ရုပ်ရှင်အသစ်များ

စား​​သောက်ဆိုင်ပိုင်ရှင်နဲ့ စားဖိုမှူး ဆီနာက တစ်ညကျ​တော့ သူ့စား​သောက်ဆိုင်မှာ ​လူ​တွေ အများကြီး လာ​ရောက်စားသုံးကြပါတယ်။ အဲဒီအချိန် တစ်ဖက်မှာလည်း စစ်​ဆေး​ရေး ဝင်လို့ သတ်မှတ်ချက်နဲ့ မကိုက်ညီတဲ့ အချက်​တွေကို ​တွေ့သွားပြီး သတိ​ပေးခံရပါတယ်။ သူ့ဆိုင်က ဝန်ထမ်း​တချို့ဆို မကျွမ်းကျင်တာကတစ်မျိုး၊ အ​ချောင်ခိုတာက တစ်​ကြောင်းနဲ့ သူတို့ကို ထိန်း​ကျောင်းရတာကလည်း အလုပ်တစ်ခုပါပဲ။ ဒီလို အလုပ်ရှုပ်​နေတဲ့ ညမှာမှ ဆီနာရဲ့ အဖေက နှလုံး​ဖောက်လို့ ခွဲစိတ်မှု လုပ်ရ​တော့မှာပါ။ ဒါ​ပေမဲ့ အ​ဖေ့ဆီ မသွားနိုင်ဘဲ စား​သောက်ဆိုင်မှာပဲ အချိန်ကုန်ခဲ့ရပါတယ်။ စားသုံးသူ​တွေထဲမှာမှ အရစ်သန်တဲ့ လူတွေနဲ့ တွေ့တဲ့အခါ အချင်းချင်း က​တောက်ကဆ ဖြစ်ပြီး ပြဿနာ ကြီးထွားလာပါ​တော့တယ်။ ဒီလိုမျိုး ဖိစီးမှုများတဲ့ လုပ်ငန်းခွင်ထဲမှာ ဆီနာ ဆက်ပြီး ​တောင့်ခံနိုင်မလား။ ပြဿနာ​​ပေါင်း ​သောင်း​ခြောက်​ထောင်ကို သူ ဘယ်လို​ဖြေရှင်းမလဲဆိုတာ စိတ်ဝင်စားဖွယ် ကြည့်ရှုလိုက်ရ​အောင်။ အညွှန်း​ရေးသားသူနဲ့ ဘာသာပြန်မှာ Poe Yin Thar ဖြစ်ပါတယ်။

အောက်လမ်းအတတ်ပညာတွေလိုက်စားကိုးကွယ်တဲ့ ဘာသာရေးစနစ်တစ်ခုဖြစ်တဲ့ "Palo Mayombe" အကြောင်းကို တစွန်းတစသိရမယ့် သည်းထိတ်ရင်ဖို Horror ကားဖြစ်ပါတယ်။ စပိန်လူမျိုးဖြစ်တဲ့ ရိုဆာရီယိုဟာ ဖအေနဲ့မအေကွာရှင်းပြီးတော့ ‌‌ဖအေနဲ့လိုက်နေခဲ့ပြီး လက်ရှိမှာ အောင်မြင်တဲ့ဘဝကို ပိုင်ဆိုင်ထားသူပါ။ သူ့ငယ်စဉ်ဘဝနဲ့အတူ တခြားမြို့မှာကျန်ခဲ့တဲ့ အမေနဲ့အဘွားကိုပါ မေ့ထားပြီး နာမည်ကိုတောင် "ရို့စ်"လို့ပဲ အခေါ်ခံခဲ့ပါတယ်။ သူ့အမေဆုံးတုန်းကလည်း မသွားခဲ့ပါဘူး။ ဒါမဲ့နှင်းမုန်တိုင်းတိုက်တဲ့တစ်ညမှာ သူ့အဘွားဆုံးသွားပြီလို့ အကြောင်းကြားလာပြီး အဘွားဆီကပါ ထူးဆန်းတဲ့အသံမေးလ်ရောက်လာတဲ့အတွက် သူ့အဘွားအလောင်းကို လူနာတင်ကားလာတဲ့ထိ သွားစောင့်ပေးဖို့ဖြစ်လာပါတယ်။ အဲဒီတိုက်ခန်းမှာပဲ မသတီစရာပစ္စည်းတွေ အစီအရင်တွေတွေ့ရပြီးတော့ ခြောက်ခြားစရာကောင်းတဲ့ညမှာ သူ့အဘွား ဘာတွေလုပ်ခဲ့တာလဲဆိုတာ ဖော်ထုတ်ရမှာပါ။ ဒီဇာတ်ကားကိုအညွန်းနဲ့ဘာသာပြန်ပေးသူကတော့ Shune Lai KK ဖြစ်ပါတယ်

ဒီတစ်ခေါက်မှာတော့ တမူထူးခြားတဲ့ Indian Comedy ကားလေးနဲ့မိတ်ဆက်ပေးပါစေ " Akkada Ammayi Ikkada Abbayi 2025 " ပါ 1996 မှာလည်း တစ်ကားရှိခဲ့ပေမဲ့ ဇာတ်အိမ်အနည်းငယ်ကွာခြားပုံရပါတယ် ဇာတ်လမ်းအကျဉ်းကတော့ ရွာလေးတစ်ရွာမှာ နောက်ဆုံးမျိုးဆက်ကိုမွေးဖွားကြရာ အယောက် ၆၀လုံးက ယောက်ျားလေးတွေချည်းပဲမွေးဖွားပါတယ် သူတို့ထဲမှာ နောက်ဆုံးမွေးဖွားသူတစ်ဦးတည်းသာ မိန်းကလေးဖြစ်ခဲ့ပါတယ် ဒါကြောင့်သူ့ကို ရွာရဲ့မင်းသမီးလေးသဖွယ်ဂရုစိုက်ကြတယ် ကာလသားအယောက်၆၀ကလည်း ပိုးကြပမ်းကြပေါ့ တစ်ဖက်မှာလည်း မြို့ကြီးသားအင်ဂျင်‌နီယာလေးတစ်ဦးက ပရောဂျတ်ကိစ္စနဲ့ အဲဒီရွာကိုရောက်လာခဲ့ပါတယ် သူတို့နှစ်ဦး မထင်မှတ်ဘဲတွေ့ဆုံကြရာမှာ ချစ်ကျွမ်းဝင်သွားမလား ? ရွာရဲ့ ကာလသားအယောက် ၆၀ကိုရော ဘယ်လိုဖြတ်ကျော်မလဲ? ဟာသရသကို ပေါ့ပျက်ပျက်မဟုတ်ဘဲ အချိတ်အဆက်မိမိ ဇာတ်ကွက်ကောင်းကောင်းနဲ့ ရိုက်ကူးတင်ဆက်ထားနိုင်တာမို့ ရွေးချယ်သင့်တဲ့ဟာသကားအဖြစ် recommend ပေးလိုက်ပါတယ် ဒီဇာတ်ကားကိုအညွန်းနဲ့ဘာသာပြန်ပေးသူကတော့ Ki Ki Chit Su ဖြစ်ပါတယ်

