သည်းထိတ်ရင်ဖိုကားများ

အစိုးရနဲ့ ကော်ပိုရေးရှင်းကြီးတွေက ပြည်သူတွေနဲ့ သဘာဝပတ်ဝန်းကျင်ထက် ကိုယ့်အကျိုးအမြတ်ကိုပဲ ရှေ့တန်းတင်နေတာကို မကျေနပ်တဲ့ လူငယ်တစ်စု ရှိပါတယ်။ နယ်ပယ်အသီးသီးက ဒီမင်းမဲ့ဝါဒီလူငယ်တွေ စုစည်းပြီး The East လို့ခေါ်တဲ့ မြေအောက်အဖွဲ့ကို ဖွဲ့ထားကြတယ်။ သူတို့က သဘာဝပတ်ဝန်းကျင်ကို ထိခိုက်စေတဲ့ လုပ်ငန်းကြီးတွေကို တန်ပြန်တိုက်ခိုက်နေကြတာပါ။ ပုဂ္ဂလိကထောက်လှမ်းရေးကုမ္ပဏီက အေးဂျင့် ဂျိန်းဟာ ဒီအဖွဲ့ကို စုံစမ်းဖော်ထုတ်ဖို့ တာဝန်ပေးခံရပါတယ်။ အရပ်ဝတ်နဲ့ လမ်းတွေပေါ်မှာ သတင်းလိုက်စုရင်း မြေအောက်လောကထဲ ဝင်ရောက်နေရာက မထင်မှတ်ဘဲ The East အဖွဲ့ထဲ ရောက်သွားတယ်။ အဖွဲ့သားတွေက ကော်ပိုရေးရှင်းတွေကို တိုက်ခိုက်တဲ့ လှုပ်ရှားမှုတွေကို “Jam” လို့ ခေါ်ကြပါတယ်။ အရေးကြီးတဲ့ Jam တွေမှာ ဂျိန်းပါ ပါဝင်လာရတဲ့အခါ သူ့အလုပ်နဲ့ ကိုယ်ပိုင်ဘဝကြား ဘယ်လိုရှေ့ဆက်ရမလဲဆိုတာ ဝေခွဲရခက်လာတယ်။ အဖွဲ့ခေါင်းဆောင်အဖြစ် Alexander Skarsgård ပါဝင်ထားပြီး Elliot Page ကတော့ အဖွဲ့ဝင်တစ်ယောက်အဖြစ် သရုပ်ဆောင်ထားပါတယ်။

Snag ဟာ ဩစတြေးလျလူမျိုး လုပ်ကြံသတ်ဖြတ်သူတစ်ယောက်ဖြစ်ပြီး မကောင်းမှုတွေနဲ့ ဝေးရာမှာ တစ်ယောက်တည်း သိုသိုသိပ်သိပ် ခြေရာဖျောက်နေပါတယ်။ တစ်နေ့တော့ မိတ်ဆွေဟောင်းတစ်ယောက်က သူရှိတဲ့နေရာကို ရောက်လာပြီး မထင်ထားတဲ့သတင်းတစ်ခု ပြောပြတယ်။ တစ်ချိန်က သူချစ်ခဲ့ပြီး သေဆုံးသွားပြီလို့ ထင်ထားတဲ့ မိန်းကလေးဟာ အသက်ရှင်နေသေးတယ်ဆိုတဲ့ သတင်းပါ။ ဒါပေမယ့် အဲဒီမိန်းကလေးကို Snag နဲ့ ရန်ငြိုးရှိဖူးသူက ဖမ်းဆီးထားတယ်။ သတင်းကြားလိုက်ရတဲ့ Snag ဟာ ခြေရာဖျောက်နေရာကနေ ထွက်လာပြီး ချစ်သူကို သွားကယ်ဖို့ ကြိုးစားပါတော့တယ်။

ခင်ပွန်းဖြစ်သူ Evan ဆုံးသွားပြီးနောက် ပူဆွေးနေတဲ့ Faye ဟာ သူ့ခင်ပွန်းနဲ့ ပုံစံတူတဲ့ အသွင်တုစက်ရုပ်တစ်ရုပ်ကို ဖန်တီးခဲ့ပါတယ်။ ဒါပေမယ့် ပုံစံတူနေရုံနဲ့ သူ့ခင်ပွန်းဖြစ်မလာတဲ့အတွက် အဲဒီစက်ရုပ်ကို ပြန်ပိတ်ပစ်ဖို့ စိတ်ကူးနေတယ်။ တစ်ဖက်မှာတော့ စက်ရုပ်တွေရဲ့ အခွင့်အရေးအတွက် သူတို့လွတ်မြောက်အောင် ကူညီနေတဲ့ Casey ကို စက်ရုပ်ထိန်းသိမ်းရေးအဖွဲ့ AICE က လိုက်ဖမ်းနေပါတယ်။ အဲဒီအဖွဲ့က အေးဂျင့် Kessler ဟာလည်း စက်ရုပ်တစ်ရုပ်ရဲ့ ပေါ့ဆမှုကြောင့် သူ့ကလေး သေဆုံးခဲ့ရတယ်ဆိုပြီး နာကျင်နေရသူပါ။ Casey နဲ့ အသွင်တု Evan တို့ တွေ့ဆုံမိတဲ့အခါ စက်ရုပ်တွေ လွတ်မြောက်ဖို့ ဘယ်လိုကြိုးစားကြမလဲ၊ Kessler ကရော သူတို့ကို ဖမ်းမိသွားမလားဆိုတာ ဆက်ဖြစ်လာပါတယ်။ AI စက်ရုပ်တွေအကြောင်း ရိုက်ထားတဲ့ ဒီသိပ္ပံစိတ်ကူးယဉ်ဇာတ်ကားမှာ စက်ရုပ်နဲ့ လူသားကြားက အချစ်ဇာတ်လမ်းကိုလည်း ထည့်ထားတယ်။ စက်ရုပ်တွေမှာ ခံစားမှုနဲ့ အချစ်ရှိနိုင်တာ၊ လူသားတွေနဲ့ အတူနေထိုင်နိုင်တာတွေကို အဲဒီဆက်ဆံရေးကနေ ပုံဖော်ထားပါတယ်။

