သည်းထိတ်ရင်ဖိုကားများ

အန်ဂဲလ်ဟာ ဘဝကို ရိုးရိုးသားသား ကြိုးစားဖြတ်သန်းနေသူတစ်ယောက်ပါ။ ဒါပေမယ့် ကောင်မလေးကိစ္စနဲ့ ပိုလီဆိုသူနဲ့ အချင်းများမိရာကနေ ဒုစရိုက်လောကထဲ တဖြည်းဖြည်း ခြေကျွံလာပါတယ်။ ပိုလီက အန်ဂဲလ်ရဲ့ အစွမ်းအစကို မြင်ပြီး သူ့လောကထဲ ခေါ်သွင်းခဲ့ပေမယ့် နောက်ပိုင်းမှာ အန်ဂဲလ်က သူ့ထက်တောင် လက်စောင်းထက်လာတယ်။ အန်ဂဲလ်ကလည်း အထက်တန်းကျောင်းတုန်းက ငယ်ချစ် ဆိုးကို အသုံးချပြီး သူ့အဖေ ရိုဟီလီယိုဆီ ချဉ်းကပ်လာပါတယ်။ သူမုန်းတဲ့ ဆင်ခြေဖုံးဘဝကနေ လွတ်ပြီး အထက်တန်းစားဘဝကို ရောက်ချင်နေတာပါ။ အဲဒီရည်မှန်းချက်အတွက် ဆရာဖြစ်ခဲ့ဖူးတဲ့ ရိုဟီလီယိုနဲ့ အချစ်ပြိုင်ဘက် ပိုလီတို့ကို ဘယ်လိုကျော်တက်ဖို့ ကြိုးစားမလဲ၊ လောဘနဲ့ ရွေးတဲ့ဖြတ်လမ်းတွေမှာ ဘာအခက်အခဲတွေ ကြုံလာပြီး အောင်မြင်နိုင်ပါ့မလားဆိုတာကို ဆက်ပြထားတဲ့ စပိန်အက်ရှင်နဲ့ မှုခင်းဇာတ်လမ်း ဖြစ်ပါတယ်။

တစ်နှစ်ပတ်လုံး မြူတွေ အုံ့ဆိုင်းနေတဲ့ ကျွန်းတစ်ကျွန်းမှာ လူတချို့ နေထိုင်ကြပါတယ်။ ကျွန်းလုံခြုံဖို့ဆိုရင် ဘာမဆိုလုပ်တတ်တဲ့ ရွာသူကြီးကို ကျွန်းသားတွေက ကြောက်ကြရတယ်။ အဲဒီကျွန်းမှာနေတဲ့ ဟယ်ဂျောင်ကတော့ ဘာစားစား ဗိုက်ဆာနေပြီး ကိုယ်ခန္ဓာလည်း နာကျင်နေတာကြောင့် နတ်ဆရာမတစ်ယောက်ဆီမှာ ကုသမှုခံယူနေရပါတယ်။ တစ်နေ့မှာ နတ်ဆရာမက ဟယ်ဂျောင်ရဲ့ နာကျင်မှုကို ကုသဖို့ ကုန်းမြေပေါ်က လူတစ်ယောက်လိုတယ်လို့ ပြောပြီး သူ့အစ်ကိုကို သွားခေါ်ခိုင်းတယ်။ တစ်ဖက်မှာလည်း အလုပ်ပြုတ်ထားတဲ့ ဂျောင်ဟျော့ဟာ အလုပ်အကိုင်ရှာဖွေရေးအေဂျင်စီကနေတစ်ဆင့် အလုပ်ရှာရင်း အဲဒီကျွန်းမှာ အလုပ်လုပ်ဖို့ ဖြစ်လာပါတယ်။ ကျွန်းပေါ်ရောက်သွားတဲ့အခါ သူမျှော်လင့်မထားတဲ့ ထူးဆန်းမှုတွေ အများကြီးကို တွေ့လာရတယ်။ ဒီလျှို့ဝှက်ဆန်းကြယ်သည်းဖိုဇာတ်ကားကို ဒါရိုက်တာ Yoon San က ရိုက်ကူးထားပြီး Kim Ho chang၊ Choi Ryung၊ Sok Bo Bae၊ Kang You-ra နဲ့ Taewoong တို့ ပါဝင်သရုပ်ဆောင်ထားပါတယ်။

အသက် ၁၉ နှစ်အရွယ် ဂျက်စီ ရိုင်ယန်ဝှိုက်ဟာ ပြစ်မှုတစ်ခုကြောင့် ထောင်ထဲကို ပထမဆုံး ရောက်လာပါတယ်။ ထောင်ထဲမှာ ဆပ်ပြာတုံးပြုတ်ကျရင်တောင် မကောက်ရဲလောက်အောင် ကြောက်ရွံ့နေရတဲ့ သူဟာ ရာဇဝတ်မှုတွေကို ကျွမ်းကျွမ်းကျင်ကျင် စီစဉ်တတ်ပြီး စစ်တုရင်မှာလည်း ပညာရှင်တစ်ဦးဖြစ်တဲ့ ဘရန်ဒန်နဲ့ ဆုံမိတယ်။ ငယ်ငယ်ရွယ်ရွယ်နဲ့ စစ်တုရင်ကစားကွက်တွေကို ကျွမ်းကျင်တဲ့ ဂျက်စီကို ဘရန်ဒန်က သဘောကျသွားပါတယ်။ အဲဒီကနေ သူတို့နှစ်ယောက် ပူးပေါင်းပြီး ထောင်အပြင်မှာ အပြစ်အနာအဆာမရှိတဲ့ ရာဇဝတ်မှုတစ်ခု ကျူးလွန်ဖို့ ကြိုးစားကြတယ်။ ဒါပေမယ့် ကြံစည်ထားသလို လုပ်နိုင်ဖို့က မလွယ်ဘဲ အခက်အခဲတွေ၊ လှည့်ကွက်တွေနဲ့ အခြေအနေအပြောင်းအလဲတွေကို ရင်ဆိုင်ကြရပါတယ်။