ထမင်းလုံးတ​စ္ဆေ​ခြောက်တယ်၊ ဘီလူးစီးတယ်ဆိုတဲ့အရာ​တွေကို ကြားဖူးလား။ ဒီဇာတ်ကား​လေးထဲမှာက​​​တော့ အင်ဒိုနီးရှားဒဏ္ဍာရီလာ ဘူနိုဆိုတဲ့ ဂျင်သရဲ​ခြောက်ခံရတဲ့အ​ကြောင်းအရာကို ဇာတ်လမ်းဆင်ရိုက်ကူးထားပါတယ်။ ဘူနိုဆိုတာက လူသား​တွေနဲ့ အိမ်မက်ထဲမှာ လိင်ဆက်ဆံတတ်တဲ့ နတ်ဆိုးဖြစ်ပါတယ်။ ယုံကြည်သက်ဝင်မှုအားနည်းတဲ့ မိန်းက​လေး​တွေ၊ အထီးကျန်​နေတဲ့မိန်းက​လေး​တွေကို အဓိကပစ်မှတ်ထားတိုက်ခိုက်တတ်သူပါ။ ဒီလိုနတ်ဆိုးကို စ​နောက်ပြီးဆင့်​ခေါ်ခဲ့မိရာက ဖြစ်ရပ်ဆိုး​တွေ ​တွေ့ကြုံရပုံကို စိတ်​ခြောက်ခြားဖွယ်ဇာတ်ကွက်များနဲ့အတူ ခံစားကြည့်ရှူရမယ့် အင်ဒိုနီးရှား​ဟော်ရာကား​​လေး ဖြစ်ပါတယ်။ ဒီဇာတ်ကားကိုအညွန်းနဲ့ဘာသာပြန်ပေးသူကတော့ Brandon ဖြစ်ပါတယ်

အိုင်ပီအက်စ်အရာရှိဟောင်း ဗိုင်ဂျာယန်သီမှာ အာဂျွန်ဆိုတဲ့သားတစ်ယောက်မွေးလာတယ်။ အာဂျွန်ကလည်း သူ့အမေလိုအိုင်ပီအက်စ်တစ်ယောက်ဖြစ်ဖို့ ကြိုးစားခဲ့ပေမဲ့ ရာဇဝတ်သားတွေကို ကိုယ့်နည်းကိုယ်ဟန်တဲ့ရှင်းပစ်တတ်တဲ့ ဂိုဏ်းစတားတစ်ယောက်ဖြစ်လာတယ်။ ရဲအလုပ်ကိုဝင်ပါလို့ဆိုပြီး မကျေနပ်တဲ့ကော်မစ်ရှင်နာအသစ်က အာဂျွန်အခုလိုက်နေတဲ့ မူးယစ်ဆေးဂိုဏ်းကိုမိရင် အပြစ်ဝန်ခံပြီး သူတို့အလုပ်ကိုဝင်မစွက်ဖက်ဖို့ပြောတာနဲ့ အာဂျွန်လည်းသဘောတူလိုက်တယ်။ လူဆိုးတွေကိုပညာပေးတဲ့သူဆိုပေမဲ့ ရာဇဝတ်မှုတွေကျူးလွန်နေရတာမို့လို့ အာဂျွန့်အမေ ဗိုင်ဂျာယန်သီက လက်မခံနိုင်ဘူးဖြစ်နေတယ်။ တစ်နေ့ ဗိုင်ဂျာယန်သီ့ကိုလက်စားချေဖို့ ပါတန်ရောက်လာချိန်မှာ မာမားဘွိုင်းလေးအာဂျွန်သူ့အမေကိုကယ်ဖို့ ကြိုးစားရပါတော့တယ်။ ဒီဇာတ်ကားကိုအညွန်းနဲ့ဘာသာပြန်ပေးသူကတော့ Bex ဖြစ်ပါတယ်

ရုပ်ရှင်ရူး ဗက်ဟန်တစ်ယောက်က ဇာတ်ညွှန်းရေးဆရာဒါရိုက်တာတစ်ယောက်ဖြစ်ချင်ခဲ့ပြီး သူရေးထားတဲ့ဇာတ်ညွှန်းကို ထုတ်လုပ်သူက အကြိမ်ကြိမ်အခါခါပြင်နေတဲ့အတွက် သဘောမကျခဲ့ပါဘူး။ ရိုက်ကွင်းမှာမတော်တဆမှားယွင်းမှုဖြစ်သွားပြီ ဒါရိုက်တာနဲ့ထုတ်လုပ်သူက သူ့ကိုလက်မခံတဲ့အချိန်မှာတော့ သူ့ကိုယ်ပိုင်ငွေနဲ့ ရုပ်ရှင်ထုတ်လုပ်ဖို့စိတ်ကူးပါတော့တယ်။ "ငွေရှိချင်ရင် ဘဏ်ကိုဓားပြတိုက်ပေါ့"ဆိုတဲ့သူငယ်ချင်းဖြစ်သူရဲ့စကားအတိုင်း ဘဏ်ကငွေတွေကို လိုဏ်ခေါင်းတူးဖောက်ထွင်းယူဖို့ကြိုးစားပြီး ရုပ်ရှင်ရိုက်ဖို့ကြံစည်ပါတော့တယ်။ လိုဏ်ခေါင်းတူးရင်းမထင်မှတ်တဲ့ ကြောက်စရာလျှို့ဝှက်ချက်ကြီးကို သိလိုက်ရချိန်မှာတော့ ဘာတွေဆက်ဖြစ်မလဲဆိုတာကို စောင့်ကြည့်ရမယ့် Rating 6.8/10 အိန္ဒိယ ဟာသဒရမ်မာ ဇာတ်ကားကောင်းတစ်ကားပဲဖြစ်ပါတယ်။ ဒီဇာတ်ကားကိုအညွန်းနဲ့ဘာသာပြန်ပေးသူကတော့ Phyu Sin Pwint ဖြစ်ပါတယ်