၁၉၈၀ ခုနှစ်၊ နယ်သာလန်ဘုရင်မ ဘီယက်ထရစ်ရဲ့ နန်းတက်ပွဲမတိုင်ခင် ရက်ပိုင်းမှာ ဇာတ်လမ်းစထားပါတယ်။ ကျေးလက်ဒေသကနေ အမ်စတာဒမ်ကို ပြောင်းလာတဲ့ စုံထောက် ယူရီယန်နယ်ကော့ဟာ အဲဒီမြို့မှာ မွေးဖွားကြီးပြင်းပြီး လူလည်ကျတဲ့ စုံထောက် တိုနီမွန်တိုင်းနဲ့ တွဲလုပ်ရတယ်။ ယူရီယန်က မြို့ကိုရောက်ခါစမှာပဲ လူဆိုးလိုက်ဖမ်းရင်း လူသေအလောင်းတစ်လောင်းကို တွေ့သွားပါတယ်။ အဲဒီအလောင်းကနေ နန်းတက်ပွဲကို တိုက်ခိုက်လာနိုင်တဲ့ သဲလွန်စတွေ ရလာတော့ နှစ်ယောက်သား စုံစမ်းရပါတော့တယ်။ တိုက်ခိုက်ဖို့ ကြံစည်နေသူတွေက ဘယ်သူတွေလဲ၊ သူတို့မသိရသေးတာတွေ ဘာတွေရှိနေသေးလဲ၊ နန်းတက်ပွဲမတိုင်ခင် အချိန်မီ တားနိုင်ပါ့မလားဆိုတာတွေကို အဖြေရှာကြရမှာပါ။

လီယံနယ်ဆန် သရုပ်ဆောင်ထားတဲ့ Michael Collins ဟာ အိုင်ယာလန်လွတ်လပ်ရေးအတွက် ကြိုးပမ်းခဲ့သူ ခေါင်းဆောင် မိုက်ကယ်ကောလင်းစ်ရဲ့အကြောင်းကို ရိုက်ကူးထားတဲ့ အတ္ထုပ္ပတ္တိဇာတ်ကားပါ။ ဗြိတိသျှအုပ်ချုပ်မှုအောက်ကနေ လွတ်မြောက်ဖို့ ကြိုးစားကြတဲ့ကာလမှာ သူ့ရဲ့ တော်လှန်ရေးလှုပ်ရှားမှုတွေကို တွေ့ရပါတယ်။ မိုက်ကယ်ကောလင်းစ်ရဲ့ ထူးခြားချက်က ပုန်းအောင်းနေခြင်းမဟုတ်ဘဲ လူမြင်ကွင်းထဲမှာ နေရင်း သူဘယ်သူဆိုတာ မသိအောင် ထိန်းထားနိုင်တာပါ။ သူ့ကို ဆုကြေးထုတ်ထားတဲ့ကြားက ဒပ်ဘလင်မြို့ပေါ်မှာ ဝတ်စုံပြည့်နဲ့ စက်ဘီးကို အေးအေးဆေးဆေး စီးသွားနေတတ်တယ်။ ဗြိတိသျှတွေ စစ်ပြေငြိမ်းရေး ကမ်းလှမ်းတဲ့အချိန်အထိ သူ့အကြောင်း ဖုံးကွယ်ထားနိုင်ခဲ့ပုံကိုလည်း ဖော်ပြထားပါတယ်။ သူ့တော်လှန်ရေးလမ်းစဉ်မှာ ပျောက်ကျားစစ်ကို စတင်အသုံးပြုခဲ့ပုံ၊ အိုင်ယာလန်ကို လွတ်လပ်တဲ့ပြည်နယ်အဖြစ် ဖော်ဆောင်ပြီး ငြိမ်းချမ်းရေးရဖို့ လုပ်ဆောင်ခဲ့ပုံတို့ ပါဝင်ပါတယ်။ အဲဒီနိုင်ငံရေးကြိုးပမ်းမှုတွေရဲ့ နောက်ကွယ်က ရှုပ်ထွေးမှုတွေနဲ့ ပေးဆပ်ရတဲ့ အရင်းအနှီးတွေကိုပါ ပြထားပါတယ်။

မီးတောက်နေတဲ့ အရိုးခေါင်းနဲ့ ဆိုင်ကယ်စီးတဲ့ Marvel ဇာတ်ကောင် Ghost Rider တွေထဲမှာ ဂျော်နီဘလေ့ဇ်က ထင်ရှားသူတစ်ယောက်ပါ။ ၂၀၀၇ ခုနှစ်ထွက် ဒီဇာတ်ကားမှာ Nicolas Cage က ဂျော်နီအဖြစ် သရုပ်ဆောင်ထားပြီး သူ Ghost Rider ဖြစ်လာပုံကို အစကနေ ပြထားပါတယ်။ ကင်ဆာကြောင့် သေခါနီးဖြစ်နေတဲ့ အဖေကို ကယ်ဖို့ ဂျော်နီက ကိုယ့်ဝိညာဉ်ကို နတ်ဆိုးဆီ ရောင်းခဲ့တယ်။ နတ်ဆိုးက စာချုပ်အတိုင်း အဖေ့ရဲ့ကင်ဆာကို ကုပေးခဲ့ပေမယ့် ဂျော်နီမှာ နှောင်ကြိုးမရှိစေချင်တာကြောင့် အဖေ့ကို ချက်ချင်းပဲ သတ်ပစ်လိုက်ပါတယ်။ ပြီးတော့ လိုအပ်တဲ့အခါ ပြန်လာရှာမယ်လို့ ပြောပြီး ပျောက်သွားခဲ့တယ်။ အဖေ အချိန်မတိုင်ခင် သေဆုံးခဲ့ရတာ ကိုယ့်ကြောင့်လို့ ယူဆတဲ့ ဂျော်နီဟာ နောင်တနဲ့ ဆက်ရှင်သန်နေရပါတယ်။ သေသွားလည်း မထူးတော့ဘူးဆိုတဲ့ စိတ်နဲ့ အန္တရာယ်များတဲ့ စတန့်တွေ လုပ်ရင်း နာမည်ကြီးလာတယ်။ အရာရာ ပြန်အဆင်ပြေလာပြီလို့ ထင်ရတဲ့ တစ်နေ့မှာတော့ နတ်ဆိုးက သူ့ဆီ ပြန်ရောက်လာပါတယ်။