မာယွမ်ဟောက်ဟာ စီးပွားရေးလုပ်သမျှ အဆင်မပြေဘဲ အခက်အခဲတွေ ဆက်တိုက်ကြုံနေရသူပါ။ အိမ်မှာလည်း ခြောက်လသားအရွယ် သားငယ်က ညတိုင်း ထူးထူးဆန်းဆန်း ငိုနေလို့ စိတ်ပူနေရတယ်။ အဲဒီကြားထဲ သူလုပ်ကိုင်နေတဲ့ သိုလှောင်ရုံ မီးလောင်ပြီး လုပ်ဖော်ကိုင်ဖက်တစ်ယောက်ပါ မီးထဲမှာ ထိခိုက်သွားတာကြောင့် ဆေးကုစရိတ်နဲ့ လျော်ကြေးပေးဖို့ ကိစ္စတွေကို ရင်ဆိုင်ရပြန်ပါတယ်။ ကံဆိုးမှုတွေ တစ်ခုပြီးတစ်ခု ဖြစ်လာတဲ့အခါ ရှေးရိုးစွဲပြီး အယူသည်းတဲ့ သူ့အမေက နတ်ဆရာတွေကို အားကိုးယုံကြည်လာတယ်။ နတ်နဲ့ ဝိညာဉ်တွေကို မယုံကြည်တဲ့ မာယွမ်ဟောက်တို့ ဇနီးမောင်နှံအတွက်တော့ အမေ့လုပ်ရပ်တွေက စိတ်ကျဉ်းကျပ်စရာ ဖြစ်လာပါတယ်။ အဲဒီအချိန်မှာပဲ အဆက်အသွယ်ပြတ်နေတာကြာပြီဖြစ်တဲ့ ငယ်သူငယ်ချင်း ကျန်းဟိုင်လင်က သူ့ဆီ ပြန်ရောက်လာတယ်။ တစ်ဖက်မှာလည်း နတ်ဆရာတွေက အိမ်မှာ မကောင်းဆိုးဝါးကပ်နေတယ်လို့ ဟောပြောပြီး ဖိအားပေးကြတာကြောင့် အိမ်ကို စွန့်ပစ်ရမယ့် အခြေအနေအထိ ရောက်လာပါတယ်။ မာယွမ်ဟောက်ဟာ စီးပွားရေးအခက်အခဲတွေအပြင် အမေ၊ ဇနီးနဲ့ သားတို့ရဲ့ ပြဿနာတွေကိုပါ ဘယ်လိုရင်ဆိုင်မလဲ။ သူတို့ယုံကြည်နေတဲ့ အယူသည်းမှုတွေရဲ့ နောက်ကွယ်မှာ ဘာတွေရှိနေမလဲ။

ခါမာဆိုတဲ့ ကောင်မလေးဟာ မိခင်ဆန်နီနဲ့ နှစ်ယောက်တည်း နေထိုင်ပါတယ်။ သူတို့သားအမိက တစ်စုံတစ်ယောက် လိုက်ဖမ်းနေတာကြောင့် လွတ်အောင် ပုန်းရှောင်နေကြရတာပါ။ အခုတော့ ကိုယ့်နေရာကို ဘယ်သူမှ မသိတော့ဘူးလို့ ထင်နေချိန်မှာပဲ သူတို့ကို လိုက်ဖမ်းနေသူဆီက စာတစ်စောင် ရောက်လာပါတယ်။ လုံခြုံပြီလို့ ထင်ထားတဲ့နေရာအထိ စာရောက်လာတော့ သားအမိနှစ်ယောက်အတွက် ပုန်းနေရုံနဲ့ လွတ်နိုင်ပါ့မလားဆိုတာ မသေချာတော့ဘူး။ သူတို့ ဘာကြောင့် ထွက်ပြေးနေရတာလဲ၊ ဘယ်သူက ဘာအတွက် လိုက်ဖမ်းနေတာလဲ၊ နောက်ဆုံးမှာ လွတ်မြောက်နိုင်ကြမလားဆိုတဲ့ မေးခွန်းတွေနဲ့ ဆက်သွားတဲ့ ထိတ်လန့်သည်းဖိုဇာတ်ကားပါ။

Miller ဟာ ဘယ်သော့မဆို ဖွင့်နိုင်တဲ့ သော့ပြင်သမားတစ်ယောက်ပါ။ ငွေနောက်လိုက်ရင်း အကျင့်ပျက်ရဲတစ်ယောက်နဲ့ ပေါင်းပြီး ဖောက်ထွင်းမှုကျူးလွန်ခဲ့ပေမယ့် အဲဒီရဲရဲ့ သစ္စာဖောက်မှုကို ခံလိုက်ရတယ်။ အဲဒီအဖြစ်အပျက်ကြောင့် အခင်ဆုံးသူငယ်ချင်းကို ဆုံးရှုံးခဲ့ရသလို သူကိုယ်တိုင်လည်း ထောင်ကျသွားပါတယ်။ ထောင်ကပြန်ထွက်လာတော့ Miller က ဘဝသစ်ပြန်စချင်နေပြီ။ ဇနီးဟောင်းနဲ့ သမီးအပေါ် ပျက်ကွက်ခဲ့တာတွေကို ပြန်ပေးဆပ်ဖို့ပဲ စိတ်ကူးထားပါတယ်။ ဒါပေမဲ့ သူ့ကြောင့် သေဆုံးခဲ့ရတဲ့ သူငယ်ချင်းရဲ့ညီမက အကူအညီလာတောင်းတယ်။ သူ့အစ်ကိုအတွက် ပြန်ပေးဆပ်ချင်ရင် Miller တတ်ထားတဲ့ စောရပညာကို သုံးပြီး သူမကို ဒုက္ခတွင်းကနေ ကယ်ထုတ်ပေးဖို့ ပြောလာတာပါ။ ဘဝသစ်စဖို့ ရည်ရွယ်ထားတဲ့ Miller တစ်ယောက် ဒုစရိုက်မှုတွေ ပြန်ကျူးလွန်ဦးမှာလား။