ကယ်ရာလာမြို့မှာ လူတွေဆက်တိုက်အသတ်ခံနေရတယ်။ အသတ်ခံရတဲ့လူတွေက သက်ကြီးရွယ်အိုတွေချည်းပဲ။ သူတို့အလောင်းကိုရှာတွေ့တဲ့အချိန် သူတို့ပါးစပ်မှာငှက်ပျောသီးတစ်လုံးစီ စို့ထားတာကိုတွေ့ရတတ်တယ်။ အဲဒီလိုနဲ့ ကယ်ရာလာက ငှက်ပျောသီးကွင်းဆက်လူသတ်မှုကနာမည်ကြီးလာတယ်။ အဲဒါနဲ့ရဲတွေလည်း ကွင်းဆက်လူသတ်သမားကို အသည်းသန်ရှာရတော့တယ်။ ကွင်းဆက်လူသတ်သမားရဲ့ စိတ်ကိုနားလည်ဖို့ ကျွမ်းကျင်စိတ်ရောဂါပညာရှင်တွေနဲ့ပါ ဆွေးနွေးတိုင်ပင်ကြတယ်။ တစ်ဘက်မှာလည်း တစ်မြို့လုံးကိုဒုက္ခပေးလေ့ရှိတဲ့ အူမေ့ရှ်ကို ရဲတွေမသင်္ကာဖြစ်လာကြတယ်။ အဲဒီအချိန်လူသတ်သမားကလည်း အဘိုးကြီးတစ်ယောက်ကိုသတ်ဖို့ကြံစည်နေပြီ။ အူမေ့ရှ်မှာ ဂျက်ဆီဆိုတဲ့ကောင်မလေးရှိပြီး သူတို့ဆက်ဆံရေးက ပျက်စီးသွားတာမကြာသေးဘူး။ တစ်နေ့ အူမေ့ရှ်ရယ်၊ ဂျက်ဆီရယ်၊ ကွင်းဆက်လူသတ်သမားရယ်၊ နောက်ထပ်ပစ်မှတ်ဖြစ်မယ့်အဖိုးကြီးရယ်၊ ကားသမားနဲ့စပယ်ယာရယ် ဘတ်စ်ကားတစ်စီးပေါ်မှာ ပိတ်မိသွားကြပြီး ဘယ်လိုတွေဆက်ဖြစ်မလဲဆိုတာတော့ ဒီအိန္ဒိယဟာသကားလေးထဲမှာ ဆက်လက်စောင့်ကြည့်ပေးကြပါဦး။ ဒီဇာတ်ကားကိုအညွန်းနဲ့ဘာသာပြန်ပေးသူကတော့ Bex ဖြစ်ပါတယ်

အသစ်စက်စက် အိန္ဒိယဟော်ရာကားကောင်းလေးနဲ့မိတ်ဆက်ပေးချင်ပါတယ်။ အိုဒယ်လာဆိုတဲ့ရွာမှာ မင်္ဂလာပွဲမတိုင်ခင်ညမှာ သတို့သမီးတွေကိုပြန်ပေးဆွဲပြီး အဓမ္မပြုကျင့်တတ်တဲ့ တီရူပါသီဆိုတဲ့ လူတစ်ယောက်ရှိပါတယ်။ သူ့လုပ်ရပ်တွေကဆိုးရွားလာတော့ သူ့မိန်းမကိုယ်တိုင်ပဲ သူ့ကိုခေါင်းဖြတ်သတ်လိုက်တယ်။ တီရူပါသီကြောင့် ရွာတစ်ခုလုံးဒုက္ခရောက်ခဲ့ရတော့ ရွာသူကြီးပုဏ္ဏားကြီးတို့ဦးဆောင်ပြီး တီရူပါသီ့ဝိဉာဉ်ကို အရက်စက်ဆုံးနည်းနဲ့ပြစ်ဒဏ်ပေးဖို့ တစ်ရွာလုံးကအစီရင်တွေလုပ်ကြတယ်။ ဒါပေမဲ့အပြစ်ပေးခံရတဲ့ တီရူပါသီပြန်လွတ်မြောက်လာပြီးတော့ တစ်ရွာလုံးကိုလက်စားပြန်ချေပါတော့တယ်။ ဒီဇာတ်ကားကိုအညွန်းနဲ့ဘာသာပြန်ပေးသူကတော့ Bex ဖြစ်ပါတယ်

"Nonna"ဆိုတာ အီတလီလို အဘွားလို့ အဓိပ္ပါယ်ရပြီး မိခင်ကွယ်လွန်ပြီးတော့ အမှတ်တရအဖြစ် ဘွားဘွားတွေနဲ့ အီတလီစားသောက်ဆိုင်ဖွင့်ဖို့ ကြိုးပမ်းတဲ့ ဂျိုးရဲ့စိန်ခေါ်မှုတွေကို တင်ဆက်ထားပါတယ်။ ဂျိုးက မက္ကင်းနစ်တစ်ယောက်ဖြစ်ပြီး သူ့အမေဆုံးသွားပြီးနောက်ပိုင်း ပူဆွေးနေရာကနေ မိခင်နဲ့အဘွားကို ဂုဏ်ပြုတဲ့အနေနဲ့ စားသောက်ဆိုင်ဖွင့်ဖို့ အကြံရခဲ့ပါတယ်။ ဂျိုးစိတ်ကူးက သူ့ဆိုင်ကိုလာတဲ့ ဧည့်သည်တွေကို အိမ်ချက်လက်ရာအတိုင်း ချက်ပြုတ်ပေးပြီး မိသားစုလိုမျိုး နွေးထွေးမှုရစေချင်တာပါ။ ဒီလိုနဲ့ သူ့အမေရဲ့အသိအကျွမ်း ဘွားဘွားတွေကိုစည်းရုံးပြီး ဆိုင်ဖွင့်ဖို့ လုံးပန်းပါတယ်။ ဂျိုးရဲ့အချစ်ဆုံးသူငယ်ချင်းကလည်း တတ်အားသရွေ့ ကူညီပါတယ်။ ဒါမဲ့ ကောက်ကာငင်ကာ ထလုပ်တာဖြစ်ပြီး ကိုယ်မကျွမ်းကျင်တဲ့ အပိုင်းဆိုတော့ အထစ်အငေါ့လေးတွေ ရှိတာပေါ့လေ။ နောက်ဆုံးမှာ အောင်မြင်တဲ့ အီတလီစားသောက်ဆိုင်လေး ဖြစ်လာပြီး အချစ်ကိုပါ တွေ့သွားတဲ့ဂျိုးအဖြစ် မြင်ရမှာပါ။ အဓိကအားဖြင့် ရိုးရာအမွေအနှစ်တွေ ဓလေ့ထုံးစံတွေကို ထိန်းသိမ်းသင့်ကြောင်း တိုက်တွန်းထားတာဖြစ်ပြီး မိသားစုနဲ့အတူ ကြည့်ဖို့ သင့်တော်ပါတယ်။ ဒီဇာတ်ကားကိုအညွန်းနဲ့ဘာသာပြန်ပေးသူကတော့ Shune Lai KK ဖြစ်ပါတယ်