၂၀၀၇ ခုနှစ်က Ghost Rider ဇာတ်ကားရဲ့အဆက်မှာ ဂျော်နီဘလေ့ဇ်ဟာ အရင်တိုက်ပွဲအပြီး သူဘယ်သူဆိုတာ ပေါ်သွားလို့ အောင်မြင်ကျော်ကြားခဲ့တဲ့ဘဝကို ချန်ထားခဲ့ပါတယ်။ ဆိုင်ကယ်တစ်စီးနဲ့ နှစ်ပေါင်းများစွာ လေလွင့်သွားလာရင်း ကိုယ့်အထဲက နတ်ဆိုးကျိန်စာကို ဖြေနိုင်မယ့် နည်းလမ်းကိုလည်း ရှာနေခဲ့တယ်။ တစ်နေ့မှာ အရက်သောက်တတ်တဲ့ ဘုန်းတော်ကြီး မော်ရူက သူ့ဆီ ရောက်လာပြီး ကလေးတစ်ယောက်ကို ကယ်ပေးဖို့ အကူအညီတောင်းပါတယ်။ အလဲအလှယ်အနေနဲ့ ဂျော်နီရဲ့ကျိန်စာကို ဖြေပေးမယ်လို့ ဆိုတယ်။ ကယ်ရမယ့်ကလေးကတော့ ဂျော်နီနဲ့ စာချုပ်ချုပ်ပြီး လှည့်စားခဲ့တဲ့ နတ်ဆိုးရဲ့သား ဖြစ်နေပါတယ်။ အဲဒီကလေးဟာလည်း အပေးအယူတစ်ခုကြောင့် သဘာဝလွန်ပုံစံနဲ့ မွေးဖွားလာသူဖြစ်ပြီး နတ်ဆိုးရဲ့အစွမ်းတွေကို ပိုင်ဆိုင်ထားတယ်။ ဂျော်နီဟာ ကလေးကို ကယ်တင်ပေးရင်း ကိုယ့်ကိုယ်ကိုယ်လည်း ကျိန်စာကနေ လွတ်မြောက်အောင် ကြိုးစားရတော့မှာပါ။ Ghost Rider အဖြစ် Nicolas Cage နဲ့ မော်ရူအဖြစ် Idris Elba တို့ သရုပ်ဆောင်ထားပါတယ်။

ဂျေလို သရုပ်ဆောင်ထားတဲ့ မိခင်ဟာ အာဖဂန်နဲ့ အီရန်မှာ စနိုက်ပါအဖြစ် စစ်ဆင်ရေးတွေ လုပ်ခဲ့ဖူးသူပါ။ စစ်တပ်က ထွက်လာပြီးနောက် ကျူးဘားနဲ့ မက္ကဆီကိုက လူဆိုးဂိုဏ်းတွေနဲ့ ပတ်သက်မိခဲ့ပါတယ်။ ဇာတ်ကားတစ်လျှောက်မှာတော့ သူ့နာမည်ကို မဖော်ပြထားပါဘူး။ ကိုယ်ဝန်ရလာတဲ့အခါ သူက လူဆိုးဂိုဏ်းတွေအကြောင်း ရဲဆီ သတင်းပေးပြီး အဲဒီလောကကနေ ရုန်းထွက်ဖို့ ကြိုးစားခဲ့တယ်။ ဒါပေမယ့် အတိတ်က ရန်သူတွေဟာ လျှို့ဝှက်ထားတဲ့ သူ့သမီးကို ရန်ပြုလာကြပါတယ်။ သမီးကို ကာကွယ်ဖို့အတွက် ပုန်းအောင်းနေရာကနေ ပြန်ထွက်လာပြီး ရန်သူဟောင်းတွေကို ရင်ဆိုင်ရတော့တာပါ။ Niki Caro ရိုက်ကူးထားတဲ့ အက်ရှင်သည်းထိတ်ရင်ဖိုဇာတ်ကား ဖြစ်ပါတယ်။

လပ်ခ်နောင်းရဲတပ်ဖွဲ့က ရိုးသားတဲ့ ရဲအရာရှိ ဗစ်ကရမ်ဟာ လူဆိုးဂိုဏ်းသား ဗေဒါကို ရှာဖွေရှင်းလင်းဖို့ တာဝန်ယူထားပါတယ်။ ဒါပေမယ့် ဗေဒါက ရဲဆီ ကိုယ်တိုင်လာအဖမ်းခံပြီး ဗစ်ကရမ်ကို ဇာတ်လမ်းတွေ စပြောပြတဲ့အခါ အကောင်းနဲ့အဆိုးကို ခွဲခြားဖို့ မလွယ်တော့ပါဘူး။ ဗစ်ကရမ်က ကိုယ့်ကိုယ်ကိုယ် မျှတပြီး တရားနည်းလမ်းကျသူလို့ ယုံကြည်ထားပေမယ့် ဗေဒါကတော့ သူ့ရဲ့မှန်ကန်တယ်ဆိုတဲ့ ယုံကြည်ချက်ကို မေးခွန်းထုတ်လာတယ်။ ဗစ်ကရမ်ဟာ သူထင်ထားသလို တကယ်ပဲ တရားမျှတသူတစ်ယောက် ဖြစ်ရဲ့လား။

၁၉၅၉ ခုနှစ်မှာ ဒီယာလို့ဗ် ဦးဆောင်တဲ့ ရုရှားတောင်တက်သမား ကိုးယောက်ဟာ ရုရှားနိုင်ငံမြောက်ပိုင်းက ယူရယ်တောင်တွေဆီ စွန့်စားခရီးထွက်ခဲ့ကြပါတယ်။ နှစ်ပတ်အကြာမှာတော့ သူတို့စခန်းနဲ့ အနည်းငယ်လှမ်းတဲ့ နေရာတွေမှာ ကိုးယောက်လုံးကို ထူးဆန်းစွာ သေဆုံးလျက် တွေ့ခဲ့ရတယ်။ ဒီယာလို့ဗ်တောင်ကြားလမ်း မတော်တဆမှုလို့ ခေါ်ကြတဲ့ အဲဒီဖြစ်ရပ်မှန်ကို အခြေခံပြီး ဒီရုပ်ရှင်ကို စိတ်ကူးပုံဖော်ထားတာပါ။ ဇာတ်လမ်းထဲမှာ အော်ရီဂွန်တက္ကသိုလ်က ကျောင်းသားငါးယောက်ဟာ အဲဒီဖြစ်ရပ်ရဲ့အဖြေကို ရှာဖို့နဲ့ မှတ်တမ်းရိုက်ကူးဖို့ ယူရယ်တောင်တွေဆီ ထွက်လာကြပါတယ်။ ဒီယာလို့ဗ်တို့ သွားခဲ့တဲ့လမ်းအတိုင်း တောင်တက်လာကြပြီးနောက် သူတို့ငါးယောက်လည်း ပျောက်ဆုံးသွားကြောင်း သတင်းတွေ ထွက်လာတယ်။ သူတို့ ဘာတွေကြုံခဲ့ကြရတာလဲ။ တကယ်ရှိမရှိ မသိရတဲ့ နှင်းလူတွေကြောင့်လား၊ ဂြိုဟ်သားတွေကြောင့်လား၊ ပရလောကအင်အားတွေကြောင့်လား၊ ဒါမှမဟုတ် အစိုးရစစ်တပ်ရဲ့ လုပ်ရပ်တစ်ခုလား။ အဲဒီမေးခွန်းတွေကို သူတို့ ရိုက်ကူးထားတဲ့ ဗီဒီယိုမှတ်တမ်းပုံစံနဲ့ တင်ပြထားတဲ့ ထိတ်လန့်လျှို့ဝှက်ဆန်းကြယ် ဇာတ်လမ်းပါ။