ဟိုက်ဒရာဘတ်ရဲဌာနက ရဲမှူးချုပ် မိုဟန်နဲ့ ဒုတိယရဲမှူးချုပ်တွေဖြစ်တဲ့ အာဂျွန်၊ အာဟန်တို့ဟာ တစ်ဌာနတည်းမှာ တာဝန်ထမ်းဆောင်နေကြတဲ့ ရင်းနှီးတဲ့မိတ်ဆွေတွေပါ။ တစ်ရက်မှာတော့ နိုင်ငံတော်ဂုဏ်ပြုဆုပေးပွဲမှာ အာဟန် ဆုလက်ခံပြီး မိန့်ခွန်းပြောနေတုန်း စနိုက်ပါနဲ့ လုပ်ကြံခံလိုက်ရပါတယ်။ မိုဟန်နဲ့ အာဂျွန်လည်း သူတို့မိတ်ဆွေကို သတ်သွားတဲ့တရားခံ ဖော်ထုတ်နိုင်ဖို့ အသည်းအသန် ကြိုးစားကြတယ်။ တစ်ညမှာ အာဂျွန်က အမှုမှန်ကို သိသွားပေမယ့် ကားတိမ်းမှောက်မှုဖြစ်ပြီး အတိတ်မေ့သွားပါတယ်။ ဒါကြောင့် မိုဟန်ရဲ့ လမ်းညွှန်မှုနဲ့အတူ သိထားပြီးသားအမှုကို အစကနေ ပြန်စုံစမ်းရတော့တယ်။ အာဂျွန်က ရက်ပိုင်းအတွင်း မွန်ဘိုင်းမြို့ကို ပြောင်းရတော့မှာမို့ အချိန်လည်း မများတော့ပါဘူး။ သူ့မိတ်ဆွေကို သတ်သွားသူ ဘယ်သူလဲဆိုတာ ပြန်ဖော်ထုတ်ပြီး အချိန်မီ ဖမ်းနိုင်ပါ့မလား။ တယ်လဂူဇာတ်ကား Hunt မှာ အာဂျွန်အဖြစ် Sudheer Babu က သရုပ်ဆောင်ထားပြီး ဇာတ်ကောင်အများကြီးထက် အမှုစုံစမ်းမှုနဲ့ ဇာတ်လမ်းအလှည့်အပြောင်းတွေကို အဓိကထား ရိုက်ကူးထားပါတယ်။

စာရေးဆရာ ဂျိမ်းစ်ဟာ နောက်ထွက်မယ့် စာအုပ်အတွက် ဇနီးဖြစ်သူ ဂက်ဘီနဲ့အတူ ပြည်ပက ကျွန်းတစ်ကျွန်းကို အလည်အပတ် ထွက်လာပါတယ်။ အဲဒီမှာ သူ့စာဖတ်ပရိသတ် လင်မယားနှစ်ယောက်နဲ့ ဆုံမိပြီး ညစာအတူစားရင်း ခင်မင်သွားကြတယ်။ သူတို့ရောက်နေတဲ့ ဒေသမှာတော့ ရာဇဝတ်မှုတွေ မကြာခဏဖြစ်တတ်သလို ခရီးသွားတွေကို မနှစ်သက်တဲ့ ဒေသခံတွေက ပစ်မှတ်ထားတတ်ကြပါတယ်။ ဒါပေမဲ့ စုံတွဲနှစ်တွဲက ကားတစ်စီးငှားပြီး ထွက်လည်ကြတယ်။ သောက်စားပြီး အပြန်လမ်းမှာ ဒေသခံတစ်ယောက်ကို ကားနဲ့တိုက်မိတော့ ထွက်ပြေးခဲ့ကြပါတယ်။ နောက်တော့ ခင်မင်ထားတဲ့ လင်မယားရဲ့ ချောက်ချမှုကြောင့် ဂျိမ်းစ်တို့လင်မယား ဒုက္ခရောက်သွားတယ်။ အဲဒီနိုင်ငံရဲ့ ဥပဒေအရ လူသတ်မှုကျူးလွန်သူကို သေဆုံးသူရဲ့သားက ပြန်သတ်ခွင့်ရှိပြီး သားမရှိရင် နိုင်ငံတော်က ကွပ်မျက်ပေးရတာပါ။ ကူကယ်ရာမဲ့နေတဲ့ ဂျိမ်းစ်ဆီကို သရက်ရှ်ဆိုတဲ့ စုံထောက်က ထူးဆန်းတဲ့ ကမ်းလှမ်းချက်တစ်ခု ယူလာပါတယ်။ ငွေအလုံအလောက်ရှိရင် ကိုယ်သေတာကို ကိုယ်တိုင်ပြန်ကြည့်ခွင့်ရမယ်ဆိုတာပါပဲ။ ဂျိမ်းစ်က အဓိပ္ပါယ်ကို သေချာမသိပေမယ့် အသက်မသေရရင်ပြီးရောဆိုပြီး လက်ခံလိုက်တယ်။ အဲဒီနောက် မေ့မျောသွားပြီး ပြန်သတိရလာတဲ့အခါ ဘာတွေကြုံရဦးမှာလဲ။

ကိုဗစ်ကပ်ဘေးကို ရင်ဆိုင်ခဲ့ရပြီးနောက် ကမ္ဘာတစ်ဝန်းမှာ နောက်ထပ်မမျှော်လင့်ထားတဲ့ ဖြစ်ရပ်တစ်ခု ပေါ်လာပါတယ်။ လူသန်းနဲ့ချီပြီး တစ်ချိန်တည်း ရုတ်တရက်ပျောက်ကွယ်သွားကြတာပါ။ ကျန်ရစ်သူတွေ ကြောက်လန့်စိုးရိမ်နေကြသလို အကြမ်းဖက်မှုတွေနဲ့ မကောင်းမှုတွေလည်း နေရာအနှံ့မှာ ပိုများလာတယ်။ ဒီအခြေအနေမှာ ကုလသမဂ္ဂခေါင်းဆောင် နစ်ကိုလိုင်း ကာပေသီယန်က ကမ္ဘာ့နိုင်ငံတွေကို တစ်နိုင်ငံတည်းအဖြစ် စုစည်းဖို့ ပြောလာပါတယ်။ ဒီလိုစုစည်းပြီး ကပ်ဘေးနဲ့ ဆင်းရဲမွဲတေမှုတွေကနေ လွတ်မြောက်အောင် ကြိုးစားရမယ်ဆိုတဲ့ သူ့စကားကို လူအများက သဘောကျထောက်ခံကြတယ်။ ဒါပေမဲ့ သူပြောသလို တစ်နိုင်ငံတည်းဖြစ်သွားရင် ကပ်ဘေးကနေ တကယ်လွတ်မြောက်နိုင်မှာလား။ သူ့ရည်ရွယ်ချက်တွေက စစ်မှန်ရဲ့လား၊ ဒါမှမဟုတ် ကမ္ဘာကြီးကို နောက်ဆုံးနေ့ရက်တွေဆီ ဆွဲခေါ်သွားမှာလားဆိုတာကတော့ မေးခွန်းထုတ်စရာ ဖြစ်လာပါတယ်။ ၂၀၂၃ ခုနှစ်ထွက် ဒီအက်ရှင်၊ ဒရာမာနဲ့ လျှို့ဝှက်ဆန်းကြယ်ဇာတ်ကားဟာ Tim LaHaye နဲ့ Jerry B. Jenkins တို့ရဲ့ ဝတ္ထုစီးရီးကို အခြေခံထားတဲ့ Left Behind ရုပ်ရှင်စီးရီးထဲက တစ်ကားပါ။

