေရိကန်ကာကွယ်ရေးဌာနရဲ့ ကန်ထရိုက်တာတစ်ယောက်အဖြစ် သရုပ်ဆောင်ထားပါတယ်။ ပနားမားအခြေစိုက် အမေရိကန်ခံတပ်ကနေ စီအိုင်အေအကူအညီနဲ့ Contra တွေဘက်ကို လက်နက်ထောက်ပံ့နေကြပေမယ့် ထုတ်ပြန်ချက်တစ်ခုကြောင့် ဆက်ထောက်ပံ့လို့ မရတော့ဘူး။ ဒါကြောင့် တခြားနည်းလမ်း ရှာကြရပါတယ်။ ဒီအစီအစဉ်ရဲ့ ပထမဆုံးတာဝန်က ဆိုဗီယက်ရဟတ်ယာဉ်တစ်စင်း ဝယ်ပြီး တစ်ဖက်ဆီ ပို့ပေးဖို့ပါ။ တာဝန်ယူဖို့ ရွေးချယ်ခံရသူက တပ်ဖွဲ့ဝင်ဟောင်း ဂျိမ်းစ်ဘက်ကာ။ သူက ခေါင်းမာပြီး ထင်ရာစိုင်းတတ်လို့ တာဝန်ပေးသူတွေက စိတ်မချကြပေမယ့် ဒီအလုပ်အတွက် အသင့်တော်ဆုံးလူဖြစ်နေတာကြောင့် ပနားမားကို လွှတ်လိုက်ကြတယ်။ တာဝန်ထမ်းဆောင်နေတုန်း ဘက်ကာဟာ ပနားမားကို အမေရိကန်ကျူးကျော်တဲ့ကိစ္စထဲပါ ဝင်ပါမိသွားပါတယ်။ အဲဒီအခြေအနေမှာ သူဘာတွေဆက်ကြုံရမလဲ၊ ရဟတ်ယာဉ်ပို့ဆောင်ရေးတာဝန်ကရော အောင်မြင်နိုင်မလားဆိုတာကို ဆက်ပြထားတဲ့ အက်ရှင်သည်းထိတ်ရင်ဖိုဇာတ်ကားပါ။

လက်က်ဇ်ဂေစီအင်ဂျင်နီယာကျောင်းနဲ့ ဘရာမာဆေးကျောင်းတို့က မျက်နှာချင်းဆိုင်မှာ ရှိပေမယ့် လုံးဝမတည့်ကြတဲ့ ကျောင်းနှစ်ကျောင်းပါ။ အင်ဂျင်နီယာကျောင်းဘက်မှာ ဗစ်ရှ်ဟွာက ခေါင်းဆောင်ဖြစ်ပြီး ဆေးကျောင်းဘက်မှာတော့ ဗစ်ခရမ်ရှိတယ်။ ကိုယ်ဘာဖြစ်ချင်မှန်းတောင် ရေရေရာရာမသိသေးတဲ့ ပထမနှစ်အင်ဂျင်နီယာကျောင်းသား အက်ရှ်ရှေက တစ်နေ့မှာ ဆေးကျောင်းထဲ မှားဝင်မိသွားပါတယ်။ အဲဒီမှာ ကာဗီရာကို သဘောကျသွားပြီး ရည်းစားစာပါ ပေးလိုက်တယ်။ ကာဗီရာက ဗစ်ခရမ်သဘောကျနေတဲ့ မိန်းကလေးဖြစ်သလို သူတို့နှစ်ယောက်လုံးကလည်း ဆေးကျောင်းမှာ စာအတော်ဆုံး၊ ကျောင်းဂုဏ်ဆောင် ကျောင်းသားတွေပါ။ ဗစ်ခရမ်က တခြားလူတွေ ကာဗီရာကို ကြည့်တာလေးတောင် သည်းမခံနိုင်တဲ့သူမျိုး။ ဒီကြားထဲ ရန်ဘက်အင်ဂျင်နီယာကျောင်းက ကောင်လေးကို ကာဗီရာက သဘောကျလာတဲ့အခါ ဘာတွေဖြစ်လာမလဲ။ အက်ရှ်ရှေကလည်း ကာဗီရာရဲ့အချစ်ကိုရဖို့ ဘယ်လိုကြိုးစားရမလဲ၊ ကျောင်းနှစ်ကျောင်းရဲ့ ရန်ငြိုးတွေကြားမှာ ဘယ်လိုအခက်အခဲတွေ ကြုံရမလဲဆိုတာ ဆက်တွေ့ရမှာပါ။