အထက်တန်းနောက်ဆုံးနှစ် ကျောင်းသူနီကိုလက်ဟာ သူငယ်ချင်းဘရွတ် ပျောက်ဆုံးနေတဲ့အတွက် လူပျောက်ကြေညာစာတွေ လိုက်ကပ်ရင်း စိတ်ပူနေပါတယ်။ ဘရွတ်က ကိုယ်ဝန်ရှိနေသူဖြစ်ပြီး သူ့အနာဂတ်ကလည်း မရေရာသေးပါဘူး။ တစ်နေ့တော့ ဘရွတ်က နီကိုလက်ဆီ ဖုန်းဆက်လာတယ်။ သူ့နောက်ကို လူတစ်ယောက် လိုက်နေကြောင်းနဲ့ သူ့ကလေးကို ငွေပေးယူချင်သူတွေ ရှိနေကြောင်း ပြောလာပါတယ်။ နီကိုလက်လည်း ကူညီနိုင်ဖို့ တစ်နေရာမှာ ချိန်းလိုက်ပေမယ့် သူငယ်ချင်း ကားတိုက်ခံရပြီး သေဆုံးသွားတာကို မျက်မြင်တွေ့လိုက်ရတယ်။ ဒါဟာ မတော်တဆဖြစ်တာလား၊ တစ်ယောက်ယောက်က တမင်ကြံစည်ခဲ့တာလားဆိုတာ နီကိုလက် စုံစမ်းနေချိန်မှာ သူကိုယ်တိုင်လည်း မမျှော်လင့်ဘဲ ကိုယ်ဝန်ရှိနေမှန်း သိလာပါတယ်။ ကိုယ့်အနာဂတ်အတွက်တောင် ဘာမှမရေရာသေးတဲ့ နီကိုလက်ဟာ ကိုယ်ဝန်ဆောင်အမျိုးသမီးငယ်တွေကို ပစ်မှတ်ထားနေသူတွေဆီက လွတ်အောင် ရှောင်နိုင်ပါ့မလား။

ဝန်ဒိုနဲ့ မူဂယ်နီတို့ဟာ ချစ်သူတွေဖြစ်ပေမယ့် သူတို့ရဲ့မိသားစုနှစ်စုကတော့ အစဉ်အဆက် အားပြိုင်လာခဲ့ကြသူတွေပါ။ သူတို့နေထိုင်တဲ့ အာဖရိကန်နိုင်ငံ လွတ်လပ်ရေးရပြီးကတည်းက ရှိလာခဲ့တဲ့ မိသားစုနှစ်ဖက်ကြား အားပြိုင်မှုက အခုထိ မပြီးဆုံးသေးပါဘူး။ ဝန်ဒိုက ရှေးရိုးစွဲအယူအဆနဲ့ လူမျိုးစွဲမှုတွေကို ဆန့်ကျင်ပြီး ဇာတိမြေကောင်းစားဖို့ ကြိုးပမ်းနေတဲ့ အမတ်လောင်းတစ်ယောက်ရဲ့ မဲဆွယ်စည်းရုံးရေးမှာ ကူညီပေးနေတယ်။ ဒါပေမယ့် လူမျိုးစွဲ၊ ပါတီစွဲတွေကြောင့် အဲဒီအလုပ်က ချစ်သူနှစ်ယောက် ရှေ့ဆက်ဖို့အတွက် အဟန့်အတားဖြစ်လာပါတယ်။ သူတို့နှစ်ယောက်ဟာ အချစ်ရေးထဲ ဝင်ရောက်လာတဲ့ နိုင်ငံရေးနဲ့ လူမျိုးရေးပြဿနာတွေကို ဖြေရှင်းကြရတော့တယ်။ သူတို့ရဲ့အချစ်ရေးနဲ့အတူ နိုင်ငံရေးသမားတွေရဲ့ အကျင့်ပျက်ချစားမှု၊ လူမျိုးစွဲမှုတွေကြောင့် ပြည်သူတွေ နစ်နာရပုံကိုလည်း ဖော်ပြထားပါတယ်။ မဲအနိုင်ရဖို့ဆို ဘာမဆိုလုပ်ဖို့ အသင့်ရှိနေတဲ့ နိုင်ငံရေးသမားတွေရဲ့ လောဘကိုပါ တွေ့ရမှာပါ။

မက်ဒီဟာ မိခင်ဆုံးပြီးတဲ့နောက် ကောလိပ်ကလည်း ထွက်ထားသလို ငွေကြေးလည်း အဆင်မပြေတာကြောင့် အဒေါ်တို့ရဲ့အိမ်မှာ ခဏသွားနေပါတယ်။ အဒေါ်တို့လင်မယားက မြို့ထဲမှာနေတာမို့ ဒီအိမ်ကို သူ့အတွက် ခဏပေးနေလိုက်တာပါ။ အဒေါ်က အာဖရိကကို ခရီးခဏထွက်သွားပြီး အိမ်ပိုင်ရှင်ကတော့ အဒေါ်ရဲ့ခင်ပွန်း ဖြစ်နေတယ်။ အိမ်နီးချင်းမှာ ကယ်ဗင်ဆိုတဲ့ ရုပ်ချောချောကောင်လေးတစ်ယောက်လည်း ရှိတာကြောင့် မက်ဒီက နေရာသစ်မှာ ပျော်နေမိပါတယ်။ ဒါပေမဲ့ မကြာခင်မှာပဲ ထူးဆန်းတဲ့အဖြစ်တွေနဲ့ စကြုံလာရတယ်။ ဒီကိစ္စတွေက သူ့ဆီ ဘာကြောင့် ဖြစ်လာရတာလဲ၊ လူသတ်သမားလက်ထဲကနေ သူ လွတ်မြောက်နိုင်ပါ့မလား။ မက်ဒီအဖြစ် Emily Roslyn Villarreal ပါဝင်သရုပ်ဆောင်ထားပါတယ်။