အထက်တန်းကျောင်းသူ အဆုကဟာ ဘယ်လိုကနေ ဘယ်လိုဖြစ်သွားမှန်းမသိဘဲ တစ်ခန်းလုံးရဲ့ ဖယ်ကြဉ်ခြင်းကို ခံနေရသူပါ။ တစ်ညမှာတော့ သူ့ဖုန်းဆီကို “အလောင်းရှာဖွေရေး” ဆိုတဲ့ ကစားပွဲအတွက် ရွေးချယ်ခံထားရကြောင်း စာတိုတွေ ဆက်တိုက်ဝင်လာပါတယ်။ ကြောက်လန့်နေတဲ့ အဆုက အိပ်လိုက်ပေမယ့် ပြန်နိုးလာတဲ့အခါ သူတို့ကျောင်းဝင်းထဲက ဘုရားကျောင်းမှာ ရောက်နေတယ်။ အဲဒီနေရာမှာ သူတစ်ယောက်တည်း မဟုတ်ဘဲ အတန်းဖော်တွေဖြစ်တဲ့ ရှိတာ၊ အာဆုရှိ၊ တာကာဟီရို၊ ရူမီကိုနဲ့ အတန်းခေါင်းဆောင် ရီအဲတို့လည်း ရောက်နေကြပါတယ်။ သူတို့အားလုံး မိမိဆန္ဒမပါဘဲ ဝင်လာရတဲ့ ဒီကစားပွဲမှာ အလောင်းတစ်ခုရဲ့ အစိတ်အပိုင်းတွေကို ရှာဖွေရမှာပါ။ ကစားပွဲက ဘာကြောင့်ဖြစ်လာတာလဲ၊ ဘာလို့ သူတို့ခြောက်ယောက်ကို ရွေးထားတာလဲ၊ ဘယ်လိုအနိုင်ကစားရမလဲဆိုတာကိုတော့ ဘယ်သူမှ မသိကြသေးပါဘူး။

ဆမ်ချီလ်ဒါးစ်ဟာ ထောင်ထဲဝင်လိုက် ထွက်လိုက်ဖြစ်နေတဲ့ လူဆိုးဂိုဏ်းဝင်တစ်ယောက်ပါ။ နောက်တစ်ကြိမ် ထောင်ကပြန်ထွက်လာတဲ့အခါ ဇနီးဖြစ်သူက ဘုရားသခင်ကို ယုံကြည်ကိုးစားပြီး အတိတ်ကအပြစ်တွေကို ဆေးကြောရင်း ဘဝသစ်စနေပြီလို့ ပြောလာတယ်။ ချီလ်ဒါးစ်ကိုလည်း အရင်လိုမနေတော့ဖို့ တိုက်တွန်းပေမယ့် သူကတော့ အကျင့်ဟောင်းတွေအတိုင်း ဆက်ဆိုးမိုက်နေဆဲပါ။ ဒါပေမယ့် မထင်မှတ်ဘဲ ဘုရားကျောင်းကို လိုက်သွားဖြစ်တဲ့နောက်မှာ သူ့လုပ်ရပ်တွေအတွက် နောင်တရလာပြီး ဘဝကို ပြန်ပြင်ချင်လာတယ်။ အဲဒီကနေ အာဖရိကကို သွားပြီး ပရဟိတလုပ်ငန်းတွေ စလုပ်ဖြစ်လာပါတယ်။ အတိတ်ကလုပ်ရပ်တွေကြောင့် သူ့ကို အထင်သေးနေသူတွေကြားမှာ ဒီလုပ်ငန်းတွေ အောင်မြင်နိုင်ပါ့မလား၊ စေတနာနဲ့ လုပ်ပေးသမျှကရော ချောချောမွေ့မွေ့ ဖြစ်ပါ့မလားဆိုတာ ကြုံရဦးမှာပါ။ ဒီဇာတ်ကားကို အပြင်မှာ တကယ်ရှိတဲ့ ဆမ်ချီလ်ဒါးစ်ရဲ့ စာအုပ်ကို အခြေခံပြီး ရိုက်ကူးထားပါတယ်။

၂၀၁၇ ခုနှစ်ထွက် အက်ရှင်ဇာတ်ကား PSV Garuda Vega ထဲက ဆီခါဟာ ဥပဒေကိုလေးစားပြီး အလုပ်တာဝန်ကို အလေးထားတဲ့ အရာရှိတစ်ယောက်ပါ။ အလုပ်အပေါ် အာရုံစိုက်လွန်းတာကြောင့် ဇနီးဖြစ်သူ ဆွာတိနဲ့ အိမ်ထောင်ရေးက ပြိုကွဲလုနီးပါး ဖြစ်နေပါတယ်။ နောက်ဆုံးမှာ မိသားစုကိုပဲ ရွေးချယ်ပြီး အလုပ်ထွက်ဖို့ ဆုံးဖြတ်လိုက်ပေမယ့် ထွက်ခါနီးမှာ လူသတ်မှုတစ်ခု ပေါ်လာတာကြောင့် သူ့ဆုံးဖြတ်ချက်ကို ရွှေ့ဆိုင်းလိုက်ရတယ်။ အမှုကို လိုက်စုံစမ်းရင်း ဆက်တိုက်ပေါ်လာတဲ့ သဲလွန်စတွေက သူ့ကို နိုင်ငံရေးလှည့်ကွက်တွေကြား ဆွဲခေါ်သွားပါတယ်။ တစ်ဖက်မှာလည်း နီရာဂျန်ဆိုတဲ့ လူငယ်ဟက်ကာတစ်ယောက်ဟာ သူ့လက်ထဲက အချက်အလက်တချို့ကြောင့် လူတစ်စုရဲ့ လိုက်သတ်ခြင်းကို ခံနေရတယ်။ ထွက်ပြေးရင်း ဆီခါနဲ့ မတော်တဆ ဆုံမိတဲ့အခါ သူတို့နှစ်ယောက်ရဲ့ ရန်သူက တစ်ယောက်တည်းဖြစ်နေကြောင်း သိလာရပါတယ်။ မထင်ထားသူတွေပါ ပါဝင်ပတ်သက်နေတဲ့ ဒီကိစ္စကို နှစ်ယောက်သား ဘယ်လိုရင်ဆိုင်ဖြေရှင်းကြမလဲဆိုတာ ဇာတ်ကွက်အလှည့်အပြောင်းတွေနဲ့ ဆက်သွားပါတယ်။

