သည်းထိတ်ရင်ဖိုကားများ

ခရစ်ရှန်လာဖဲယတ်ဟာ အာဖဂန်နစ္စတန် ရှေ့တန်းကနေ အသက်ရှင်ပြီး ပြန်လာနိုင်ခဲ့ပေမယ့် စစ်ပွဲကို စိတ်ထဲကနေ ထုတ်မပစ်နိုင်သေးပါဘူး။ ရဲဘော်တွေ သေဆုံးဒဏ်ရာရခဲ့ကြပြီး ကိုယ်က အသက်ရှင်ကျန်ခဲ့တဲ့အတွက် အပြစ်ရှိစိတ်နဲ့ နေနေရတယ်။ စူပါမားကတ်မှာ အလုပ်လုပ်ရင်း သာမန်အရပ်သားတစ်ယောက်လို နေဖို့ ကြိုးစားပေမယ့် အသားမကျနိုင်ဘူး။ မွန်နီးယားကလည်း တိုက်ခိုက်မှုမှာ ခြေထောက်ဒဏ်ရာရထားသူပါ။ ဘိန်းမှောင်ခိုလုပ်ရင်း အကြွေးတင်နေတဲ့သူ့အတွက် အခက်အခဲတစ်ခု ထပ်ရှိနေတယ်။ ဘိန်းတွေကို သိမ်းထားတဲ့ ရဲဘော်က စစ်ပွဲကရခဲ့တဲ့ စိတ်ဒဏ်ရာကြောင့် အရင်ဖြစ်ရပ်တွေကို မမှတ်မိတော့ပါဘူး။ သူတို့ရဲ့ ပြဿနာတွေကို လိုက်ဖြေရှင်းရင်း စစ်မြေပြင်မှာ ဖြစ်ခဲ့တာတွေကိုပါ ပြန်စူးစမ်းလာကြရတယ်။ တိုက်ပွဲပြကွက်ထက် စစ်ပွဲပြီးသွားတဲ့နောက် စစ်သားတွေ နေ့စဉ်ဘဝဆီ ပြန်ဝင်ဖို့ ရုန်းကန်ရပုံကို အဓိကပြထားတဲ့ ဒရာမာပါ။

မာ့ခ်ပက်ဆန်ဟာ အမျိုးသမီးငယ်တွေကို လူကုန်ကူးနေတဲ့ Godzilla မာဖီးယားဂိုဏ်းကို ရှင်းလင်းနိုင်ခဲ့တဲ့ အေးဂျင့်တစ်ယောက်ပါ။ လူအများအတွက် သူရဲကောင်းဖြစ်လာပေမယ့် တစ်ဖက်ဂိုဏ်းရဲ့ လက်စားချေမှုကြောင့် ဇနီးကို ဆုံးရှုံးလိုက်ရတယ်။ ဖခင်ရဲ့အလုပ်ကြောင့် အမြဲသတိထားနေရတာကို မနှစ်သက်တဲ့ သမီး အလီရှာကလည်း အမေဆုံးသွားတဲ့နောက် အဖေ့ကို မုန်းလာပါတယ်။ မိသားစုထက် သူရဲကောင်းဖြစ်ဖို့ကိုပဲ ရွေးလိုက်တယ်လို့ သူမြင်နေတာပါ။ မာ့ခ်က အလုပ်ထွက်ပြီး သမီးနဲ့ နားလည်မှု ပြန်တည်ဆောက်ဖို့ ကြိုးစားတယ်။ ဒါပေမယ့် ဇနီးကို သတ်ခဲ့တဲ့ လူသတ်သမားက ကျန်နေတဲ့ သမီးကိုပါ ပစ်မှတ်ထားလာတော့ အေးအေးချမ်းချမ်း နေလို့မရတော့ဘူး။ Louis Mandylor ပါဝင်ထားတဲ့ ဒီအက်ရှင်ကားမှာ မာ့ခ်က သမီးကို ကာကွယ်ရသလို သားအဖကြားက အကွာအဝေးကိုလည်း ပြန်ကျဉ်းလာအောင် လုပ်ရပါတယ်။

ကားမတော်တဆမှုတစ်ခုကြောင့် အယ်လီဟာ နှလုံးအစားထိုးကုသမှု ခံယူလိုက်ရပါတယ်။ အဲဒီနောက်မှာတော့ စန္ဒရားတီးတဲ့နေရာမှာ မထင်မှတ်လောက်အောင် ထူးချွန်လာတယ်။ နေ့စဉ်ဘဝမှာ တိုက်ဆိုင်မှုတွေ ဆက်တိုက်ဖြစ်လာရင်း အိမ်ခြေယာမဲ့လူတစ်ယောက်နဲ့ သူ့ကြားမှာ ဂန္ထဝင်ဂီတကတစ်ဆင့် ဆက်နွယ်နေတဲ့ လျှို့ဝှက်ချက်တစ်ခု ရှိနေသလို သတိထားမိလာပါတယ်။ အယ်လီရဲ့ ထူးဆန်းတဲ့အတွေ့အကြုံကို စန္ဒရားသံတွေနဲ့အတူ ဆက်ပြောသွားတဲ့ ဂီတဒရာမာတစ်ကားပါ။ Newcastle မြို့ရဲ့ ရှုခင်းတွေနဲ့ နောက်ခံတေးဂီတကို တွဲဖက်ထားပြီး အစားထိုးကုသမှုအပြီး ပြောင်းလဲသွားတဲ့ သူ့ဘဝနဲ့ အဲဒီလူစိမ်းကြားက ဆက်သွယ်မှုကို လိုက်ရှာရပါတယ်။