အဲရစ်နဲ့ အန်ဒရူးတို့ဟာ ဝန်လင်ဆိုတဲ့ ကလေးမလေးကို မွေးစားထားပြီး ပျော်ပျော်ရွှင်ရွှင် နေထိုင်နေကြတဲ့ လိင်တူစုံတွဲပါ။ တစ်နေ့မှာ မိသားစုအတူ အားလပ်ရက်ခရီးထွက်ရင်း ရှုခင်းလှပြီး လူသူကင်းတဲ့နေရာက သစ်လုံးအိမ်လေးတစ်လုံးမှာ လာနေကြပါတယ်။ အဲဒီအိမ်ကို လူစိမ်းလေးယောက် ရောက်လာတဲ့အခါ သူတို့ရဲ့ အေးချမ်းတဲ့ခရီးက ပျက်စီးသွားတော့တယ်။ ရောက်လာသူတွေက ထူးဆန်းတဲ့လက်နက်တွေ ကိုယ်စီကိုင်ထားပြီး အဲရစ်တို့ကို ဖမ်းချုပ်လိုက်ကြတယ်။ သူတို့ရောက်လာရတဲ့ အကြောင်းပြချက်ကလည်း ထူးဆန်းနေသလို တောင်းဆိုလာတဲ့အရာတွေကလည်း ယုံနိုင်ဖို့ ခက်နေပါတယ်။ The Sixth Sense ကို ရိုက်ကူးခဲ့တဲ့ M. Night Shyamalan ရဲ့ ထိတ်လန့်ပဟေဠိဇာတ်ကားဖြစ်ပြီး ဘယ်အရာကို ယုံရမလဲဆိုတဲ့ သံသယတွေနဲ့ ဇာတ်လမ်းကို ဆက်သွားထားပါတယ်။ ဒေးဗစ် ဘာတစ်စတာကလည်း ဟာသဘက်မသွားတဲ့ လေးနက်တဲ့ဇာတ်ရုပ်နဲ့ ပါဝင်ထားတယ်။

အမန်ဒါဟာ ငယ်စဉ်က ရွေးချယ်မှုတွေကို ဖြတ်သန်းလာပြီး သမီးလေးတစ်ယောက်ကို တစ်ကိုယ်တည်း ရုန်းကန်ပြုစုလာရတဲ့ မိခင်ပါ။ မေတ္တာစစ်ကို ရှာဖွေခဲ့ပေမဲ့ အပေါ်ယံဆက်ဆံရေးတွေနဲ့ပဲ ကြုံခဲ့ရတယ်။ အဲဒီနောက် ဆိုရှယ်မီဒီယာကနေ သိကျွမ်းလာတဲ့ မိုက်ကယ့်အပေါ် မမျှော်လင့်ဘဲ တဖြည်းဖြည်း သံယောဇဉ်တွယ်လာခဲ့ပါတယ်။ တခြားနိုင်ငံမှာနေတဲ့ မိုက်ကယ့်ကို လူချင်းတွေ့နိုင်ဖို့ အခွင့်အရေးရလာတော့ နှစ်ယောက်သား တွေ့ဆုံဖြစ်ကြတယ်။ စတွေ့ချိန်မှာ အခက်အခဲ၊ အတားအဆီးတွေရှိပေမဲ့ နောက်တော့ အချင်းချင်း နားလည်မှုရလာကြပါတယ်။ အမန်ဒါကလည်း မိုက်ကယ့်ကို သူအကြာကြီးရှာနေခဲ့တဲ့ ဘဝလက်တွဲဖော်လို့ ယုံကြည်လာပြီး မျှော်မှန်းထားတဲ့ဘဝလေးကို ပိုင်ဆိုင်ရတော့မယ်လို့ စိတ်ကူးနေမိတယ်။ ဒါပေမဲ့ အဲဒီယုံကြည်မှုကြားမှာ မိုက်ကယ့်ရဲ့ စကားတွေနောက်ကွယ်က အမှန်တရားကို သူ မမြင်နိုင်တော့ပါဘူး။ အမန်ဒါ မျှော်လင့်ထားတဲ့ အချစ်နဲ့ဘဝက သူ့ဆီ တကယ်ရောက်လာမလား၊ တခြားအဖြစ်တစ်ခုကိုပဲ ရင်ဆိုင်ရမလား။

Selma ဟာ သူ့ကို နှိပ်စက်နေတဲ့ ရဲအရာရှိခင်ပွန်းကို သေနတ်နဲ့ပစ်ပြီး ထွက်ပြေးလာပါတယ်။ ခင်ပွန်းရဲ့ နောက်လိုက်နှစ်ယောက် လိုက်မမီခင် အစ်မဖြစ်သူ Maddy ရဲ့အိမ်မှာ ခဏခိုလှုံဖို့ သွားအကူအညီတောင်းခဲ့တယ်။ ဒါပေမဲ့ ညီအစ်မနှစ်ယောက်က အမေဆုံးပြီးကတည်းက ကွဲကွာနေကြပြီး စကားလည်း မပြောဖြစ်ကြတော့ပါဘူး။ နှစ်ယောက်ရဲ့ အကျင့်စရိုက်ကလည်း ဆန့်ကျင်ဘက်ပါ။ Selma က ပါတီတက်၊ ပစ္စည်းခိုးနဲ့ ဖြစ်သလိုနေခဲ့သူဖြစ်ပြီး Maddy ကတော့ စည်းကမ်းရှိရှိနဲ့ လူကြီးလူကောင်းဆန်ဆန် နေတတ်သူပါ။ အိမ်ထောင်ရေးမှာလည်း Maddy က ခင်ပွန်းကောင်းနဲ့ အေးအေးချမ်းချမ်းနေနိုင်ပေမဲ့ Selma ရဲ့ခင်ပွန်းက ရဲဖြစ်နေရုံတင်မက မူးယစ်ဆေးမှောင်ခိုဂိုဏ်းရဲ့ ခေါင်းဆောင်လည်းဖြစ်နေပြီး သူ့ကို အမြဲနှိပ်စက်နေခဲ့တာပါ။ Maddy က အစမှာ လက်မခံချင်ပေမဲ့ ညီမ အကူအညီလိုနေမှန်းသိလို့ ခဏနေခွင့်ပေးလိုက်တယ်။ အဲဒီအချိန်အထိ Selma ဘာလုပ်ပြီး ထွက်ပြေးလာတယ်ဆိုတာကိုတော့ သူ မသိသေးပါဘူး။ မကြာခင်မှာပဲ Selma နောက်ကိုလိုက်နေတဲ့ ရဲဆိုးတွေ အိမ်ထဲဖောက်ဝင်လာတာကြောင့် ဘာမှမသိတဲ့ Maddy ပါ ညီမနဲ့အတူ ထွက်ပြေးရတော့တယ်။ ညီအစ်မနှစ်ယောက်လုံး ဝရမ်းထုတ်ခံရပြီး သူတို့ရဲ့မျက်နှာတွေ သတင်းထဲမှာ ပျံ့နှံ့သွားတဲ့အခါ ပုန်းရှောင်ဖို့ ပိုခက်လာပါတယ်။ အချင်းချင်း မတည့်ကြပေမဲ့ အခုလို အကူအညီလိုနေတဲ့အချိန်မှာတော့ တစ်ယောက်ဘေးမှာ တစ်ယောက်ရှိပေးရင်း အတူရင်ဆိုင်ကြရတယ်။