ဒန်နီအယ်ဟာ ကွာရှင်းပြတ်စဲခြင်းကို အောင်ပွဲခံဖို့ သူငယ်ချင်းနှစ်ယောက်နဲ့အတူ အပန်းဖြေအိမ်တစ်လုံးကို ရောက်လာပါတယ်။ ငှားထားတဲ့အိမ်က အပြင်ပန်းမှာ အေးအေးချမ်းချမ်းရှိပေမယ့် တကယ်တော့ ဇနီးစွန့်ပစ်သွားခဲ့တဲ့ အတိတ်ကို မမေ့နိုင်သေးတဲ့ လူသတ်သမားတစ်ယောက်ရဲ့ ပိုင်နက်ဖြစ်နေတယ်။ အိမ်ထောင်ရေးပြိုကွဲပြီးနောက် စိတ်သစ်လူသစ်နဲ့ ပြန်စချင်တဲ့ အမျိုးသမီးတချို့ဟာ အဲဒီအိမ်ကို အနားယူဖို့ လာလေ့ရှိကြပါတယ်။ လူသတ်သမားကတော့ ဇနီးဟောင်းအပေါ် ထားတဲ့အငြိုးကို သူတို့အပေါ် ပုံချပြီး ပစ်မှတ်ထားသတ်ဖြတ်နေသူပါ။ အခု ဒန်နီအယ်လည်း သူ့ပစ်မှတ် ဖြစ်လာခဲ့ပြီ။ သရဲခြောက်လှန့်မှုထက် သာမန်လူတွေကြားမှာ ရှိနေတဲ့ လူသတ်သမားနဲ့ မမျှော်လင့်ဘဲ ကြုံလာနိုင်တဲ့ အသက်အန္တရာယ်ကို အခြေခံထားတဲ့ ဒရာမာ၊ သည်းထိတ်ရင်ဖိုဇာတ်ကားပါ။ ဒန်နီအယ်က သူ့ဆီကျရောက်လာတဲ့ အန္တရာယ်ကို ကျော်လွှားနိုင်မလား၊ ဒါမှမဟုတ် လူသတ်သမားရဲ့ နောက်ထပ်သားကောင်တစ်ယောက် ဖြစ်သွားမလား။

ရုံးဝန်ထမ်းအမျိုးသမီးတစ်ယောက်ဟာ ကိုယ်ရေးကိုယ်တာအချက်အလက်တွေ ထည့်ထားတဲ့ဖုန်း ပျောက်သွားခဲ့ပါတယ်။ ဖုန်းကို ပြန်ရလာပေမယ့် အရင်အတိုင်း မဟုတ်တော့ဘဲ တစ်ခုခု ပြောင်းလဲနေတယ်ဆိုတာ သတိထားမိလာတယ်။ အဲဒီပြောင်းလဲမှုတွေနဲ့အတူ သူ့ဘဝလည်း ကမောက်ကမ ဖြစ်လာတော့တာပါ။ ဖုန်းဟက်ခံလိုက်ရတာလား၊ ဘယ်အချိန်က ဖြစ်ခဲ့တာလဲ၊ ဘယ်သူလုပ်ခဲ့တာလဲဆိုတဲ့ မေးခွန်းတွေကြားမှာ သူ ဘယ်ကိုပဲသွားသွား တစ်ယောက်ယောက်က ဖုန်းကနေတစ်ဆင့် စောင့်ကြည့်နေသလို ခံစားနေရပါတယ်။ သူ့ဘဝကို အခုလိုဖြစ်အောင် လုပ်နေသူကို ရှာတွေ့နိုင်ပါ့မလား။ Unlocked ဟာ ၂၀၂၃ ခုနှစ်ထွက် တောင်ကိုရီးယား Netflix သည်းထိတ်ရင်ဖိုဇာတ်ကားဖြစ်ပြီး Kim Tae-joon ရဲ့ ဒါရိုက်တာပွဲဦးထွက်လက်ရာပါ။ Chun Woo-hee၊ Im Si-wan နဲ့ Kim Hee Won တို့ ပါဝင်သရုပ်ဆောင်ထားပါတယ်။

ရတနာကုန်သည်လည်းဖြစ်၊ ငွေကြေးခဝါချသူလည်းဖြစ်တဲ့ မိုးဒိုင်းမွန်းဟာ သူငယ်ချင်း စကန့်နဲ့အတူ ငွေကြေးပမာဏကြီးတဲ့ အလုပ်တစ်ခုကို လက်ခံထားပါတယ်။ အလုပ်အပ်သူက စကန့်ရဲ့ဦးလေးပါ။ အလုပ်မပြီးသေးခင်မှာပဲ ဦးလေးက ပိုက်ဆံကို ခဏသိမ်းထားပြီး အလုပ်ကိုလည်း ဆိုင်းထားဖို့ ပြောလာတယ်။ စကန့်ကတော့ လက်ထဲရောက်နေတဲ့ ဦးလေးရဲ့ငွေကိုသုံးပြီး မူးယစ်ဆေးအရောင်းအဝယ် လုပ်ဖို့ ကြံလိုက်ပါတယ်။ အရောင်းအဝယ်လုပ်နေတုန်း ရဲတွေရောက်လာလို့ ထွက်ပြေးကြရာက ကားမတော်တဆမှု ဖြစ်သွားတယ်။ အဲဒီဖြစ်ရပ်ကြောင့် မိုး အတိတ်မေ့သွားပြီး သူတို့လုပ်ထားသမျှလည်း အလွဲလွဲအချော်ချော် ဖြစ်ကုန်တော့တာပါ။ Liam Hemsworth ပါဝင်သရုပ်ဆောင်ထားတဲ့ အက်ရှင်၊ မှုခင်းနဲ့ သည်းထိတ်ရင်ဖိုဇာတ်ကား ဖြစ်ပါတယ်။