နည်းပညာကို မသိရင် ခေတ်နောက်ကျမယ်လို့ ပြောနေကြတဲ့ ၂၁ ရာစုမှာ လူတွေက နည်းပညာအပေါ် ဘယ်လောက်အထိ မှီခိုလာကြပြီလဲ။ ကိုယ့်အတွက် ဖန်တီးထားတဲ့ နည်းပညာရဲ့ သားကောင်တွေ၊ နောက်ဆုံး ကျေးကျွန်တွေတောင် မသိမသာဖြစ်လာကြသလားဆိုတဲ့ အတွေးကနေ The Red Sparrow ရဲ့ ဇာတ်လမ်းကို စိတ်ကူးပုံဖော်ထားပါတယ်။ အနာဂတ်မှာ လူတွေဖန်တီးထားတဲ့ စက်ရုပ်တွေက လူသားတွေကို ဘယ်လိုလွှမ်းမိုးဝါးမြိုလာနိုင်မလဲဆိုတာကို အက်ရှင်နဲ့ သိပ္ပံစိတ်ကူးယဉ်ပုံစံ ရိုက်ကူးထားတာပါ။ တက်သစ်စသရုပ်ဆောင်တွေ ပါဝင်ထားပြီး ဘတ်ဂျက်နည်းနည်းနဲ့ ဖန်တီးထားတဲ့ ဇာတ်ကားဖြစ်ပါတယ်။

ဒုတိယကမ္ဘာစစ်ပြီးသွားတဲ့နောက် တိုက်လေယာဉ်အုပ်စု ၃၂ က လေယာဉ်မှူးတွေဟာ တိုက်ပွဲမဝင်ရဘဲ ကင်းထောက်ပျံသန်းတာနဲ့ လေ့ကျင့်တာတွေ လုပ်နေကြပါတယ်။ အဲဒီအဖွဲ့ထဲမှာ တစ်ဦးတည်းသော လူမည်းလေယာဉ်မှူး ဂျက်ဆီဘရောင်းလည်း ပါဝင်ပြီး ဗိုလ်လေး တွမ်ဟက်ဒ်နာကတော့ သူ့ရဲ့သူငယ်ချင်းကောင်းပါ။ စစ်အေးကာလအတွင်း တောင်နဲ့မြောက်ကိုရီးယားနယ်စပ်မှာ စစ်ပွဲဖြစ်လာတဲ့အခါ သူတို့အဖွဲ့လည်း လေ့ကျင့်နေရတဲ့အဆင့်ကနေ လက်တွေ့တိုက်ပွဲဝင်ဖို့ ဖြစ်လာတယ်။ စစ်ပွဲမှာ ကူညီတိုက်ခိုက်ဖို့ လေယာဉ်တင်သင်္ဘောတစ်စင်းနဲ့ ထွက်ခွာလာကြပြီး လေကြောင်းတိုက်ပွဲတွေ ဆင်နွှဲကြရပါတယ်။ အမေရိကန်ရေတပ်လေယာဉ်မှူးတွေရဲ့ ဖြစ်ရပ်မှန်ကို အခြေခံထားပြီး သူရဲကောင်းဆုတွေရရှိခဲ့တဲ့ လေယာဉ်မှူးတစ်ယောက်ရဲ့အကြောင်းကို ရိုက်ကူးထားတာပါ။