အီသန်က လူချမ်းသာတွေရဲ့ ကလေးတွေကို စာသင်ပေးတဲ့ ကျူတာတစ်ယောက်ပါ။ ဆိုးတဲ့ကလေးတွေ ပါတတ်ပေမယ့် သူကတော့ စာသင်ရတာကို စိတ်ဝင်စားလာအောင်၊ ပညာရေးမှာ တိုးတက်လာအောင် သင်ပေးနိုင်လို့ နာမည်ရတယ်။ တစ်နေ့မှာ လစာအများကြီးပေးမယ့် စာသင်အလုပ်တစ်ခု ကမ်းလှမ်းလာပါတယ်။ အီသန်က ငွေကြေးအခက်အခဲရှိနေတာတော့ မဟုတ်ပေမယ့် ချစ်သူက ကလေးမွေးတော့မှာဆိုတော့ ဝင်ငွေပိုရတာကို သဘောကျတယ်။ ဒီလောက်လစာပေးရတဲ့ ကျောင်းသားဆိုတော့ စာညံ့ပြီး အားစိုက်သင်ပေးရမယ့်ကလေးလို့ သူက တွက်ထားပါတယ်။ ကလေးရဲ့အဖေကလည်း သူတို့အိမ်မှာ နေပြီး တစ်ပတ်အစမ်းသင်ကြည့်ဖို့ ခေါ်ထားတယ်။ ဒါပေမယ့် တကယ်သင်ကြည့်တော့ ဂျက်ဆန်ဆိုတဲ့ အဲဒီကလေးက သင်ပေးစရာ မလိုလောက်အောင်ကို တော်နေပါတယ်။ ဒါဆို အီသန်ကို လစာအများကြီးပေးပြီး ခေါ်ထားတာ ဘာကြောင့်လဲ။ ဂျက်ဆန်တို့မိသားစုက ငွေသိပ်ပေါနေလို့ပဲလား။ စာသွားသင်တဲ့ တစ်ပတ်အတွင်းမှာ ဂျက်ဆန်ဆီကရော အီသန်ဆီကပါ မူမမှန်တဲ့အရာတွေ ပေါ်လာတော့ ဘယ်သူက ဘာရည်ရွယ်ချက်နဲ့ ဘာတွေကြံစည်နေသလဲဆိုတာ မေးခွန်းထုတ်စရာ ဖြစ်လာပါတယ်။

ဂန်အင်းဆူဆိုတဲ့ ကောင်လေးက သရဲတွေကို မြင်နိုင်သူပါ။ သရဲတွေကလည်း သူ့ကိုတွေ့ရင် အကူအညီတောင်းချင်ကြတယ်။ မွေးရပ်မြေကို ပြန်လာပြီး ကျောင်းတက်တဲ့အခါမှာလည်း ထူးဆန်းတဲ့ အရိပ်အယောင်တွေ စတွေ့လာရပါတယ်။ နောက်တော့ ကျောင်းမှာ နာကြည်းချက်တွေရှိတဲ့ သရဲတစ်ကောင် ရှိနေပြီး အားလုံးကို သတ်ပစ်ချင်လောက်အောင် အငြိုးကြီးနေတာကို သိလာရတယ်။ နေ့ခင်းနဲ့မတူတဲ့ ညဘက်ကျောင်းထဲမှာ အဲဒီသရဲက လူတွေကို ရန်ရှာလာတော့ အင်းဆူအတွက်လည်း ရင်ဆိုင်စရာတွေ ဖြစ်လာပါတယ်။ သူနဲ့ သရဲကြားမှာ ဘယ်လိုပတ်သက်မှုရှိသလဲ၊ သရဲရဲ့အငြိုးတွေက ဒီထက် ပိုကြီးလာဦးမလားဆိုတဲ့ မေးခွန်းတွေနဲ့ ဆက်ထားတဲ့ ကျောင်းနောက်ခံ သရဲဇာတ်လမ်းပါ။ ၂၀၁၄ ခုနှစ်မှာ ထွက်ရှိခဲ့ပြီး Kang Ha Neul နဲ့ Kim So Eun တို့ အဓိကပါဝင်ထားပါတယ်။

ဘဲ့ဂျန်မီဟာ ငယ်ငယ်ကတည်းက ခါးပိုက်နှိုက်တဲ့အမေနဲ့အတူ လိုက်လုပ်လာခဲ့ပြီး နောက်တော့ ရဲတွေအလိုရှိတဲ့ ခါးပိုက်နှိုက်ဂိုဏ်းခေါင်းဆောင် ဖြစ်လာပါတယ်။ ဂျပန်နဲ့ ကိုရီးယားမှာ ကျင်လည်နေတဲ့ သူဟာ အိုဆာကာမှာ ပြဿနာတက်လို့ ရှောင်ပြေးလာရင်း ကိုရီးယားကို ရောက်လာခဲ့တယ်။ အဲဒီမှာ ဂိုဏ်းအမျိုးမျိုးကြား ဘာတွေကြုံရမလဲ၊ ဘယ်လိုလွတ်အောင် ရုန်းထွက်မလဲဆိုတာ ဆက်တွေ့ရမှာပါ။ ဘဲ့ဂျန်မီအဖြစ် Son Ye Jin က သရုပ်ဆောင်ထားပါတယ်။ တစ်ဖက်မှာတော့ အမှုစစ်ရာမှာ အလွန်တော်ပေမယ့် ခါးပိုက်နှိုက်အမှုဆို လုံးဝမလိုက်တဲ့ စစ်ဆေးရေးမှူး ဂျိုဒယ်ယောင်းရှိနေတယ်။ ဒီအမှုမျိုးတွေကို သူဘာကြောင့် ရှောင်နေတာလဲ၊ သူ့အတိတ်မှာ ဘာတွေဖြစ်ခဲ့သလဲဆိုတာ မေးစရာဖြစ်နေပါတယ်။ ဘဲ့ဂျန်မီနဲ့ ဂျိုဒယ်ယောင်းတို့ကြားမှာရော ဘယ်လိုဖြစ်ရပ်တွေ ရှိလာမလဲ။