နီမိုဆိုတဲ့သူခိုးဟာ ခေတ်မီထိန်းချုပ်စနစ်တွေ တပ်ဆင်ထားတဲ့ တိုက်ခန်းတစ်ခုထဲက ပန်းချီကားတွေကို ခိုးဖို့ ဝင်လာပါတယ်။ ပိုင်ရှင်က ခရီးထွက်နေပြီး ဘယ်တော့ပြန်လာမယ်ဆိုတာ မသိရဘူး။ ဖြစ်ချင်တော့ နီမိုဟာ အဲဒီတိုက်ခန်းထဲမှာ ပိတ်မိသွားပြီး ထိန်းချုပ်စနစ်ကလည်း ချို့ယွင်းနေကြောင်းပဲ ပြနေကာ အလုပ်မလုပ်တော့ပါဘူး။ အထဲမှာ ရေစနစ်လည်း မလည်ပတ်ဘူး၊ အပူအအေးစနစ်ကလည်း ပူချင်သလိုပူ အေးချင်သလိုအေးနေတယ်။ စားစရာကလည်း နည်းနည်းပဲရှိပါတယ်။ ဒီကြားထဲ ရေခဲသေတ္တာတံခါးကို စက္ကန့်အနည်းငယ်ကြာအောင် ဖွင့်ထားမိရင် «ဟေး မာကရီနာ» ဆိုတဲ့ သီချင်းသံနဲ့ နားငြီးအောင် သတိပေးနေပြန်တယ်။ သူခိုးယူဖို့လာတဲ့ အဖိုးတန်ပန်းချီကားတွေကြားမှာပဲ နီမိုဟာ ထွက်လမ်းရှာရတော့တယ်။ ဇာတ်လမ်းက သူ့ရဲ့လွတ်မြောက်ဖို့ ကြိုးပမ်းမှုတွေနဲ့အတူ ပိတ်လှောင်နေရစဉ် စိတ်အတက်အကျတွေကို လိုက်ပြထားပါတယ်။

ပေါ်ပြူလိုင်ရာဆိုတဲ့ နာမည်ကြီးပြဇာတ်ရုံမှာ လျှို့ဝှက်ဆန်းကြယ်တဲ့ အဖြစ်အပျက်တွေ မကြာခဏ ဖြစ်တတ်ပါတယ်။ ဒါကြောင့် ပြဇာတ်ရုံထဲမှာ ဝိညာဉ်တစ်ခုရှိတယ်လို့ လူအများက ယုံကြည်နေကြတယ်။ တစ်နေ့မှာ အသံမြင့်အဆိုရှင် ကာလော့တာက စိတ်အလိုမကျဖြစ်ပြီး ရုတ်တရက် ထွက်သွားတာကြောင့် ညပွဲအတွက် ခရစ္စတင်းဒါယဲရ်ဆိုတဲ့ မိန်းကလေးငယ်ကို အစားထိုးသီဆိုခိုင်းလိုက်ရပါတယ်။ ခရစ္စတင်းဟာ အကအဖွဲ့က မိန်းကလေးဖြစ်ပေမယ့် ကာလော့တာထက်တောင် ကောင်းကောင်းဆိုနိုင်လို့ အားလုံး အံ့အားသင့်သွားကြတယ်။ သူ့ကို သီချင်းဆိုသင်ပေးနေသူကတော့ ပြဇာတ်ရုံကြီးရဲ့ ဝိညာဉ်ပါ။ ခရစ္စတင်းက သူ့ဆရာရဲ့အသံကိုပဲ ကြားဖူးပြီး လူကို တစ်ခါမှ မမြင်ဖူးပါဘူး။ ဒါပေမယ့် အသံကနေတစ်ဆင့်ပဲ လေးစားချစ်ခင်နေပြီး သူ့ရဲ့ တေးသွားတမန်တော်လို့ မှတ်ယူထားတယ်။ အဲဒီလိုနဲ့ ခရစ္စတင်းရဲ့ ငယ်ချစ်ဦး ရာအိုးလ် ပြဇာတ်ရုံကို ရောက်လာပါတယ်။ သီချင်းတွေနဲ့ ဇာတ်လမ်းကို ဆက်ပြောပြသွားတဲ့ ဒီအချစ်ဒရာမာမှာ ခရစ္စတင်းဟာ ငယ်ကတည်းက ချစ်မြတ်နိုးခဲ့သူ ရာအိုးလ်ကို ရွေးမလား၊ သီချင်းဆိုတတ်အောင် သင်ပေးခဲ့ပြီး အမြဲလေးစားခဲ့ရတဲ့ ဆရာကိုပဲ ရွေးမလား။

အိမ်ခြံမြေသူဌေးကြီး ဒေမီယန်ဟေးလ်ဟာ ငွေကြေးအလွန်ချမ်းသာပေမယ့် ကင်ဆာနောက်ဆုံးအဆင့် ရောက်နေပြီး နောက်ထပ်ခြောက်လတောင် အသက်ရှင်ဖို့ မရှိတော့ပါဘူး။ အဲဒီအချိန်မှာ သူ့အသိစိတ်ကို တခြားခန္ဓာကိုယ်တစ်ခုထဲ ပြောင်းထည့်ပြီး ဆက်အသက်ရှင်နိုင်မယ်ဆိုတဲ့ «အရေခွံလဲခြင်း» အစီအစဉ်ကို လက်ခံလိုက်ပါတယ်။ ဒီလိုနဲ့ အက်ဒ်ဝပ်ကစ်ဒ်နာဆိုတဲ့ နာမည်အသစ်ကိုယူပြီး ဘဝအသစ်မှာ ပျော်ပျော်ရွှင်ရွှင် နေထိုင်လာတယ်။ ဒါပေမယ့် ထင်ယောင်ထင်မှားဖြစ်မှုတွေကနေတစ်ဆင့် သူယူထားတဲ့ခန္ဓာကိုယ်ဟာ ဓာတ်ခွဲခန်းမှာ ဖန်တီးထားတာမဟုတ်ဘဲ တကယ့်လူတစ်ယောက်ရဲ့ ခန္ဓာကိုယ်ဖြစ်နေမှန်း သိလာရပါတယ်။ အဲဒီနောက် ဖုံးကွယ်ထားတဲ့အကြောင်းတွေကို လိုက်စုံစမ်းရင်း ဘယ်လိုအန္တရာယ်တွေ ရင်ဆိုင်ရမလဲဆိုတာကို ဆက်ပြထားတယ်။ Ryan Reynolds ပါဝင်သရုပ်ဆောင်ထားတဲ့ ၂၀၁၅ ခုနှစ်ထွက် သိပ္ပံစိတ်ကူးယဉ် အက်ရှင်ဇာတ်ကားပါ။