အမှုကနေ လွတ်မြောက်လာတာ မကြာသေးတဲ့ ထိုင်ဟာ သူ့အမြွာအစ်ကို ထျန် အခြေအနေဆိုးဆိုးနဲ့ ဆေးရုံတက်နေရကြောင်း သိလိုက်ရပါတယ်။ အစ်ကို့ချစ်သူ ပျန့်ဆီကနေ အကြောင်းစုံကြားရတဲ့အခါ ဘယ်သူက အစ်ကို့ကို ရန်ပြုခဲ့သလဲဆိုတာ စုံစမ်းဖို့ ဆုံးဖြတ်လိုက်တယ်။ အဲဒီလိုနဲ့ ထိုင်ဟာ အစ်ကို့နာမည် ထျန်ကို သုံးပြီး ဘတ်စကတ်ဘောအသင်းတစ်သင်းထဲ ဝင်ကာ Fireball ဂိမ်းကို ယှဉ်ပြိုင်ဖို့ ဖြစ်လာပါတယ်။ ဒီပြိုင်ပွဲက ရက်စက်ကြမ်းကြုတ်ပြီး အသက်ကိုပါ လုရတဲ့ပွဲမျိုးပါ။ ထိုင်တစ်ယောက် ဖိုင်နယ်အထိ အသက်ရှင်နေနိုင်ပါ့မလား၊ အစ်ကို့ကို ရန်ပြုခဲ့သူ ဘယ်သူလဲဆိုတာကိုရော စုံစမ်းဖော်ထုတ်နိုင်ပါ့မလား။

အားကျွမ်းရဲ့မိဘတွေက အဝေးမှာ စီးပွားရှာနေရတာကြောင့် သူက နှစ်သစ်ကူးရောက်ရင် မိသားစုစုံစုံလင်လင်နဲ့ ဆုံချင်နေပါတယ်။ ရွာမှာတော့ သူဟာ အားနည်းပြီး လူတကာရဲ့ အနိုင်ကျင့်တာကို ခံနေရတဲ့ လူငယ်လေးတစ်ယောက်ပါ။ ရွာရဲ့နှစ်သစ်ကူးခြင်္သေ့အကပြိုင်ပွဲမှာ အနိုင်ကျင့်ခံရပြီးနောက် ခြင်္သေ့ခေါင်းအကက သူ့ဘဝထဲကို ဝင်လာခဲ့တယ်။ ဒီကာတွန်းဇာတ်ကားက အားကျွမ်းရဲ့ စိတ်ကူး၊ အိပ်မက်နဲ့ မျှော်လင့်ချက်တွေအပြင် တရုတ်နှစ်သစ်ကူးမှာ ခြင်္သေ့ခေါင်းအကကို ဘာကြောင့်ကကြသလဲ၊ ပြိုင်ပွဲတွေမှာ ဘယ်လိုစည်းကမ်းတွေရှိသလဲဆိုတာကိုပါ အသားပေးထားပါတယ်။ လောကဓံ ဘယ်လိုပဲကြုံရပါစေ ကိုယ့်ကိုယ်ကိုယ် အားကိုးရမယ်ဆိုတဲ့စိတ်နဲ့ ရှေ့ဆက်နေတဲ့ အားကျွမ်းတစ်ယောက် မိသားစုနဲ့ ပြန်ဆုံရပါ့မလား။ သူစိတ်ဝင်စားလာတဲ့ ရိုးရာခြင်္သေ့အကမှာရော ဘယ်အတိုင်းအတာအထိ ဖျော်ဖြေနိုင်မလဲ။