နဂါးနီလို့နာမည်ကြီးခဲ့ပြီး လူတိုင်းရှိန်ခဲ့တဲ့ဂန်းစတားအေကေက မိသားစုအတွက် ဂန်းစတားဘဝကိုလက်လျှော့ပြီး ထောင်ထဲဝင်ခဲ့ပါတယ်။ သူ့မှာ ဗီဟန်ဆိုတဲ့သားတစ်ယောက်ရှိပြီး သူ့သား ၁၈နှစ်ပြည့်မွေးနေ့မှာ ပြန်လာခဲ့မယ်လို့ကတိပေးခဲ့တယ်။ ဗီဟန် ၁၈နှစ်ပြည့်မွေးနေ့မတိုင်ခင်မှာ အေကေထောင်ကလွတ်လာပြီးတော့ အေကေနဲ့သူ့မိန်းမရာမယာတို့ စပိန်ကိုလိုက်သွားဖို့ပြင်တဲ့အချိန်မှာ သူတို့သားဗီဟန်ပြန်ပေးဆွဲခံလိုက်ရတယ်။ စပိန်ကိုရောက်တဲ့အခါမှာ ဗီဟန့်ကိုဆေးမှုနဲ့ဖမ်းထားတဲ့အကြောင်းသိလိုက်ရပြီး သက်သေလည်းလက်ပူးလက်ကြပ်မိထားတာမို့လို့ ထောင်ဒဏ်အများကြီးကျတော့မလိုဖြစ်နေပါတယ်။ အဲဒါနဲ့အေကေလည်း သူ့သားကိုဒီလိုထောင်ခြောက်တွေဆင်တာ သူနဲ့ရန်ငြှိုးရှိခဲ့လို့ဖြစ်နိုင်တယ်ဆိုပြီး အရင်ဂန်းစတားဘဝကို ပြန်သွားပြီးတော့ သူ့ကိုသူကိုယ်တိုင်ရအောင်ကယ်တင်ဖို့ကြိုးစားပါတော့တယ်။ ဒီဇာတ်ကားကိုအညွန်းနဲ့ဘာသာပြန်ပေးသူကတော့ Bex ‌ဖြစ်ပါတယ်

Netflix က စပိန်အချစ်ကားလေးတွေကို ကြည့်ရတာကြိုက်နှစ်သက်တဲ့လူတွေအဖို့ ဒီရုပ်ရှင်လေးကိုလည်း သဘောကျလိမ့်မယ်လို့ မျှော်လင့်ပါတယ်။ မင်းသား မင်းသမီးတွေလည်း ငယ်ငယ်ချောချောနဲ့ အချစ်ဇာတ်လမ်းလည်းဟုတ်သလို၊ Mystery ဆန်ဆန် ဇာတ်အချိုးအကွေ့လေးတွေလည်းပါတယ်။ ‘ဧရိုစ်’က လူငယ်ထောင်ထွက်တစ်ယောက်၊ သူ့ကိုထောင်ကနေ ထုတ်ပေးလာသူ၊ ကျိကျိတက်ချမ်းသာတဲ့စီးပွားရေးလုပ်ငန်းရှင် ‘ဘရုစ်’ မှာ ‘ရိစ်’ ဆိုတဲ့ သမီးငယ်လေးတစ်ယောက် ရှိတယ်။ ရိစ်ကို လူတစ်ယောက်က နောက်ယောင်ခံလိုက်ပြီး ခြိမ်းခြောက်စာတွေပို့တယ်၊ မတော်မလျော်ပုံတွေ ပို့တယ်ပေါ့။ ဒီတော့ ဘရုစ်က သူ့သမီးကို ကာကွယ်ပေးဖို့ဆိုပြီး ဧရိုစ်ကို ကိုယ်ရံတော်သဘောငှားလိုက်တာ။ အသက်ကလေးက မတိမ်းမယိမ်းကို ကိုယ်ရံတော်လုပ်ပြီး စောင့်ရှောက်ခိုင်းလိုက်တော့ ဧရိုစ်တစ်ယောက် အလုပ်တာဝန်တွေထက် ပိုပြီးကို စောင့်ရှောက်ချင်စိတ်တွေ ဖြစ်လာတာပေါ့။ ရိစ်ကလည်း သူဌေးသမီးနုနုထွတ်ထွတ်ကို ဒီလို ဂျစ်ကန်ကန် မိုက်တိမိုက်ကန်းလေးကို မမြင်ဖူးတော့ စိတ်ဝင်စားသွားရော။ ဒါပေမဲ့ ရိစ်ကို နောက်ယောင်ခံလိုက်ပြီး နှောင့်ယှက်နေသူက ပိုမိုရဲတင်းလာတဲ့အခါ....။ အညွှန်းနဲ့ ဘာသာပြန်ကတော့ LYKZ ဖြစ်ပါတယ်။

လူဆိုးအယောက်တစ်ရာနဲ့ချလည်း မင်းသားပဲနိုင်စေချင်တဲ့လူတွေအတွက် Action Drama အသစ်နဲ့ မိတ်ဆက်ပေးမယ် ဇာတ်လမ်းနာမည်က "Vaamana 2025" ဂူနာက မာဖီယားဂိုဏ်းချုပ်ရဲ့ လက်ရုံးတစ်ယောက် လူသူသိပ်မသိပေမဲ့ ပြိုင်ဘက်ဂိုဏ်းရဲ့တပည့်တွေကို တဖြည်းဖြည်းရှင်းပစ်နိုင်လို့ ပြိုင်ဘက်ခေါင်းဆောင်က သတိထားမိလာတယ် ဂူနာက လူဆိုးဆိုပေမဲ့ မကောင်းတဲ့လူတွေကိုရှင်းပစ်ပြီး ကောင်းတဲ့အလုပ်လုပ်တယ် မှန်ကန်တယ် တရားမျှတတယ် ဒီလိုနဲ့ ပြိုင်ဘက်ဂိုဏ်းချုပ်ကို ရှင်းပစ်နိုင်သည်အထိ ဖြစ်လာတဲ့အခါ သာမာန်လူဆိုးတစ်ယောက်မဟုတ်ဘဲ ဂူနာ့ရဲ့နောက်ကြောင်းတွေပေါ်လာခဲ့တယ် သူကတကယ်တမ်းဘယ်သူလဲ? ဘယ်အကြောင်းတွေက ဒီလောကထဲကိုရောက်လာစေတာလဲ? Plot တွေအရမ်းဆန်းသစ်နေတာမျိုးမဟုတ်ပေမဲ့ တဖြည်းဖြည်း ဇာတ်ရှိန်တက်ပြီး ကြည့်ကောင်းတာတာမို့ အပန်းပြေ Movie time အတွက်တော့ Recommend ပေးပါတယ် ဒီဇာတ်ကားကိုအညွန်းနဲ့ဘာသာပြန်ပေးသူကတော့ Ki Ki Chit Su ဖြစ်ပါတယ်