စိတ်ပညာရှင် ပါမောက္ခ ဒေါက်တာ မာဂရက် မက်သီဆန်နဲ့ ရူပဗေဒပညာရှင် တွမ် ဘတ်ကလီတို့ဟာ သဘာဝလွန်အစွမ်းရှိတယ်လို့ လိမ်လည်နေသူတွေကို ဖော်ထုတ်ကြပါတယ်။ အောက်လမ်း၊ အထက်လမ်း၊ မှော်ဆရာ၊ တန်ခိုးရှင်ဆိုတဲ့ အမည်တွေအောက်မှာ မဟုတ်မမှန် လုပ်ကြံပြနေကြတာတွေကို သူတို့က စစ်ဆေးဖော်ထုတ်နေတာပါ။ ဒီလို လိုက်ဖော်ထုတ်ရင်း ကမ္ဘာကျော် အကြားအမြင်ဆရာ ဆိုင်မွန် ဆေးလ်ဗားကိုလည်း စစ်ဆေးဖို့ ဖြစ်လာတယ်။ သူ့အစွမ်းတွေက တကယ်လား၊ အတုအယောင်လားဆိုတာ သိဖို့ ကြိုးစားကြရင်း ကြောက်စရာအမှန်တရားတွေကို ဖော်ထုတ်မိလာကြပါတယ်။ Cillian Murphy၊ Elizabeth Olsen၊ Sigourney Weaver နဲ့ Robert De Niro တို့ ပါဝင်သရုပ်ဆောင်ထားတဲ့ လျှို့ဝှက်ဆန်းကြယ်ဒရမ်မာဇာတ်ကားပါ။

လန်ဒန်က တံတားအင်ဂျင်နီယာတစ်ယောက်ဟာ အာဖရိကတိုက်၊ ဆာဗိုမှာ တံတားတစ်စင်းကို ငါးလအတွင်း အပြီးဆောက်ဖို့ တာဝန်ပေးခံရပါတယ်။ အဲဒီကို ရောက်သွားတော့ အလုပ်သမားအချင်းချင်း မတည့်တာ၊ ဆေးရုံကောင်းကောင်းမရှိတာ စတဲ့အခက်အခဲတွေကို ရင်ဆိုင်ရတယ်။ အဲဒီထက် ပိုကြီးတဲ့ပြဿနာကတော့ ခြင်္သေ့တွေ လူလာဆွဲနေတဲ့ကိစ္စပါ။ အစပိုင်းမှာ သူက အပင်ပေါ်ကနေ ခြင်္သေ့တစ်ကောင်ကို ပစ်သတ်ပေးနိုင်ခဲ့လို့ အလုပ်သမားတွေလည်း စိတ်ချမ်းသာသွားကြပြီး တံတားဆောက်တဲ့အလုပ် ပြန်အဆင်ပြေလာတယ်။ ဒါပေမဲ့ နောက်ပိုင်းမှာ ခြင်္သေ့တွေ ပိုအတင့်ရဲလာပြီး လူတွေကို ပိုသတ်လာကြပါတယ်။ တံတားလည်း ဆက်မဆောက်နိုင်၊ ခြင်္သေ့တွေကိုလည်း မနှိမ်နင်းနိုင်ဖြစ်နေချိန်မှာ အာဖရိကလူမျိုးစုတွေနဲ့အတူ အမဲလိုက်လေ့ရှိတဲ့ နာမည်ကျော်မုဆိုးတစ်ယောက် ရောက်လာတယ်။ သူတို့နှစ်ယောက် ခြင်္သေ့တွေကို နှိမ်နင်းနိုင်ကြမလား၊ ကိုယ်စီရဲ့အိပ်မက်တွေကရော ပြည့်လာပါ့မလားဆိုတာကို ဆက်ကြည့်ရမှာပါ။ ဖြစ်ရပ်မှန်ကို အခြေခံထားတဲ့ ဒီစွန့်စားခန်းဒရမ်မာမှာ Val Kilmer နဲ့ Michael Douglas တို့ ပါဝင်သရုပ်ဆောင်ထားပါတယ်။

အမေဆုံးသွားပြီးနောက် ကောင်မလေးတစ်ယောက်ဟာ အဖေနဲ့အတူ အဖေ့ဇာတိမြို့ကို ပြောင်းလာပါတယ်။ အဲဒီမှာ ဘာသာရေးကို အလေးထားတဲ့ မြို့ခံတွေနဲ့ ဆုံတွေ့ပြီး သူကိုယ်တိုင်လည်း သူတို့ထဲက တစ်ယောက်ဖြစ်လာတယ်။ ဒါပေမဲ့ သူ့အမေဟာ သာမန်သေဆုံးခဲ့တာ မဟုတ်ဘဲ အမေ့ရည်းစားဟောင်းကြောင့် ဆုံးပါးခဲ့ရတာမို့ ကောင်မလေးမှာ စိတ်ဒဏ်ရာ ကျန်နေပါတယ်။ အဲဒီစိတ်ဒဏ်ရာနဲ့ ပတ်ဝန်းကျင်မှာ မြင်နေရတဲ့ အမျိုးသမီးတွေအပေါ် ဖိနှိပ်မှုတွေ ထိပ်တိုက်တွေ့လာတဲ့အခါ ကျမ်းစာထဲက ဖိနှိပ်မှုတွေကိုပါ သူ ဆန့်ကျင်ချင်လာတယ်။ နောက်ဆုံးတော့ ကျမ်းစာကို ပြန်ပြင်ရေးဖို့ ကြံစည်လာပါတော့တယ်။ ခရစ်ယာန်ဘာသာရေးအတွင်းက အမျိုးသမီးဖိနှိပ်မှုဆိုတဲ့ အကြောင်းအရာကို အခြေခံထားပြီး လျှို့ဝှက်ဆန်းကြယ်မှုနဲ့ ရင်ထိတ်စရာအခြေအနေတွေ ရောစပ်ထားတဲ့ ဒရာမာဇာတ်ကားပါ။