ရဲတပ်ဖွဲ့ဝင်တစ်ယောက်ကို လူဆိုးဂိုဏ်းသားတစ်ယောက်က သတ်လိုက်တဲ့နောက် ကျန်တဲ့လုပ်ဖော်ကိုင်ဖက်တွေက သူ့အတွက် လက်စားချေဖို့ ထွက်လာကြပါတယ်။ သူတို့လိုက်ရှာနေတဲ့လူ ရှိရာ မြို့ပြင်က စွန့်ပစ်တိုက်တစ်လုံးဆီ ရောက်သွားကြပေမယ့် မကြာခင်မှာပဲ ဇွန်ဘီတွေပါ ရောက်လာတော့တယ်။ လက်စားချေဖို့ လာခဲ့တဲ့ရဲတွေ၊ လူဆိုးဂိုဏ်းနဲ့ ဇွန်ဘီတွေ တစ်နေရာတည်းမှာ ဆုံသွားရာက အန္တရာယ်တွေကြား ရင်ဆိုင်ကြရတဲ့ ဇာတ်လမ်းပါ။ ၂၀၀၉ ခုနှစ်က ထွက်ရှိခဲ့တဲ့ ပြင်သစ် အက်ရှင်၊ ထိတ်လန့်ဇာတ်ကားဖြစ်ပါတယ်။

မိုဟန်ဂန်ဒီအတွက်တော့ ငွေဟာ ဘုရားသခင်လိုပဲ အရေးပါသလို အသက်ရှူဖို့လိုတဲ့ အောက်စီဂျင်လိုလည်း ဖြစ်နေပါတယ်။ ဇနီးချီထရာနဲ့ ယောက္ခမတွေ အသတ်ခံရတဲ့အမှုကြောင့် အဖမ်းခံထားရတဲ့ သူဟာ ပြစ်မှုလေ့လာရေးကျောင်းသူ ပူဂျာနဲ့ တွေ့ဆုံလာတယ်။ ဂန်ဒီပြောပြတဲ့ ဇာတ်ကြောင်းကို နားထောင်ပြီး ပူဂျာက သနားသွားတာကြောင့် အရာရှိကြီးဖြစ်တဲ့ သူ့အဖေရဲ့အကူအညီကို ယူကာ တရားမဝင်တဲ့နည်းနဲ့ ဂန်ဒီကို အာမခံထုတ်ပေးလိုက်ပါတယ်။ ဂန်ဒီ လွတ်သွားပြီးမှ CBI အရာရှိ အာဂျွန်ရဲ့ပြောပြချက်အရ သူဟာ အိန္ဒိယရဲတွေ အလိုရှိဆုံး ရာဇဝင်လူဆိုးဖြစ်နေကြောင်း ပူဂျာ သိလိုက်ရတယ်။ ဉာဏ်ကောင်းလွန်းတဲ့ ဂန်ဒီက ပူဂျာ့ကို ပြောပြသွားတာ ဘယ်သူ့ဇာတ်ကြောင်းလဲ၊ အဲဒီနောက်ကွယ်မှာ ဘာတွေရှိနေလဲ။ တစ်ဖက်မှာလည်း ဂန်ဒီနဲ့ သူ့အပေါင်းအပါတွေက သူတို့လိုချင်တဲ့ ငွေတွေကို ဘယ်လိုရအောင် ယူကြမလဲဆိုတာ ဆက်တွေ့ရမှာပါ။

အမေရိကန် FBI အဖွဲ့ဟာ ရုရှားဗိုလ်ကြီး ခိုစလိုဗာနဲ့အတူ ရုရှားမူးယစ်ဂိုဏ်းတစ်ခုကို ဝင်စီးရာမှာ မာဖီးယားခေါင်းဆောင် တဲရက်ရဲ့ညီကို မတော်တဆ ပစ်သတ်မိသွားပါတယ်။ တဲရက်က အမေရိကန်တွေကို လက်စားချေဖို့ FBI ဒါရိုက်တာ ဘရောင်းကို လုပ်ကြံသတ်ဖြတ်မယ်လို့ ဆုံးဖြတ်လိုက်တယ်။ အဲဒီအလုပ်အတွက် “ဝံပုလွေငယ်” လို့ခေါ်တဲ့ ကြေးစားလူသတ်သမားကို ငှားရမ်းလိုက်ပါတယ်။ ဝံပုလွေငယ်ဟာ လုပ်ကြံသတ်ဖြတ်မှုတွေ အများကြီး ကျူးလွန်ခဲ့ဖူးပေမယ့် သူ့ရုပ်ကို မြင်ဖူးသူတောင် အနည်းငယ်ပဲ ရှိတယ်။ ဒီလို လူသိနည်းပြီး လုပ်ကြံရေးမှာ ကျွမ်းကျင်သူတစ်ယောက် FBI ဒါရိုက်တာကို ပစ်မှတ်ထားလာတဲ့အကြောင်းကို Bruce Willis နဲ့ Richard Gere တို့ ပါဝင်သရုပ်ဆောင်ထားပါတယ်။