အတိတ်က လုပ်ခဲ့မိတဲ့အရာတွေအတွက် အပြစ်ရှိစိတ်နဲ့ နေနေရတဲ့ စီအိုင်အေအေးဂျင့်ဟောင်း ဂျက်ဘီဂိုစီယန်ဟာ အလုပ်ကနေ အနားယူထားပါတယ်။ လက်ရှိမှာ ရေဒီယိုနိုင်ငံရေးစကားဝိုင်း အစီအစဉ်မှူးလုပ်ရင်း မိသားစုနဲ့ အေးအေးချမ်းချမ်း ဘဝဖြတ်သန်းနိုင်ဖို့ ကြိုးစားနေသူပါ။ ဒါပေမယ့် ကလီယာဘက်ခ်ရေကုမ္ပဏီရဲ့ ထိပ်တန်းရှယ်ယာရှင်တစ်ယောက်က အလုပ်တစ်ခု လာအပ်တဲ့အခါ သူရှောင်ထားတဲ့အရာတွေနဲ့ ပြန်ရင်ဆိုင်ရတော့တယ်။ ကုမ္ပဏီရဲ့ လောဘကြောင့် အီကွေဒေါနိုင်ငံမှာ ဖြစ်ပွားခဲ့တဲ့ ဆိုးရွားတဲ့ဖြစ်ရပ်တွေကို သွားရောက်စုံစမ်းပေးဖို့ပါ။ ဂျက်ဟာ အဲဒီဖြစ်ရပ်တွေရဲ့ နောက်ကွယ်က အမှန်တရားကို လိုက်ရှာရင်း အတားအဆီးတွေနဲ့ ရင်ဆိုင်လာရပါတယ်။ မိသားစုနဲ့ ဘဝသစ်စဖို့ ကြိုးစားနေတဲ့ အေးဂျင့်ဟောင်းတစ်ယောက်က ဒီအမှုကို ဘယ်အထိ ဖော်ထုတ်နိုင်မလဲဆိုတဲ့ အက်ရှင်နဲ့ သည်းထိတ်ရင်ဖိုဇာတ်လမ်းပါ။

မဝေးတော့တဲ့ အနာဂတ်မှာ လူသားတွေဟာ လူ့အဖွဲ့အစည်း လည်ပတ်နိုင်ဖို့ စက်ရုပ်တွေကို မှီခိုနေကြပါတယ်။ လူနဲ့စွမ်းဆောင်ရည်တူအောင် ဖန်တီးထားတဲ့ ဆိုက်ဘော့တွေမှာတော့ သက်တမ်း သုံးနှစ်ပဲရှိပြီး အချိန်ပြည့်တာနဲ့ ဖျက်ဆီးစွန့်ပစ်ခံရမှာပါ။ လူသားနဲ့ ဆိုက်ဘော့တို့ရဲ့ စိတ်ဝိညာဉ်ကို ပေါင်းစည်းနိုင်တဲ့ လုပ်ငန်းစဉ်တစ်ခု ပေါ်လာတဲ့အခါ တင်းကျပ်စွာ ခွဲခြားထားတဲ့ လူ့အဖွဲ့အစည်းမှာ ပြဿနာတွေ စတင်ဖြစ်လာတယ်။ တိုက်ခိုက်ရေးဆိုက်ဘော့တွေက သူတို့ရဲ့ သက်တမ်းကို ဆွဲဆန့်နိုင်မယ်လို့ ယူဆရတဲ့ DNA နမူနာကို ရှာဖို့ ပင်မဓာတ်ခွဲခန်းကို ဝင်စီးကြပါတယ်။ ဒီပုန်ကန်မှုကို နှိမ်နင်းဖို့ ရဲအရာရှိ R နဲ့ Noma တို့ တာဝန်ယူရတော့မှာပါ။ သက်တမ်းပြည့်ရင် ဖျက်ဆီးခံရမယ့် ဆိုက်ဘော့တွေနဲ့ သူတို့ကို ထိန်းချုပ်ဖို့ ကြိုးစားနေတဲ့ လူသားတွေကြားက ပဋိပက္ခကို အခြေခံထားတဲ့ သိပ္ပံစိတ်ကူးယဉ်အက်ရှင်ကား ဖြစ်ပါတယ်။

ရဲစုံထောက် ရွတ်ခ်ရဲ့သမီးလေးကို လူတစ်ယောက်က ပြန်ပေးဆွဲသွားခဲ့ပါတယ်။ ပြန်ပေးဆွဲသူကို ရှာတွေ့ပေမယ့် သမီးကို ဘယ်မှာထားခဲ့သလဲဆိုတာ အဲဒီလူကိုယ်တိုင် မမှတ်မိတော့ဘူး။ ဒီလိုနဲ့ သမီးလေးကို ပြန်ရှာမတွေ့ဘဲ အမှုကို လက်လျှော့လိုက်ရပါတယ်။ အခြားအမှုတစ်ခုကို လိုက်စုံစမ်းနေချိန်မှာတော့ လူတွေကို အိပ်မွေ့ချပြီး အမိန့်ပေးစေခိုင်းနိုင်တဲ့ အစွမ်းရှိသူတစ်ယောက်နဲ့ ရွတ်ခ် ဆုံမိသွားတယ်။ အဲဒီလူက သူ့သမီးပျောက်ဆုံးမှုနဲ့ပါ ထူးထူးခြားခြား ဆက်စပ်နေတဲ့အတွက် နောက်ကြောင်းပြန်လိုက်ရတော့မှာပါ။ Robert Rodriguez ရိုက်ကူးပြီး ဘန်အက်ဖလစ်က ရွတ်ခ်အဖြစ် သရုပ်ဆောင်ထားတဲ့ လှည့်ကွက်တွေပါတဲ့ အက်ရှင်သည်းထိတ်ရင်ဖိုကား ဖြစ်ပါတယ်။