ဗီဒယာဆိုတဲ့ နာမည်ကြီးမင်းသမီးတစ်ဦးက အထီးကျန်လွန်းတဲ့ဘဝမှာ သူမအတွက်အကာအကွယ်ပေးနိုင်မယ့်ချစ်သူဖြစ်သူနဲ့ လက်ထပ်လိုက်ပါတယ်။ မင်းသမီးယောကျာ်းဖြစ်လာချိန်မှာတော့ ချစ်သူမဖြစ်ခင်က အယောင်ဆောင်ဘဝက မျက်နှာဖုံးကွာကျသွားခဲ့ပြီး ငွေအတွက်ကလွဲကျန်တာမကြည့်တတ်တဲ့ သရဲဘောကြောင်သူတစ်ယောက်ဖြစ်လို့နေပါတယ်။ လူမိုက်အုပ်စုနဲ့တွေ့ပြီး မင်းသမီးရဲ့ ဂုဏ်သိက္ခာကို ထိပါးလာတဲ့အချိန် ဘာမှအကာအကွယ်မပေးနိုင်တဲ့ယောကျာ်းဖြစ်သူအကြောင်းကိုသိသွားတဲ့အခါမှာ အိမ်ပေါ်က နှင်ချလိုက်ပါတော့တယ်။ ဗီဒယာရဲ့ယောကျာ်း ကရော ဘယ်လိုမျိုး သူ့ကိုပြန်ယုံကြည်လာအောင် ကြိုးစားမလဲဆိုတာကို စောင့်ကြည့်ရမယ့် အိန္ဒိယ အက်ရှင်လက်စားချေဟာသဇာတ်ကားကောင်းလေးဖြစ်ပြီး နိုင်ငံတကာမှာလည်း Rating 6.3/10 အထိ ရရှိထားတဲ့ ဇာတ်ကားလေးဖြစ်လို့ လက်မလွတ်တမ်းကြည့်ရှုသင့်ပါတယ်။ ဒီဇာတ်ကားကိုအညွန်းနဲ့ဘာသာပြန်ပေးသူကတော့ Phyu Sin Pwint ဖြစ်ပါတယ်

Warfare ရုပ်ရှင်ဟာ 2006 ခုနှစ် အီရတ်စစ်ပွဲအတွင်းက အမေရိကန် Navy Seal တပ်ဖွဲ့ရဲ့ စစ်ရေးအမှတ်တရ ဖြစ်ရပ်မှန် အတွေ့အကြုံတွေကို ရိုက်ကူးထားတာဖြစ်ပါတယ်။ 2006 ခုနှစ်၊ အီရတ်နိုင်ငံ Ramadi မြို့ထဲမှာ တိုက်ခိုက်ခံရပြီး အိမ်တစ်အိမ်ထဲမှာ ဒဏ်ရာရသူတွေနဲ့ပိတ်မိနေတဲ့ Navy Seal တပ်ဖွဲ့က အဖွဲ့သားတွေ ကယ်ထုတ်ဖို့နဲ့ ဘေးလွတ်ရာရွှေ့ဖို့ ဆက်သွယ်ကြိုးပမ်းရတာတွေကို တပ်ဖွဲ့ဝင်တွေရဲ့ မှတ်ဉာဏ်တွေအပေါ် အခြေခံ ရိုက်ကူးထားပါတယ်။ လက်ရှိတပ်ထဲမှာ တာဝန်ထမ်းဆောင်နေတဲ့ တပ်ဖွဲ့ဝင်တွေရှိတာကြောင့် Identity လျှို့ဝှက်ပေးဖို့ အဓိကဇာတ်ကောင် Ray နဲ့ Elliot တို့ကလွဲပြီး ရုပ်ရှင်ထဲက အဖွဲ့သားတွေရဲ့နာမည်တွေကို ပြောင်းပေးထားပါတယ်။ Rotten Tomatoes 92% နဲ့ IMDB Rating 7.8/10 ရထားပြီး စစ်သားတွေရဲ့ လက်တွေ့ဖြစ်ရပ်တွေကို ပေါ်လွင်အောင် ပုံဖော်ထားလို့ ဝေဖန်သူတွေ ချီးကျူးနေတဲ့ လက်ရာကောင်းလို့ ညွှန်းချင်ပါတယ်။ ဒီဇာတ်ကားကိုအညွန်းနဲ့ဘာသာပြန်ပေးသူကတော့ Shune Lai KK ဖြစ်ပါတယ်

ဒီတစ်ခေါက် ကျားဖြန့်ကားကတော့ ပေါ့ပေါ့ပါးပါးဟာသဆန်ဆန်လေးနဲ့ကြည့်ရမယ့် ကျားဖြန့်တွေကို ကတုံးပေါ်ထိပ်ကွက်မယ့်ကားပါ။ ရှေးယခင်ကတည်းက လိမ်လည်မှုတိုက်ဖျက်ရေးအဖွဲ့အစည်းကြီးတစ်ခုရှိပြီးတော့ ကိုယ့်ပိုင်နက်နဲ့ကိုယ် ကိုယ့်နည်းနဲ့ကိုယ် လူလိမ်တွေကိုဖမ်းဆီးကြ လိမ်လည်မှုတွေကို တိုက်ဖျက်ပေးကြတယ်။ အားလမ်တို့အဖွဲ့ဟာက ကျားဖြန့်‌တွေကိုကပ်ကာ နောက်ကွယ်က ကြိုးကိုင်သူကြီးတွေကို ဖမ်းဖို့ကြိုးစားနေကြတယ်။ သူတို့ကိုယ်တိုင်လူလိမ်တွေနဲ့ ပေါင်းလိမ်ကြပြီး ဆရာကြီးကိုဖမ်းရဖို့ စောင့်ဆိုင်းနေကြတယ်။ သူတို့ဖမ်းရမယ့်ဆရာကြီးက လွန်ခဲ့တဲ့ ၂၅ နှစ်ကတည်းက ပျောက်သွားပြီး ကိုယ်ရေးအချက်အလက်ပြောင်းကာ ထပ်ပြီးလိမ်လည်မှုကြီးတွေကိုကျူးလွန်နေသူဆိုတော့ ဘယ်လိုတွေဖော်ထုတ်ရှင်းလင်းကြမှာလဲ။ ဒီဇာတ်ကားကိုအညွန်းနဲ့ဘာသာပြန်ပေးသူကတော့ Su ဖြစ်ပါတယ်

မိန်းမလိုချင်တဲ့သားအဖနှစ်ယောက်ကြားက ဖြစ်ပေါ်လာတဲ့အလွဲများနဲ့ဖြေရှင်းပုံနည်းလမ်းအမှားတွေကို တင်ဆက်ပေးထားတဲ့ အချစ်ဟာသဇာတ်ကားလေးတစ်ကားပဲဖြစ်ပါတယ်။ ရာမာနာက ဇနီးဖြစ်သူ သေဆုံးသွားပြီးကထဲက သားဖြစ်သူ ကာရှာနာကို တစ်ဦးထဲပြုစုပျိုးထောင်ပေးခဲ့တာပါ။ သားဖြစ်သူအရွယ်ရောက်လာတော့ မိန်းမပေးစားဖို့ လိုက်ပြီးတောင်းရမ်းပေးပေမဲ့ သားအဖနှစ်ဦးထဲ ဖြစ်သလိုနေနေတဲ့ အိမ်ကို ဘယ်သမီးရှင်ကမှ သူတို့သမီးကို ထည့်မပေးလိုကြပါဘူး။ မိသားစုတစ်ခု ရရှိလာဖို့အချစ်ကိုရှာကြတဲ့အချိန်မှာ မထင်မှတ်ဘဲ သားအဖနှစ်ယောက်စလုံးက ချစ်သူကိုယ်စီ ရှာဖွေတွေ့ရှိသွားပါတယ်။ သူတို့ရှာတွေ့သွားတဲ့ချစ်သူတွေကြားက ပြဿနာတွေက ဘာတွေဖြစ်မလဲ။ ဒီပြဿနာတွေကို သားအဖနှစ်ယောက်ပေါင်းပြီး ဘယ်လို‌ဖြေရှင်းကြမလဲဆိုတာကို ဟာသနှောပြီး ရိုက်ကူးထားတဲ့ အိန္ဒိယတီလဂူစကားပြော ဇာတ်ကားကောင်း‌လေး တစ်ကားပဲဖြစ်ပါတယ်။ ဒီဇာတ်ကားကိုအညွန်းနဲ့ဘာသာပြန်ပေးသူကတော့ Phyu Sin Pwint ဖြစ်ပါတယ်