လွန်ခဲ့တဲ့ နှစ်ပေါင်း ၂၀၀ လောက်က အဒ်ဘန်ဒန်ဆိုတဲ့ မိစ္ဆာဟာ လူ့လောကကို အမှောင်ဖုံးလွှမ်းစေဖို့ ရောက်လာခဲ့ပါတယ်။ သူ့ကို တားဆီးဖို့ ငါးပြည်ထောင်မဟာမိတ်တွေ၊ နဂါးတွေနဲ့ နဂါးစစ်သည်တော်တွေ စုစည်းတိုက်ခိုက်ခဲ့ကြပေမယ့် အဒ်ဘန်ဒန်နဲ့ သူ့စစ်တပ်ကို မယှဉ်နိုင်ခဲ့ဘူး။ နဂါးတွေ သေဆုံးခဲ့ရပြီး နဂါးစစ်သည်တော်အဖွဲ့လည်း ပြိုကွဲသွားကာ တိုင်းပြည်အားလုံး သူ့ကို သစ္စာခံလိုက်ရပါတယ်။ ဘရေဒန်ကတော့ အဲဒီပြိုကွဲသွားတဲ့ နဂါးစစ်သည်တော်အဖွဲ့ရဲ့ နောက်ဆုံးကျန်ရစ်သူပါ။ ဖခင်ရဲ့စိတ်ဓာတ်ကို ဆက်ခံထားတဲ့သူဟာ အဒ်ဘန်ဒန်ကို ချေမှုန်းဖို့ ကြိုးစားနေတုန်းပဲ။ သူ့အကြံက နှစ်ပေါင်း ၂၀၀ ကတည်းက ပျောက်ဆုံးနေတဲ့ နဂါးတွေကို ရှာပြီး သူတို့ရဲ့အကူအညီနဲ့ အဒ်ဘန်ဒန်ကို အနိုင်ယူဖို့ပါ။ နဂါးတွေကို လိုက်ရှာတဲ့ခရီးမှာ မိတ်ဆွေသစ်တွေ ရလာပြီး အတူတူ စွန့်စားကြရတယ်။ သူတို့ နဂါးကို ရှာတွေ့နိုင်ပါ့မလား၊ အဒ်ဘန်ဒန်တို့ကိုရော အနိုင်ယူနိုင်ပါ့မလား။

ပိုရပ်စ်ဟာ လက်ထောက်စုံထောက် ဖြစ်ချင်နေတဲ့ လူငယ်တစ်ယောက်ပါ။ မတရားတာကြုံရင် ငြိမ်ခံနေတတ်သူလည်း မဟုတ်ဘူး။ ဖခင်ရှိရာ ရဲဌာနမှာသာမက အပြင်မှာပါ လူချမ်းသာတွေ အာဏာအလွဲသုံးစားလုပ်နေတာကို သူမြင်တွေ့နေရပါတယ်။ လူချမ်းသာတွေဆိုတော့ ကိုယ်တွေ ဘာလုပ်နိုင်မှာလဲဆိုပြီး လက်လျှော့လိုက်ကြတဲ့အခါ ပြစ်မှုကျူးလွန်သူတွေကို ကာကွယ်ပေးနေသူတွေကလည်း ရှိနေတယ်။ ဒီလိုအခြေအနေမှာ အလယ်အလတ်တန်းစား မိသားစုကလာတဲ့ ပိုရပ်စ်က အာဏာအလွဲသုံးစားမှုတွေကို မေးခွန်းထုတ်လာပါတယ်။ အဲဒီနောက် သူဘာတွေ ရင်ဆိုင်ရမလဲဆိုတာကို Vishal ပါဝင်သရုပ်ဆောင်ထားတဲ့ ဒီတမီးလ်ဇာတ်ကားမှာ ဆက်ပြထားပါတယ်။