လူမိုက်တစ်ယောက်ကို ဖမ်းလိုက်တာကြောင့် ဂိုဏ်းစတားတွေက ရဲစခန်းတစ်ခုလုံးကို မီးရှို့ဖျက်ဆီးလိုက်ကြပါတယ်။ ဒီလိုသောင်းကျန်းနေတဲ့ လူမိုက်တွေကို ရှင်းလင်းဖို့ အထက်အရာရှိတွေက ဘာဟ်ဂတ်ဘတ်ခ်ရှီကို တာဝန်ပေးလိုက်တယ်။ သူက တိုက်ပွဲပေါင်းများစွာကို အောင်နိုင်ခဲ့သူဖြစ်ပြီး နိုင်ငံတော်အလံကလွဲရင် ဘယ်သူ့ကိုမှ ဦးမညွှတ်ခဲ့သူပါ။ ဘာဟ်ဂတ်ဘတ်ခ်ရှီဟာ လူမိုက်တွေ ကြီးစိုးနေတဲ့မြို့ကို ရောက်လာပြီး သူတို့အားလုံးကို စုဝေးခိုင်းလိုက်ပါတယ်။ အဲဒီနောက် သူ့အာဏာကို ပြဖို့ သူဖြတ်သန်းခဲ့တဲ့ အတိတ်အကြောင်းကို ပြန်ပြောပြတယ်။ ၁၉၄၂ ခုနှစ်ကနေ ၁၉၈၆ ခုနှစ်အထိ၊ အိန္ဒိယလွတ်လပ်ရေး မရခင်ကာလကစတဲ့ အဖြစ်အပျက်တွေကို နောက်ကြောင်းပြန်ပြကွက်တွေနဲ့ တင်ဆက်ထားပါတယ်။ Shriya Saran က တော်ဝင်မင်းသမီးအဖြစ် ပါဝင်ထားပြီး Kiccha Sudeep လည်း သရုပ်ဆောင်ထားပါတယ်။

ဆင်ခြေဖုံးရပ်ကွက်မှာ နေထိုင်တဲ့ အဂါလယာတို့မိသားစုဟာ စိန်ရွှေရတနာဆိုင်တစ်ဆိုင်ရဲ့ ကံစမ်းမဲပွဲမှာ ဆုမဲပေါက်သွားကြပါတယ်။ မိသားစုအပေါ် သိတတ်တဲ့ အဂါလယာအဖြစ် Aishwarya Rajesh က သရုပ်ဆောင်ထားပြီး မမျှော်လင့်ဘဲ ရလာတဲ့ဆုကြောင့် သူတို့လည်း နောင်ရေးအတွက် မျှော်လင့်ချက်တွေနဲ့ ပျော်ရွှင်နေကြတာပေါ့။ ဒါပေမဲ့ အဲဒီပျော်ရွှင်မှုက ကြာကြာမခံလိုက်ပါဘူး။ ကံထူးရှင်အစစ်က ကိုယ်ပါဆိုပြီး ဆုကို လိုချင်သူတွေ တစ်ယောက်ပြီးတစ်ယောက် ပေါ်လာကြတယ်။ မဆိုင်တဲ့သူတွေပါ ဝင်ပါလာတဲ့အခါ အဂါလယာတို့မိသားစုမှာ ပြဿနာတွေ ဆက်တိုက်ကြုံရတော့တာပါ။ အဂါလယာက ဆုကို လက်လွှတ်ပေးလိုက်မလား၊ သူကိုယ်တိုင်ကရော ကံထူးရှင်အစစ် ဟုတ်ရဲ့လားဆိုတဲ့ မေးခွန်းတွေကြားက အရှုပ်အထွေးတွေကို ဟာသနဲ့ ရောပြီး တင်ပြထားပါတယ်။

အိမ်ထောင်ကျခါစ Helena နဲ့ Ivan တို့ဟာ ဖော့ဆို့ပင်သစ်တောရှိတဲ့ နယ်ဘက်က အိမ်တစ်အိမ်ကို ပြောင်းလာကြပါတယ်။ အဲဒီအိမ်က ကွယ်လွန်သွားတဲ့ Helena ရဲ့ အဒေါ်ပိုင်အိမ်ပါ။ သူတို့ရောက်လာချိန်မှာ ဒေသခံတွေက နွေရာသီမိုးခေါင်နေလို့ မီးဘေးအန္တရာယ်ကို ကြိုတင်ကာကွယ်ဖို့ ပြောဆိုနေကြတယ်။ ဒါပေမယ့် လင်မယားနှစ်ယောက်ကတော့ ကလေးမမွေးခင် ဖော့ဆို့ပင်အခေါက်ခွာတဲ့လုပ်ငန်းနဲ့ ငွေကြေးပြည့်စုံလာဖို့ကိုပဲ အာရုံစိုက်နေကြပါတယ်။ ဖော့ဆို့ပင်အကြောင်း ဘာမှမသိသေးတဲ့ သူတို့နှစ်ယောက်ဟာ အလုပ်သမားတွေ ငှားပြီး လုပ်ငန်းစကြတယ်။ အတူအလုပ်လုပ်ကြတဲ့အခါ ဘယ်လိုပြဿနာတွေ ပေါ်လာမလဲဆိုတာအပြင် လင်မယားချင်း အမြင်မတူလို့ ငြင်းခုံရတာတွေ၊ ဝင်ငွေရဖို့ ခေါင်းခြောက်ရတာတွေကိုလည်း တွေ့ရမှာပါ။ Mikel Gurrea ရိုက်ကူးထားတဲ့ ဒီစပိန်ရုပ်ရှင်မှာ ဖော့ဆို့ပင်အခေါက်ခွာတဲ့ လုပ်ငန်းခွင်နဲ့ လုပ်နည်းတွေကိုပါ ထည့်သွင်းပြထားပါတယ်။