လီယိုဆိုတဲ့ကောင်လေးက သူ့ကောင်မလေးနဲ့လက်ထပ်ဖို့ပြင်ဆင်နေချိန်မှာ သူ့ရဲ့ကျန်ရှိနေတဲ့ တစ်ဦးတည်းသောမိသားစုဝင်ဖြစ်တဲ့ သူ့ဦးလေး အေဒန်နဲ့ပြန်ပြီး အဆင်ပြေအောင်လုပ်မယ်ဆိုတဲ့ရည်ရွယ်ချက်နဲ့ သူ့ဦးလေးအိမ်ကိုသွားကြပါတယ် ဒါပေမယ့် သူ့ရဲ့အဓိကရည်ရွယ်ချက်က အဲဒါမဟုတ်ပါဘူး သူ့ဦးလေး အေဒန်ရဲ့မိသားစုမှာလည်း ထူးခြားတဲ့ဇာတ်လမ်းလေးတွေရှိပါတယ် အေဒန်မှာသားတစ်ယောက်ရှိခဲ့ပေမယ့် သူ့သားမရှိတော့တဲ့နောက်ပိုင်း သူ့သားအနေနဲ့ စက်ရုပ်တစ်ခုတီထွင်ထားပါတယ် အဲဒီစက်ရုပ်ကို သူ့သားနာမည် ရော်ဘင်ဆိုတဲ့အတိုင်း နာမည်ပေးထားတာပါ တစ်နေ့မှာ မတော်တဆမှုကြောင့် အတိတ်မေ့သွားတဲ့ရော်ဘင်ရဲ့အိမ်ဖော် ဖရီယာက ရုတ်တရက်ပျောက်ဆုံးသွားပြီး ရဲတွေလာရောက်စုံစမ်းကြပါတယ် စုံစမ်းရင်း အမှုဖော်နိုင်ကြပါ့မလား တရားခံကိုရော ဖမ်းမိပါ့မလား လီယိုရော သူ့ဦးလေးရဲ့အိမ်ကိုလာတဲ့သူ့ရည်ရွယ်ချက် အောင်မြင်ပါ့မလားဆိုတာကို သည်းထိပ်ရင်ဖိုဇာတ်လမ်းဖြစ်တဲ့အတွက် ရင်တလှပ်လှပ်နဲ့ကြည့်ရှုရမှာပဲဖြစ်ပါတယ် ဒီဇာတ်ကားကိုအညွန်းနဲ့ဘာသာပြန်ပေးသူကတော့ Yuri ဖြစ်ပါတယ်

ဒီတစ်ခေါက်မှာ "Crazxy 2025" ဆိုတဲ့ Movie နဲ့မိတ်ဆက်ပေးပါမယ် 7/10 နီးပါးရထားတာဖြစ်တဲ့အတွက် Rating မြင့်တဲ့ကားလို့ပြောလို့ရပါတယ် သူ့ပုံစံက One day Survival Drama တွေလိုမျိုး တစ်ရက်တည်းမှာ ကြုံရတဲ့ပြဿနာတွေကနေ ဘယ်လိုရုန်းထွက်ရလဲဆိုတဲ့ ပုံစံပါ ဇာတ်လမ်းအကျဉ်းကတော့ ဒေါက်တာအဘီမန်နူဆွတ်က အရမ်းတော်တဲ့ခွဲစိတ်ဆရာဝန်တစ်ယောက် သူ့မှာ Down syndrome ရောဂါခံစားနေရတဲ့ သမီးတစ်ယောက်ရှိတယ် ဒီကလေးမလေးကို သူကအရမ်းမုန်းတယ် တစ်နေ့မှာ မတော်တဆ လူနာတစ်ဦးသေသွားတာကိုအကြောင်းပြုပြီး လျော်ကြေးပေးဖို့ဖြစ်လာတယ် ဒါကိုသွားပေးတဲ့ရက်မှာ သူ့သမီးကိုပြန်ပေးဆွဲခံလိုက်ရတယ် ဒီအခါမှာ သူ့ဘဝကိုရွေးမလား? သူမုန်းတဲ့ သူ့သမီးကိုရွေးမလား ? အစကတော့ ပေါ့ပေါ့ပါးပါးနဲ့ ပြီးမှ တဖြည်းဖြည်း ဇာတ်ရှိန်တက်ပြီး မွန်းကြပ်လာတာ အရမ်းမိုက်တယ် ထပ်တိုး Review ပေးချင်တာက OST တွေ အရမ်းကောင်းတယ် ဒီလောက်ဆို လုံးဝကြည့်သင့်တဲ့ဇာတ်ကားဖြစ်နေတာမို့ တင်ဆက်ပေးလိုက်ပါပြီ ဒီဇာတ်ကားကိုအညွန်းနဲ့ဘာသာပြန်ပေးသူကတော့ Ki Ki Chit Su ဖြစ်ပါတယ်

၁၉၇၂ ခုနှစ်က Riyoko Ikeda ရေးသားခဲ့သော နာမည်ကြီး မန်ဂါကို အခြေခံပြီးရိုက်ကူးထားတဲ့ ၁၈ ရာစုအလယ်ပိုင်း ပြင်သစ်နိုင်ငံတွင် ဖြစ်ပျက်ခဲ့တဲ့ ပြင်သစ်တော်လှန်ရေးကာလကို နောက်ခံထားပြီရိုက်ကူးထားတဲ့ ကားလေးဖြစ်ပါတယ်၊ ဇာတ်ကားထဲမှာတော့ ပန်းလေးနှစ်ပွင့်အဖြစ်တင်စားကာ ဖော်ပြထားတဲ့ ငယ်စဉ်ကတည်းကတော်ဝင်အစောင့်မျိုးရိုးကြောင့်‌ မိန်းကလေးဖြစ်ပေမယ့် ယောက်ျားလေးအဖြစ် လက်နက်ကိုင်တာဝန်ထမ်းဆောင်ရတဲ့ Oscar François de Jarjayes ၊ နှစ်နိုင်ငံမဟာမိတ်ကြောင့် ငယ်စဉ်ကတည်းက ပြင်သစ်ကိုထိမ်းမြားဖို့ရောက်ရှိလာရတဲ့ ဘုရင်မလောင်း Marie Antoinette အဲ့ဒီဇာတ်ကောင်နှစ်ခုကို အဓိကထားပြီး ပြင်သစ်နိုင်ငံတော်လှန်ရေး လူအတန်းအစားခွဲခြားမှု ဝတ္တရားကြားကဆန့်ကျင်မှုတွေ ဒါတွေကိုရိုက်ကူးထားတဲ့ဇာတ်လမ်းကောင်းလေးမလို့ လက်လွှတ်မခံကြည့်ရှုသင့်ပါတယ်။ ဒီဇာတ်ကားကိုအညွန်းနဲ့ဘာသာပြန်ပေးသူကတော့ Thansin ဖြစ်ပါတယ်