မြွေဖြူနဲ့ မြွေစိမ်းအကြောင်း ဇာတ်လမ်းတွေထဲက ဒီတစ်ကားမှာတော့ မြွေစိမ်းမလေး ချင်းအာကို အဓိကထားထားပါတယ်။ ချင်းအာရဲ့ချစ်သူ တောက်ချင်းဟာ သူမကို ကယ်တင်ရင်း နတ်စည်းကမ်းကို ချိုးဖောက်မိတာကြောင့် လူသားအဖြစ် ပြန်ဝင်စားရဖို့ အပြစ်ပေးခံလိုက်ရတယ်။ ချင်းအာကတော့ ချစ်သူကို နှစ်ပေါင်းများစွာ စောင့်မျှော်ရင်း လိုက်ရှာနေခဲ့ပါတယ်။ ဒီလိုရှာဖွေနေရင်း ချွဲလျန်ဆိုတဲ့ ဘုန်းကြီးတစ်ပါးနဲ့ တွေ့ဆုံသွားတယ်။ ချွဲလျန်ဟာ တောက်ချင်း ပြန်ဝင်စားလာတဲ့ နောက်ဘဝဖြစ်ပေမယ့် အခုတော့ မိစ္ဆာတွေကို နှိမ်နင်းနေတဲ့ ဘုန်းကြီးတစ်ပါး ဖြစ်နေပါပြီ။ နှစ်ပေါင်းများစွာ ရှာဖွေခဲ့တဲ့ချစ်သူနဲ့ ပြန်တွေ့ချိန်မှာ တစ်ယောက်က မြွေစိမ်းမိစ္ဆာ၊ တစ်ယောက်က မိစ္ဆာနှိမ်နင်းသူ ဖြစ်နေတဲ့အခါ သူတို့နှစ်ယောက်ကြား ဘာတွေ ဆက်ဖြစ်လာမလဲ။

ထိုင်းနိုင်ငံမှာ လူမိုက်ဂိုဏ်းတွေ နာမည်ကြီးနေတဲ့ခေတ်က ဂျော့စ်နဲ့ ဒျန်ကို မသိသူ နည်းပါတယ်။ သူတို့က လူမိုက်တွေဖြစ်ပေမယ့် ပြည်သူတွေကို အနိုင်မကျင့်ဘဲ တစ်ခါတလေ ကူညီပေးကြသူတွေပါ။ ဒါပေမဲ့ သူတို့ကျင်လည်တဲ့ လောကမှာတော့ အာဏာလုတာ၊ အချင်းချင်း တိုက်ခိုက်တာနဲ့ မနာလိုမှုတွေက ရှိနေဆဲဖြစ်တယ်။ တစ်နေ့မှာ ဗိုလ်ကြီးဂမ်နင် ရောက်လာပြီး လူမိုက်ဂိုဏ်းတွေကို ဖမ်းဆီးပါတော့တယ်။ ဂျော့စ်လည်း အဖမ်းခံရပြီး ထောင်လေးနှစ် ကျသွားတယ်။ ဒျန်ကတော့ မတော်တဆ ကားမှောက်ပြီး သေဆုံးသွားခဲ့ပါတယ်။ လေးနှစ်အကြာ ဂျော့စ် ထောင်ကပြန်ထွက်လာချိန်မှာ လူမိုက်ဂိုဏ်းလောကထဲ ဘာတွေ ဆက်ဖြစ်လာမလဲ၊ အတိုက်အခိုက်နဲ့ သတ်ဖြတ်မှုတွေ ဘယ်လိုပေါ်လာဦးမလဲဆိုတာကို ဆက်ထားတဲ့ ဇာတ်လမ်းပါ။