ဆိုင် ပဲရစ်ရှ်ဟာ ဖလင်ကနေ ဓာတ်ပုံကူးပေးတဲ့အလုပ်ကို ကြာကြာလုပ်လာပြီး ကိုယ့်အလုပ်အပေါ် လေးစားမှုရှိတဲ့သူပါ။ သူကူးပေးတဲ့ ဓာတ်ပုံတစ်ပုံမှာ အရောင်နည်းနည်းလွဲနေရင်တောင် မကျေနပ်ဘဲ အပြည့်အဝကောင်းနေမှ လက်ခံတတ်တယ်။ ပုံမှန်လာနေကျ ဖောက်သည်တွေကိုလည်း စေတနာနဲ့ ဓာတ်ပုံကူးခ လျှော့ပေးတတ်ပါတယ်။ အဲဒီဖောက်သည်တွေထဲမှာ ဝီလီယံနဲ့ နီနာ ယော့ကင်တို့မိသားစုလည်း ပါတယ်။ သူတို့သားလေး ငယ်ငယ်ကနေ အသက်ကိုးနှစ်ပြည့်တဲ့အထိ ဓာတ်ပုံတွေကို ဆိုင်ကပဲ ကူးပေးခဲ့ရတာပါ။ တစ်ယောက်တည်းနေတဲ့ လူပျိုကြီး ဆိုင်ဟာ အချိန်ကြာလာတာနဲ့အမျှ ယော့ကင်တို့မိသားစုကို သံယောဇဉ်တွယ်လာခဲ့တယ်။ တစ်နေ့တော့ သူ့ဆီလာကူးခိုင်းတဲ့ ဓာတ်ပုံတွေထဲမှာ ဝီလီယံ ဖောက်ပြန်နေတဲ့ပုံတွေကို တွေ့လိုက်ရပါတယ်။ အဲဒီအချိန်မှာပဲ စာရင်းကွာဟမှုတွေကြောင့် မန်နေဂျာက ဆိုင်ကို အလုပ်ဖြုတ်လိုက်တယ်။ နီနာနဲ့ သားလေးကို ဝီလီယံရဲ့အကြောင်း သိအောင်လုပ်ပေးမယ်ဆိုရင် မိသားစုအပေါ် သံယောဇဉ်ကြီးနေတဲ့ ဆိုင်က ဘယ်လိုလုပ်ရပ်တွေ ကျူးလွန်မိနိုင်မလဲ။ Robin Williams က ဆိုင် ပဲရစ်ရှ်အဖြစ် ပါဝင်ထားတဲ့ စိတ်ပိုင်းဆိုင်ရာ သည်းထိတ်ရင်ဖိုဇာတ်ကားပါ။

Miranda Green ဟာ ပန်းရောင်းတဲ့အလုပ် လုပ်နေပေမယ့် စိတ်ဝင်စားတာက စုံထောက်ဇာတ်လမ်းတွေနဲ့ စွန့်စားခန်းတွေပါ။ Agatha Christie ရဲ့ အမာခံစာဖတ်ပရိသတ်တစ်ယောက်ဖြစ်ပြီး ထိတွေ့မှုတိုင်းမှာ ခြေရာကျန်တယ်ဆိုတဲ့ စကားကို လက်ကိုင်ထားသူလည်း ဖြစ်ပါတယ်။ အကဲခတ်တတ်ပြီး အကြောင်းအရာတွေကို ဆက်စပ်စဉ်းစားနိုင်တဲ့ Miranda အတွက် ရင်ခုန်စရာသိပ်မရှိတဲ့ ပန်းဆိုင်အလုပ်မှာ မပျော်ပိုက်လှဘူး။ Christie ရဲ့စာအုပ်တွေဖတ်ရင်းပဲ သူနှစ်သက်တဲ့ ပဟေဠိတွေနဲ့ အချိန်ကုန်နေခဲ့တာပါ။ တစ်နေ့မှာတော့ Louis Findley ဆိုတဲ့ သူဌေးကြီးနဲ့ တွေ့ဆုံဖို့ ကျွန်းတစ်ကျွန်းကို ဖိတ်ခေါ်ထားတဲ့စာ Miranda ဆီ ရောက်လာပါတယ်။ သူက ဒီဖိတ်ကြားမှုကို စာအုပ်တွေထဲကလို ကိုယ်တိုင် စူးစမ်းထောက်လှမ်းခွင့်ရမယ့် အခွင့်အရေးအဖြစ် မြင်ပြီး သွားဖို့ ဆုံးဖြတ်လိုက်တယ်။ ကျွန်းကိုသွားတဲ့လမ်းမှာ သူနဲ့ တစ်ခါမှမသိကျွမ်းဖူးတဲ့ လူငါးယောက်ကိုလည်း အတူဖိတ်ထားမှန်း သိလိုက်ရပါတယ်။ ဖိတ်တဲ့သူ Findley အကြောင်းကတော့ အထည်အလိပ်လုပ်ငန်းပိုင်ရှင် ဘီလီယံနာတစ်ယောက်ဆိုတာကလွဲလို့ သိရသမျှ နည်းလွန်းတယ်။ တစ်ယောက်တည်း နေရတာကို နှစ်သက်ပြီး ဓာတ်ပုံတောင် ရှာမတွေ့လောက်အောင် သိုသိပ်နေသူပါ။ သူတို့ခြောက်ယောက်ကို ဘာကြောင့် ရွေးဖိတ်ထားတာလဲ။ ကိုယ်တိုင်ဖိတ်ထားပေမယ့် ကျွန်းပေါ်ရောက်လာချိန်မှာ ဘာကြောင့် ထွက်မတွေ့ဘဲ ဝန်ထမ်းတွေနဲ့ပဲ လွှဲထားတာလဲ။ အခြားဧည့်သည်ငါးယောက်မှာရော ဘယ်လိုအကြံတွေ ရှိနေနိုင်သလဲဆိုတဲ့ မေးခွန်းတ

ပိုက်ဆံလိုနေတဲ့ Jackie ဟာ သူသိတဲ့ ဂိုဏ်းသမားတစ်ယောက်အတွက် ကော်ဖီဆိုင်တစ်ဆိုင်မှာ လူတစ်ယောက်ကို လုပ်ကြံဖို့ ကြိုးစားပါတယ်။ ဒါပေမဲ့ လုပ်ကြံမှုက မအောင်မြင်ခဲ့ဘူး။ ဖြစ်သမျှကို အစအဆုံးမြင်သွားတဲ့ စားပွဲထိုးမလေးကို ပြန်ပေးဆွဲတော့လည်း သူ့လက်ထဲကနေ လွတ်ထွက်သွားလုနီးပါး ဖြစ်ပြန်တယ်။ လုပ်သမျှ အလွဲလွဲအချော်ချော် ဖြစ်နေလို့ Jackie က မတ်တပ်တောင် မရပ်ချင်တော့လောက်အောင် စိတ်ဓာတ်ကျနေပါတယ်။ အဲဒီအခါ သူဖမ်းလာတဲ့ စားပွဲထိုးမလေးက နှစ်ယောက်စလုံး ပိုက်ဆံရှာနိုင်မယ့် နည်းလမ်းတစ်ခုကို ပြောပြလာတယ်။ အမှုအခင်းတွေကြားမှာ ဟာသအလွဲတွေ ပါလာတဲ့ ဒီဇာတ်လမ်းမှာ Jackie တစ်ယောက် ဒီတစ်ခါတော့ အောင်မြင်အောင် လုပ်နိုင်ပါ့မလား။