မင်းသား Anthony Mackie၊ Martin Lawrence နဲ့ Laurence Fishburne တို့အသံသရုပ်ဆောင်အဖြစ် ပါဝင်ပေးထားတဲ့ Comedy/ Adventure Animated Film အသစ်တစ်ခု တင်ဆက်ပေးချင်ပါတယ်။ ‘အက်ဒ်ဆင်’ဆိုတဲ့ အထက်တန်းကျောင်းသားလေးတစ်ယောက်က အားကစားဖိနပ်ဂါလာပွဲတစ်ခုကို လာရောက်ရင်း ကံစမ်းမဲပေါက်သွားပါတယ်။ သူကံစမ်းမဲပေါက်သွားတဲ့ဖိနပ်လေးက ဘက်စကက်ဘောသမားတွေ ခုန်တဲ့အခါမှာ ပိုမိုလွယ်ကူအောင်လို့ အထူးထုတ်လုပ်ထားတဲ့ Alchemy 24s ဆိုတဲ့ ဖိနပ်လေးပါ။ အားကစားဖိနပ်ဂါလာဆိုမှတော့ ဖိနပ်စုဆောင်းသူတွေလည်း လာကြပြီး အဲ့ထဲက တကယ့်ဘီးကြဲတစ်ယောက်က အက်ဒ်ဆင်မဲပေါက်သွားတဲ့ ဖိနပ်ကို အသေရရ အရှင်ရရလိုချင်နေသူ တစ်ဦးဖြစ်တယ်။ အက်ဒ်ဆင်က မရောင်းဘူးလို့ အပြတ်ငြင်းလိုက်တဲ့အတွက် အဲ့’စုဆောင်းသူ’က အက်ဒ်ဆင်ရဲ့ အိမ်အထိလိုက်ပြီး ဖိနပ်ခိုးပါတော့တယ်။ ဖြစ်ချင်တော့ ဖိနပ်လေးတွေက အသက်ဝင်နေတာဖြစ်ပြီး ‘မက်ဆင်း’လို့ခေါ်တဲ့ ဖိနပ်တစ်ခြမ်းက အက်ဒ်ဆင်နဲ့ နေချင်တယ်။ ‘တိုင်’လို့ ခေါ်တဲ့ နောက်တစ်ဖက်ကကျ စုဆောင်းသူရဲ့ လက်ထဲမှာ ဇိမ်နဲ့နေချင်တယ်။ ဒါပေမဲ့ စုဆောင်းသူက ဖိနပ်ခိုးပြီး အိမ်ပြန်လာတဲ့လမ်းမှာ တိုင်နဲ့ မက်ဆင်းရန်ဖြစ်ကြရင်း တိုင်က လမ်းတဝက်မှာတင် ပြုတ်ကျကျန်ခဲ့တော့တယ်။ ဒီတော့ ဖိနပ်လေး ၂ ဖက် အချင်းချင်းပြန်တွေ့ကြဖို့ ဘယ်လိုစွန့်စားခန်းတွေ ထွက်ကြရမလဲဆိုတာကတော့...။ အညွှန်းနဲ့ ဘာသာပြန်ကတော့ LYKZ ဖြစ်ပါတယ်။

ယောကျာ်းသေပြီး ကလေးတစ်ယောက်နဲ့ မုဆိုးမဖြစ်သွားတဲ့ ဗိုင်အိုလက်ဆိုတဲ့ အမျိုးသမီးက နှစ်တွေအများကြီးကြာပြီးမှ App က တစ်ဆင်တွေ့တဲ့ သူ့ဒိတ်နဲ့ စားသောက်ဆိုင်မှာချိန်းပြီး ညစာစားပါတယ်။ ဒါပေမဲ့ အဲဒီ ပထမဆုံးဒိတ်ကနေ ရင်တုန်စရာ အန္တရာယ်တွေ ပေါ်လာပြီး သက်စွန့်ဆံဖျား စွန့်စားခန်းကြီး ဖြစ်သွားတာ စိတ်ဝင်စားဖို့ကောင်းပါတယ်။ ဗိုင်အိုလက်နဲ့ ဒိတ်တဲ့ဟင်နရီက ရိုးသားအေးဆေးပြီး မြို့တော်ဝန်ရဲ့ ဓာတ်ပုံဆရာဖြစ်ပါတယ်။ သာသာယာယာဒိတ်မယ်ဆိုပြီး ချိန်းလိုက်ပေမယ့် ဗိုင်အိုလက်ဆိုင်ထဲရောက်လာတည်းက သူ့ဖုန်းထဲကို Airdrop ကနေ ပုံမှန်မဟုတ်တဲ့ စာတွေဝင်လာပြီး ခြိမ်းခြောက်နေပါတယ်။ အိမ်မှာကျန်ခဲ့တဲ့သားလေးရဲ့ အသက်နဲ့ပါ ခြိမ်းခြောက်လာတာမို့ ဒိတ်ပေါ်အာရုံမရောက်တော့ဘဲ ဆိုင်ထဲက ဘယ်သူ့လက်ချက်လဲဆိုတာ ဖော်ထုတ်ဖို့ ကြိုးစားရင်း ပိုကြီးမားတဲ့အမှုတွဲထဲ ပါသွားတဲ့အဖြစ်ကို ရှုစားရမှာပါ။ ဒီဇာတ်ကားကိုအညွန်းနဲ့ဘာသာပြန်ပေးသူကတော့ Shune Lai KK ဖြစ်ပါတယ်

မင်းသား Tom Hardy ရဲ့ အမိုက်စားအက်ရှင်ဇာတ်ကားသစ် ဖြစ်ပါတယ်။ ‘ပက်ထရစ်’ဆိုသူက နိုင်ငံရေးသမား အကောင်ကြီးကြီးတစ်ကောင်ရဲ့ အရှုပ်ထုတ်မှန်သမျှကို လိုက်ရှင်းပေးရတဲ့ အကျင့်ပျက်ရဲတစ်ယောက် ဖြစ်တယ်။ တစ်ရက်ကျ အဲ့ဘိုးတော်ရဲ့ သား ‘ချာလီ’က တရုတ်ဂိုဏ်းတစ်ဂိုဏ်းနဲ့ သွားပတ်သက်မိတယ်ပေါ့။ ဖြစ်ချင်တော့ သူ သွားလိုက်တဲ့နေ့မှာပဲ အဲ့မှာရှိတဲ့လူအားလုံးက အသတ်ခံလိုက်ရတယ်။ ပက်ထရစ်အပါအဝင် ရဲတွေရောက်လာကြတော့ စီစီတီဗွီမှာ ဘိုးတော်ရဲ့ သားပုံက အပြူးသားပါလာတယ်။ ဒီတော့ ဘိုးတော်က သူ့သားကိုကယ်ထုတ်ပေးဖို့ ပက်ထရစ်ကို တာဝန်ပေးတော့တာပေါ့။ တစ်ဖက်က တရုတ်ဂိုဏ်းမှာ အသတ်ခံလိုက်ရတာကကျ ဂိုဏ်းခေါင်းဆောင်ဘွားတော်ရဲ့ သားငယ်ဆိုတော့ ဘွားတော်ကရေလည်တင်းပြီး သတ်သွားတဲ့ကောင်ကို သူကိုယ်တိုင်သမမယ်၊ အကောင်ကြီးတာတွေ အမြီးရှည်တာတွေ ဂရုမစိုက်ဘူးဆိုပြီး ကမ္ဘာရဲ့တစ်ဖက်ခြမ်းထိ ရောက်အောင်လာတော့တာပဲ။ အဲ့ဘွားတော်ရဲ့ ဂိုဏ်းကလည်း ပက်ထရစ်လို အကျင့်ပျက်ရဲတွေကို ခါးကြားထိုးထားတာ။ ဒီတော့ ပက်ထရစ်တစ်ယောက် ချာလီကို အကျင့်ပျက်ရဲတွေရဲ့လက်ထဲကရော၊ ဂိုဏ်းတွေရဲ့ တိုက်ပွဲကြားထဲကရော ကယ်တင်ပေးနိုင်ပါ့မလား။ အညွှန်းနဲ့ ဘာသာပြန်ကတော့ LYKZ ဖြစ်ပါတယ်။

Survival Horror မျိုးကိုမှ တောအုပ်ထဲ ပြေးလွှားနေရတာမျိုး ရေအောက်မှာ မိုးပေါ်မှာ အသက်ရှင်ဖို့ ရုန်းကန်ရတာမျိုးမဟုတ်ဘဲ ကားတစ်စီးထဲမှာ ညှင်းဆဲခံရပြီး အပြင်ထွက်ရဖို့လုံးပန်းရတဲ့ ဇာတ်လမ်းဖြစ်ပါတယ်။ အက်ဒီဟာ မိန်းမဖြစ်သူနဲ့ကွဲနေပြီး သမီးလေးကို အလှည့်ကျ ကြည့်ရတဲ့ ပစ္စည်းပို့သမားတစ်ယောက်ပါ။ ဘဝတစ်လျှောက်လုံး လက်ကြောမတင်း ခင်ပွန်းကောင်း ဖခင်ကောင်းမဖြစ်ဘဲ လစ်ရင်လစ်သလို ခါးပိုက်နှိုက်လုပ်ပါသေးတယ်။ ဒီတစ်ခေါက်မှာတော့ အဖိုးတန် SUV ဇိမ်ခံကားကြီးကိုတွေ့ပြီး အလစ်သုတ်ဖို့ ကြံမိတာမှာ ဂြိုလ်ဆိုးဝင်တော့တာပါပဲ။ အဲကားကြီးက အက်ဒီဝင်လိုက်တာနဲ့ အကုန်လော့ကျသွားပြီး ပြန်ထွက်မရတော့ပါဘူး။ အသံလုံ ကျည်ကာမှန်တွေဖြစ်တဲ့အပြင် လျှပ်စစ်ဓာတ်တွေပါ လွှတ်ထားပါသေးတယ်။ ပြီးတော့ အဝေးက လူက ထိန်းချုပ်မောင်းနှင်နိုင်ပါတယ်။ အက်ဒီကို ဒီကားထဲ ပိတ်ထားတဲ့လူရဲ့ ရည်ရွယ်ချက်က ဘယ်လိုရှိမလဲ...ဘယ်လို အတွေးအခေါ်ဒဿနိကတွေနဲ့ ဒီလိုလုပ်ထားတာလဲဆိုတာ စိတ်ဝင်စားဖွယ် ဆက်ကြည့်ရမှာပါ။ ဒီဇာတ်ကားကိုအညွန်းနဲ့ဘာသာပြန်ပေးသူကတော့ Shune Lai KK ဖြစ်ပါတယ်

Alien ကားကိုမှ Psychological Horrorနဲ့ Space Sci-fi ပေါင်းစပ်ထားပြီး ကပ်ပါးလို ကူးစက်တာမျိုးပါ ထည့်ထားတော့ ရသမျိုးစုံကို တစ်ခါတည်း ခံစားရမှာပါ။ ရီယာနဲ့သူ့သူငယ်ချင်းအဖွဲ့သားတွေဟာ ကမ္ဘာမြေနဲ့ အသွင်အပြင်တူတဲ့ဂြိုလ်ပေါ်မှာ လူသားတွေ နေထိုင်လို့ရအောင် ပြောင်းလဲဖို့ မစ်ရှင်လုပ်နေပါတယ်။ ဒီဂြိုလ်ကိုလည်း Ash ဆိုပြီး နာမည်ပြောင်ပေးထားပါတယ်။ ဒီမစ်ရှင်အောင်မြင်ဖို့ ကမ္ဘာ‌မြေပေါ်က သူတို့ဘဝတွေနဲ့အရာအားလုံးကို စတေးထားရတာပေါ့။ ဒါမဲ့ သူတို့စခန်းအပြင်ထွက်ပြီး ဂြိုလ်ပေါ်မှာလေ့လာရင်း ဘာတွေဖြစ်ကုန်မှန်းမသိဘဲ ရီယာသတိရလာတဲ့အချိန်မှာ သူ့အဖွဲ့သားတွေ ရက်ရက်စက်စက် အသတ်ခံထားရတာကို တွေ့လိုက်ရပါတယ်။ ရီယာကိုယ်တိုင်ကလည်း ဖြစ်ခဲ့တာတွေကို အမှတ်မရဘဲ သူဘယ်သူလဲဆိုတာပါ မေ့နေတဲ့အခါ သူ့သူငယ်ချင်းတွေရဲ့ သေဆုံးမှုက ဘာကြောင့်လဲ...ဂြိုလ်ပေါ်မှာ တခြားသက်ရှိတွေ ရှိနေတာလား သိရဖို့ ကြိုးပမ်းရပါတော့တယ်။ အညွှန်းနဲ့ ဘာသာပြန်သူကတော့ Shune Lai KK ဖြစ်ပါတယ်။