ဒုတိယဇာတ်ကားမှာ လွတ်မြောက်လာခဲ့တဲ့ ဂျိတ်ကို စိတ်ကျန်းမာရေးဆေးရုံတစ်ခုဆီ ပို့လိုက်ကြပါတယ်။ ဒါပေမဲ့ ဆေးရုံရောက်သွားလည်း ကာယာကိုရဲ့ရန်ကနေ မလွတ်သေးပါဘူး။ ကာယာကို ရောက်လာတဲ့အခါ ဂျိတ်က ထွက်ပြေးဖို့ ကြိုးစားပေမယ့် တံခါးပိတ်ထားလို့ ထွက်မရဖြစ်နေတယ်။ သူပြောတာတွေကို ဆေးပညာရှုထောင့်ကပဲ ကြည့်နေခဲ့တဲ့ ဒေါက်တာဆူလီဗန်ဟာ ဂျိတ် ရက်ရက်စက်စက် အသတ်ခံလိုက်ရမှ သူ့လူနာရဲ့ ထူးဆန်းတဲ့သေဆုံးမှုကို စုံစမ်းဖို့ ကြိုးစားပါတော့တယ်။ ဂျိတ် နေခဲ့တဲ့တိုက်ခန်းမှာလည်း ကျိန်စာက ပြန်ပေါ်လာနေပါတယ်။ လူတွေ ခဏခဏ သေဆုံးနေတဲ့အတွက် အိမ်ငှားတွေ ပြောင်းရွှေ့ကုန်ကြပြီး အဆောက်အဦကို ကြည့်ရှုပေးနေတဲ့ မက်စ်မှာ အခက်တွေ့နေရတယ်။ မက်စ်က အိမ်ငှားခပေးစရာမလိုဘဲ အဲဒီမှာ နေထိုင်ခွင့်ရထားသူဖြစ်ပြီး ညီမနှစ်ယောက်နဲ့အတူ ကျိန်စာသင့်အခန်းရဲ့ အောက်တည့်တည့်မှာ နေပါတယ်။ မွေးရာပါရောဂါရှိတဲ့ ညီမလေး ရို့စ်ကိုလည်း သူက စောင့်ရှောက်ပေးနေရတာပါ။ နောက်ညီမတစ်ယောက်ဖြစ်တဲ့ လီဆာက ရို့စ်ရဲ့ ဆေးကုသစရိတ်အတွက် အထောက်အကူဖြစ်ဖို့ ချစ်သူနဲ့အတူ နယူးရောက်ကို သွားအလုပ်လုပ်ဖို့ စီစဉ်ထားတယ်။ ဒါပေမဲ့ လီဆာတို့ချစ်သူနှစ်ယောက် သီးသန့်အတူနေဖို့ အခန်းရှာရင်း ကျိန်စာသင့်အခန်းထဲ မှားဝင်မိသွားပါတယ်။ ဒီအချိန်မှာပဲ ကာယာကိုရဲ့ညီမ နာအိုကိုက အစ်မဖြစ်သူရဲ့ ကျိန်စာကို တားဆီးဖို့ ဂျပန်ကနေ ချီကာဂိုအထိ ရောက်လာပါတယ်။

ဂျေးနဲ့ ဆွန်ရာတို့ဟာ သာယာတဲ့မိသားစုဘဝကို ဖြတ်သန်းနေကြရင်း ကားမတော်တဆမှုတစ်ခုမှာ သမီးလေး အိဗ်ကို ဆုံးရှုံးလိုက်ရပါတယ်။ အဲဒီနောက် ဆွန်ရာက ဂျေးကို စိတ်ကွက်လာပြီး မျက်နှာတောင် မကြည့်ချင်တော့တဲ့အထိ ဖြစ်သွားတယ်။ နှစ်ယောက်သား အတူနီးကပ်နေချိန်မှာတောင် မတော်တဆမှုကို ပြန်မြင်ယောင်နေတဲ့အတွက် အိမ်ထောင်ရေးမှာ အခက်အခဲတွေ ရှိလာပါတယ်။ ဆွန်ရာ စိတ်သက်သာလာဖို့ ဂျေးက ခဏခွဲနေဖို့ ဆုံးဖြတ်လိုက်တယ်။ ဆရာဝန်ရဲ့အကူအညီနဲ့ စိတ်အခြေအနေ ပြန်ကောင်းလာတဲ့ ဆွန်ရာဟာ ရော့ဘတ်နဲ့ ပတ်သက်မိသွားပါတယ်။ တစ်ညမှာ နှစ်ယောက်သား ဖုန်းကနေ လိင်ပိုင်းဆိုင်ရာ စကားတွေ ပြောနေကြရင်း ရော့ဘတ်ဘက်မှာ မတော်တဆဖြစ်ပြီး သေဆုံးသွားတယ်။ ဆွန်ရာ မသိထားတာက ရော့ဘတ်မှာ အိမ်ထောင်ရှိနေတာပါ။ ရော့ဘတ်ရဲ့ဇနီး မီယာက အရှက်ကြောင့် ဒီကိစ္စကို ဖုံးကွယ်ထားပြီး ခင်ပွန်းနဲ့ပတ်သက်ခဲ့တဲ့ အမျိုးသမီးကို လိုက်ရှာပါတော့တယ်။ အဲဒီအချိန်မှာ ဂျေးနဲ့ ဆွန်ရာကလည်း အတူပြန်နေကြည့်ဖို့ မြို့ပြင်က အိမ်လေးတစ်အိမ်ဆီ ပြောင်းလာကြတယ်။ ဆွန်ရာကို ရှာတွေ့သွားတဲ့ မီယာက ဂျေးနဲ့ ပြန်ပတ်သက်ပြီး ကလဲ့စားချေဖို့ ကြိုးစားလာပါတယ်။ ဒီအကြောင်းတွေကို ဘာမှမသိတဲ့ ဂျေးကတော့ အမျိုးသမီးနှစ်ယောက်ရဲ့ အငြိုးအတေးတွေကြားမှာ ကြားညပ်နေရတာပါ။